بىرىككەن ۇلتتار ۇيىمى قازاقستانعا ريم ستاتۋتىن راتيفيكاسيالاۋدى ۇسىندى، دەپ حابارلايدى Dalanews.kz.
“ادام قۇقىقتارى جونىندەگى كەڭەس، حالىقارالىق قۇقىق قورعاۋ ۇيىمدارى مەن ارنايى بايانداماشىلار ريم ستاتۋتىن راتيفيكاسيالاۋدى ۇسىندى”، – دەپ كورسەتىلگەن بۇۇ باس اسسامبلەياسىنا ارناپ قازاقستان بويىنشا دايىندالعان ادام قۇقىقتارى جونىندەگى كەڭەستىڭ جۇمىس توبىنىڭ بايانداماسىندا.
حالىقارالىق قىلمىستىق سوتتىڭ (حقس) ريم ستاتۋتى – بۇل حالىقارالىق كەلىسىم، ول حقس-تىڭ قىزمەتىن جانە ادامزاتقا قارسى قىلمىستار، اسكەري قىلمىستار، گەنوسيد پەن اگرەسسياعا قاتىستى يۋريسديكسياسىن رەتتەيدى. ەگەر ەل ريم ستاتۋتىن راتيفيكاسيالاسا، ول ونىڭ نورمالارىن ساقتاۋعا جانە حقس-پەن ىنتىماقتاسۋعا مىندەتتى.
ەگەر قازاقستان ريم ستاتۋتىن راتيفيكاسيالاسا، ونىڭ 59-بابىنا سايكەس، رەسەي پرەزيدەنتى ۆلاديمير پۋتين قازاقستان رەسپۋبليكاسى اۋماعىنا كەلگەن ساتتە ونى قاماۋعا الۋعا مىندەتتى بولادى. بۇل تالاپ 2023 جىلدىڭ ناۋرىز ايىندا حقس-تىڭ پۋتينگە قاتىستى قاماۋعا الۋ وردەرىن شىعارعانىنا بايلانىستى تۋىندادى. سودان كەيىن قازاقستان ونى حالىقارالىق تەرگەۋ جۇرگىزۋ ءۇشىن گااگاداعى حالىقارالىق قىلمىستىق سوتقا تاپسىرۋعا مىندەتتەلەدى. سونىمەن قاتار مەملەكەت باسشىلارىنا بەرىلەتىن يممۋنيتەت حقس شەشىمدەرىنە تارالمايدى، ال ريم ستاتۋتىنىڭ نورمالارىن ورىنداماۋ، ونى راتيفيكاسيالاعان ەل ءۇشىن حالىقارالىق سانكسيالارعا الىپ كەلۋى مۇمكىن.
بۇعان دەيىن KazTAG اگەنتتىگى بۇۇ ادام قۇقىقتارى جونىندەگى كەڭەسىنىڭ جۇمىس توبى دايىنداعان بۇۇ باس اسسامبلەياسىنا ارنالعان باياندامادا قازاقستاندا ادام قۇقىقتارىن بۇزعاندارعا جازاسىزدىق قالىپتاسىپ وتىرعانى تۋرالى پىكىردى كەلتىرگەن ەدى.
سونىمەن قاتار بۇل بۇۇ تاراپىنان ۇسىنىلعان جالعىز بايانداما ەمەس. سىناۋ باعىتىنداعى كوپتەگەن پىكىرگە قاراماستان، اتالعان باياندامالاردا قازاقستاندا ادام قۇقىقتارى سالاسىنداعى وڭ وزگەرىستەر مەن ەل بيلىگىنىڭ ءبىرقاتار ۇسىنىستى ورىنداعانى دا اتالىپ وتكەن.
