21 قاراشادا 2025-2027 جىلدارعا ارنالعان رەسپۋبليكالىق بيۋدجەت تۋرالى زاڭ جوباسى سەناتورلار سىنىنا ۇشىراپ، قايتا پىسىقتاۋ ءۇشىن ماجىلىسكە قايتارىلدى. "اۋىز كۇيگەن ءۇرىپ ىشەدى" دەمەكشى، سەناتتاعىلار بۇل جولى وتكەندەگى قاتەلىگىن قايتالاعىسى كەلمەگەن بولۋى كەرەك، زاڭ جوباسىن ماقۇلداۋدان باس تارتتى. ولار مۇنداعى ەسەپتەر "تىم وپتيميستىك سيپاتقا يە" دەستى، دەپ حابارلايدى Dalanews.kz.

جالپى، بۇگىندەرى ۇكىمەتتىڭ باستى باس اۋرۋىنا اينالعان بيۋدجەت تاپشىلىعى، نەگىزىنەن، وسى ەسەپتەن باستاۋ الادى. وندا دا ەسەپتى تۇزەگەندەر، ۇنەمى نارىقتاعى وپتيميستىك بولجامدارعا سۇيەنەدى. جەمە-جەمگە كەلگەندە، ناقتىسىندا پەسسيميستىك بولجامدار جولدى كەس-كەستەپ، تۋراسىنان قيادى. مۇندايدا، سيفرلارى كەرىگە كەتىپ وزگەرىپ شىعا كەلەتىن بيۋدجەتتى ۇكىمەت اقىرىندا قالاي تارتارىن بىلمەي، ابدەن ساسادى: ۇلتتىق قورعا قول سالادى، ول از بولسا، حالىقارالىق قارجىلىق ۇيىمداردان زايم سۇراپ، سىرتقا قول جايادى. ءيا، بيىل تۋرا سونداي ماسقارا جاعدايلار بولىپ جاتىر.

وسىلاردى ەسكەرگەن بولۋى كەرەك، سەناتورلار الدىمەن ءجىو كورسەتكىشىنە شۇيلىكتى. قۇجاتتا 2025 جىلعا ارنالعان جالپى ىشكى ءونىمنىڭ ءوسىمى 5،6% بولادى دەپ كورسەتىلگەن.

"بۇل بولجام كۇماندى جانە كوپتەگەن حالىقارالىق ساراپشىلار ونى تىم وپتيميستىك دەپ سانايدى. اسىرەسە، ونەركاسىپتىك ءوسىم ءالسىز، مۇناي ءوندىرىسىنىڭ كولەمى تومەندەپ جاتىر. سوندىقتان بۇل اسىرا باعالاۋ بولادى"، – دەدى سۇلتانبەك ماكەجانوۆ بۇل رەتتە.

سونداي-اق دەپۋتات بيۋدجەت جوباسىنا ەنگىزىلگەن 2025 جىلعا ارنالعان ينفلياسيا ءدالىزىنىڭ 5،5-7،5% ارالىعىنداعى سايكەستىگىنە دە كۇمان كەلتىردى.

"بيۋدجەت شىعىنىنىڭ ارتۋى ينفلياسيانىڭ تومەندەۋىن قامتىمايدى، سوندىقتان بۇل كورسەتكىش دەكلاراتيۆتى بولىپ قالۋى ابدەن مۇمكىن"، - دەدى ول سەزىكتەنە

سالىق تۇسىمدەرى دە سەناتورلاردىڭ كوڭىلىنە جاقپادى. 

"مينيسترلىك تاعى دا وتە وپتيميستىك بولجام دايىنداپتى:  15،1 ترلن تەڭگە، بۇل بيىلعى جىلمەن سالىستىرعاندا 3 ترلن تەڭگەگە ارتىق. الايدا، بيىل توعىز ايدىڭ قورىتىندىسى بويىنشا كتس بويىنشا جوسپاردىڭ ورىندالۋى نەبارى 82%، ققس بويىنشا 70% عانا بولدى. سول سەبەپتى كەلەسى جىلى كىرىستى 2 ترلن تەڭگەدەن استامعا ارتتىرۋ جوسپارلانعان ەدى"، – دەگەن سۇلتانبەك ماكەجانوۆ سالىققا قاتىستى ماسەلەلەردىڭ سىرتقى فاكتورلارىنا دا ەگجەي-تەگجەيلى توقتالدى. ال الەمدىك نارىقتاعى جاعدايلار بۇگىنگى تاڭدا ءماز ەمەس.

سەناتورلار جىلدان جىلعا ءوسىپ كەلە جاتقان مەملەكەتتىك قارىز جانە وعان قىزمەت كورسەتۋ شىعىندارىنا دا توقتالدى. ول دا قوماقتى سيفردى قامتيدى.

"2025 جىلى مەملەكەتتىك قارىزعا قىزمەت كورسەتۋ قۇنى 2،5 ترلن تەڭگەنى قۇرايدى، بۇل سىني دەڭگەيگە جاقىن"، - دەدى ول.

تالقىلاۋ ناتيجەسىندە سەناتورلار، ساراپشىلار كۇتكەندەي، ۇسىنىلعان وزگەرىستەر مەن ەسكەرتۋلەردىڭ بارلىعىن ەسكەرە وتىرىپ، زاڭ جوباسىن قايتا قاراۋ ءۇشىن ماجىلىسكە قايتارۋ تۋرالى شەشىم قابىلدادى. ال ساراپشىلار، ءتىپتى جوعارى اۋديتورلىق پالاتا دا بۇعان دەيىن فيسكالدىق داعدارىس بەلگىلەرى بارىن،سونداي-اق ەگەر تەك ءبىر جىلدىڭ بيۋدجەتىن دۇرىستاپ ەسەپتەپ، تۇزەي الماساق جىل سايىن ءۇش جىلدىق بيۋدجەتتى قابىلداۋدىڭ نە كەرەگى بارىن پارلامەنت پەن ۇكىمەتتىڭ ۇنەمى ەسىنە سالىپ، قاتەلىكتەرىن بەتىنە باسىپ كەلەدى.