«نۇرلى جەر»، «باقىتتى وتباسى»، «7-20-25» باعدارلامالارىنىڭ اياسىندا وبلىس كولەمىندە 2 443 وتباسى باسپانالى بولدى، ونىڭ ىشىندە 1 779 كوپ بالالى وتباسى قونىس تويىن تويلادى.
حالىقتى باسپانامەن قامتاماسىز ەتۋدە كاسىپكەرلەردىڭ كومەگى ولشەۋسىز. ولار بىلتىرعى جىلى قولداۋعا مۇقتاج جاندارعا 170 پاتەر الىپ بەرگەن.
ال، وتكەن اپتادا اتىمتاي جومارت ازاماتتار قاپشاعاي قالاسىنان 30 پاتەر الۋعا مۇمكىندىك بەرەتىن ارنايى سەرتيفيكاتتاردى تابىستاپ، كوپتىڭ قوشامەتىنە بولەندى. ءبىراقتا، ءۇي كەزەگىندە تۇرعانداردىڭ سانى مۇنىمەن ازايماسى انىق.
بۇگىندە 50،7 مىڭ ادام، ونىڭ ىشىندە 20- سى الەۋمەتتىك وسال توپ وكىلدەرى، 5527ء-سى كوپ بالالى وتباسى باسپانا كەزەگىندە تۇر دەپ ايتتى ءوڭىر باسشىسى ءوز بايانداماسىندا.
سوندىقتان دا بيىل تۇرعىن ءۇي جانە ينجەنەرلىك ينفراقۇرىلىم قۇرىلىسىنا قاجەتتى قاراجات مولشەرى 1،6 ەسەگە ارتىپ، 32،6 ملرد. تەڭگەنى قۇرادى.
بارلىعى 939 مىڭ شارشى مەتر تۇرعىن ءۇي سالۋ جوسپارلانۋدا، ونىڭ ىشىندە 147،7 مىڭ شارشى مەترى "نۇرلى جەر" باعدارلاماسى بويىنشا بوي كوتەرەدى.
«ءبىز بارلىق باعىتتار بويىنشا 3600 وتباسىن، ونىڭ ىشىندە 2400 الەۋمەتتىك جاعىنان وسال جانە كوپ بالالى وتباسىن تۇرعىن ۇيمەن قامتاماسىز ەتۋ مىندەتىن قويىپ وتىرمىز. سونىمەن قاتار، قاراساي، ىلە، تالعار اۋداندارىندا جانە قاپشاعاي قالاسىندا جەكە قۇرىلىس سالۋشىلار ەسەبىنەن 1300 پاتەرلىك جەتى تۇرعىن ءۇي كەشەنى سالىناتىن بولادى. الداعى ۋاقىتتا جىل سايىن كەمىندە ءبىر ملن.شارشى مەتر تۇرعىن ءۇي قۇرىلىسىن جۇرگىزەتىن بولامىز»،- دەپ جاعىمدى جاڭالىقپەن ءبولىستى وبلىس اكىمى.
قالا حالقىنىڭ سانى كۇننەن-كۇنگە ارتۋدا. بۇگىنگى تاڭدا قالادا 180 مىڭ ادام ءومىر سۇرەدى. وسىعان بايلانىستى ۇيگە مۇقتاجداردىڭ سانى ارتا تۇسپەك. سوعان وراي 8ء-شى شاعىن اۋدانىندا 782 پاتەرلىك 24 كوپ قاباتتى ءۇيدىڭ قۇرىلىسى باستالادى. ونىڭ 7ء-ى بيىلعىلى جىلى قولدانىسقا بەرىلەدى دەپ جوسپارلانۋدا. سونداي-اق ينۆەستورلار ەسەبىنەن 726 پاتەرلىك 22 كوپقاباتتى تۇرعىن ۇي شىعىس شاعىن اۋدانىندا بوي كوتەرەدى.
2019 جىلى كوتتەدج قالاشىعىندا 155 ءۇي تۇرعىزىلىپ، ءبىرىنشى كەزەكتە كوپ بالالى وتباسىلارعا ءۇيدىڭ كىلتى باسىتالعان بولاتىن. بيىل 403 كوتتەدج ۇيلەر ءوز يەلەرىن تاپپاق.
انار سابىروۆا
