25 شىلدەدە باتىس قازاقستان وڭىرلىك كوممۋنيكاسيالار قىزمەتىندە «وبلىس وڭىرىندەگى اۆتوكولىك جولدارىنىڭ قۇرىلىسى جانە ولاردى جوندەلۋ جۇمىستارى تۋرالى» تاقىرىبىندا كەزەكتى بريفينگ ءوتتى.
بريفينگتە ءسوز العان وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى مەدەت شاكايەۆتىڭ ايتۋىنشا، باتىس قازاقستانداعى جولداردىڭ جالپى ۇزىندىعى 6 530 شاقىرىم، سونىڭ 1 392 شاقىرىمى رەسپۋبليكالىق ماڭىزى بار جولدار ساناتىنا جاتادى.
2014 جىلى 62 شاقىرىم جولدى جوندەۋگە 6 ملرد. 144 ملن. تەڭگە قارجى بولىنسە، 2015 جىلى 117 شاقىرىمدى جوندەۋگە 5 ملرد. 079 ملن. تەڭگە جۇمسالعان.
2016 جىلى وبلىستىق جانە اۋداندىق ماڭىزى بار جولداردى كۇتىپ، ۇستاۋعا 5 ملرد. 978 ملن. تەڭگە قارالدى. وسى قارجىعا «چاپايەۆ-جاڭاقالا-سايقىن» جولىنىڭ 30 شاقىرىمى، «اقساي-شىڭعىرلاۋ» جولىنىڭ 51 شاقىرىمى، «ءاڭقاتى-سارىومىر» جولىنىڭ 23 شاقىرىمى، «جىمپيتى-قاراتوبە» جولىنىڭ 55 شاقىرىمى، «ورال-كيرسانوۆ» جولىنىڭ 48 شاقىرىمى جوندەلدى.
جالپى وتكەن جىلدىڭ قورىتىندىسىندا وبلىستا 145،5 شاقىرىم جول قالپىنا كەلتىرىلگەن.
2017 جىلى «ءبورلى-اقساي-جىمپيتى» جولىنىڭ 30 شاقىرىمىن قايتا قالپىنا كەلتىرۋ، «ورال-كيرسانوۆ» جولىنىڭ 48 شاقىرىمىنا، «چاپايەۆ-جاڭاقالا-سايقىن» 76 شاقىرىمىنا، «بارباستاۋ-اقجايىق-يندەر» جولىنىڭ 43 شاقىرىمىنا ورتاشا جوندەۋ جۇرگىزۋ جوسپارلانۋدا.
اعىمداعى جىلدا وبلىستىڭ 90،3 شاقىرىمدى قۇرايتىن اۋداندىق اۆتوكولىك جولدارىنىڭ جوندەۋ جۇمىستارىنا 6،6 ملرد. تەڭگە ءبولىندى.
سونداي-اق، جول قۇرىلىسىندا جاڭا تەحنولوگيا – سالقىن رەسايكلينگ ءتاسىلى كەڭىنەن قولدانىلۋدا. بۇل ءادىستى قولدانعان كەزدە جولدىڭ ساپاسى جاقسارىپ، وزىندىك قۇنى ەداۋىر ارزاندايدى. مىسالى جولدىڭ ءبىر شاقىرىمىن سالۋعا 120 ملن. تەڭگەگە جۋىق شىعىن شىعاتىن بولسا، سالقىن رەسايكلينگ ءتاسىلىنىڭ ارقاسىندا ونىڭ قۇنى 35-40 ملن. تەڭگەگە دەيىن كەميدى.
شاراعا قاتىسقان «قازاۆتوجول» ۇلتتىق كومپانياسى» اق وبلىستىق فيليالىنىڭ ءبولىم باسشىسى ەرلان قاجيموۆ بەرگەن مالىمەتى بويىنشا، اعىمداعى جىلعا رەسپۋبليكالىق ماڭىزى بار جولداردى قايتا قالپىنا كەلتىرۋگە، كۇردەلى جوندەۋگە 15 ملرد. 126 ملن. تەڭگە قارجى ءبولىندى.
2017 جىلى «ورال-تاسقالا-رف شەكاراسى» اۆتوجولىنىڭ تاسقالا اۋىلىنا دەيىنگى بولىگى (9،201 ملن. تەڭگە) تولىق ءبىتىپ، الداعى جىلى قالعان 18 شاقىرىمى سالىناتىن بولادى.
ورال قالاسىنىڭ جولاۋشى كولىگى جانە اۆتوموبيل جولدارى ءبولىمىنىڭ باسشىسى قايرات مۇحامبەتقالييەۆ وسى جىلى قالانىڭ 80 كوشەسىنىڭ جولدارىن اعىمداعى جوندەۋگە 400 ملن. تەڭگە بولىنگەنىن جانە 5،7 شاقىرىمعا تروتۋار توسەلەتىنىن جەتكىزدى.
