الماتىدا 53،7 مىڭنان استام مۇمكىندىگى شەكتەۋلى ادام تۇرادى. وڭالتۋدىڭ جەكە باعدارلاماسى بويىنشا ولاردىڭ بارلىعى وڭالتۋ مەن الەۋمەتتىك قىزمەتتەرگە تەحنيكالىق قۇرالدارمەن اقىسىز قامتاماسىز ەتىلگەن. بۇل ماقساتتارعا 5،6 ملرد تەڭگە قاراستىرىلعان.
– بيىل الەۋمەتتىك قىزمەتتەر پورتالى ەنگىزىلدى، وندا مۇگەدەكتەر رەسپۋبليكا بويىنشا جەتكىزۋشىلەردەن قاجەتتى تاۋارلار مەن قىزمەتتەر ءتۇرىن ءوز بەتىنشە تاڭداي الادى. مۇگەدەكتەردىڭ تىلەكتەرىنە سايكەس قىمبات تۇراتىن تاۋارلاردى تاڭداعاندا قوسىمشا تولەم جاساۋ فۋنكسياسى بار تەحنيكالىق قۇرالداردىڭ بەلگىلەنگەن قۇنىن وتەۋ مەحانيزمى قاراستىرىلعان. جىل باسىنان بەرى 16 800 مۇگەدەككە وڭالتۋ، قوزعالىس قۇرالدارى، تيفلو-سۋردو تەحنيكالىق قۇرالدار مەن گيگيەنالىق قۇرالدار بەرىلدى، – دەدى نازيرا توعىزبايەۆا.
سونىمەن قاتار، 5 مىڭ مۇگەدەك وڭالتۋ قىزمەتىمەن قامتىلدى. ولار ىمداۋ ءتىلى ماماندارىمەن، جەكە كومەكشىلەرمەن قامتاماسىز ەتىلگەن، سونىمەن قاتار كۋرورتتىق ەمدەلۋگە جىبەرىلگەن.
قوزعالۋى قيىن مۇگەدەكتەر مەن مۇگەدەك بالالارعا «ينۆاتاكسي» كولىگىنىڭ اقىسىز قىزمەتى ۇسىنىلادى. بۇل قىزمەتتى اي سايىن 1 500 مۇگەدەك پەن 357 مۇمكىندىگى شەكتەۋلى بالا پايدالانادى. ايتا كەتسەك، الماتىدا «وڭاي» جۇيەسى ورناتىلعان 39 «ينۆاتاكسي» اۆتوكولىگى بار.
نازيرا توعىزبايەۆا قالادا مۇگەدەكتەردىڭ الەۋمەتتىك ينفراقۇرىلىمعا قولجەتىمدىلىگىن قامتاماسىز ەتۋ بويىنشا، ونىڭ ىشىندە نىسانداردى سەرتيفيكاتتاۋ مەن بەيىمدەۋ جۇمىستارى جۇرگىزىلىپ جاتقانىن باسا ايتتى. 2021 جىلى 180 وبەكت سەرتيفيكاتتالدى، 150 وبەكت بەيىمدەلدى.
الەۋمەتتىك ءال-اۋقات باسقارماسىنىڭ باسشىسى مۇمكىندىگى شەكتەۋلى جانداردى قولداۋ ءۇشىن قۇرىلعان. «TenQogam» الەۋمەتتىك قولداۋ ورتالىعى تۋرالى دا ايتتى. ورتالىق ماماندارى قۇقىقتىق، پسيحولوگيالىق قىزمەت كورسەتەدى، سونىمەن قاتار الەۋمەتتىك، پەداگوگيكالىق جانە تاربيەلىك ماسەلەلەردى شەشۋگە كومەكتەسەدى، ترەنينگتەر مەن ۆەبينارلار وتكىزەدى.
– مۇگەدەكتىككە بايلانىستى قورقىنىش پەن بەلگىسىزدىكتى جويۋعا باعىتتالعان «تاۋەلسىز ءومىر مەكتەبى» جوباسىن ىسكە اسىرۋ جالعاسۋدا. بۇل مەكتەپتە ولار ءوزىن-وزى باعالاۋدى ارتتىرۋعا جانە قاجەتتى داعدىلاردى قالىپتاستىرۋعا كومەكتەسەدى. بيىل ەرەكشە قاجەتتىلىكتەرى بار 80 ازامات 6 جاتتىقتىرۋشىمەن ءبىر اپتالىق كۋرستان ءوتتى. كۋرستار اياقتالعاننان كەيىن كەڭسە بازاسىندا 21 كۇندىك شەبەرلىك ساباقتارى جالعاسۋدا، – دەدى ن. توعىزبايەۆا.
مەكتەپتىڭ ەرەكشەلىگى، مۇنداعى جاتتىقتىرۋشىلار – ءتۇرلى پروبلەمالاردى جەڭگەن مۇمكىندىگى شەكتەۋلى جاندار.