"بۇدان باسقا جول جوق": توقايەۆ عىلىم مەن ءبىلىمدى دامىتۋ تۋرالى

ساعىنىش سارداروۆا 31 مام. 2024 17:05 2532

پرەزيدەنت قاسىم-جومارت توقايەۆ ءقازىر ءبىلىم مەن عىلىم زامانى ەكەنىن ايتىپ، بۇل سالاعا كوڭىل ءبولۋ قانشالىق ماڭىزدى ەكەنىنە توقتالدى، - دەپ حابارلايدى Dalanews.kz.

مەملەكەت باسشىسى كەيىنگى جىلدارى عىلىم ورداسىنىڭ عيماراتى توزىپ كەتكەنىن، كەيىن ناقتى تاپسىرما بەرىلگەنىن ايتتى.

"بۇگىن سىزدەرمەن عىلىم ورداسىندا جينالىپ وتىرمىز. قۋانىشتىمىن. بۇل – قازاق عىلىمىنىڭ قارا شاڭىراعى. وزدەرىڭىز جاقسى بىلەسىزدەر، سوڭعى كەزدەرى بۇل عيمارات ابدەن توزىپ كەتتى. سوندىقتان مەن وسىدان ەكى جىل بۇرىن بۇل جەردە كۇردەلى جوندەۋ جۇرگىزۋ جونىندە ناقتى تاپسىرما بەردىم. سودان بەرى ءبىراز شارۋا اتقارىلدى. ءىشى دە، سىرتى دا زامان تالابىنا ساي جاڭعىرتىلدى. ەڭ باستىسى، عيماراتتىڭ تاريحي كەلبەتى ساقتالدى. جىل سوڭىنا دەيىن بۇل جۇمىس تولىق اياقتالادى، اباتتاندىرۋ جۇمىسى جۇرگىزىلەدى. جاڭارعان عىلىم ورداسى بۇگىنگى جانە بولاشاق عالىمدار ءۇشىن قىزمەت ەتە بەرەدى.

جالپى، وسى جەردە حالقىمىزدىڭ كوپتەگەن كورنەكتى عالىمدارى ەڭبەك ەتكەن. عىلىم ورداسىندا ەسىمى ەل تاريحىنا جازىلعان ءبىرتۋار تۇلعالارىمىزدىڭ ءىزى قالعان. سونداي ۇلت پەرزەنتتەرىنىڭ ءبىرى ءارى بىرەگەيى – اكادەميك قانىش ساتبايەۆ. بيىل عالىمنىڭ تۋعانىنا 125 جىل تولدى. اكادەميك قانىش ساتبايەۆ ەلىمىزدى وركەندەتۋگە وراسان زور ۇلەس قوستى. "عالىمنىڭ حاتى ولمەيدى" دەگەن. حالقىمىز ءالى كۇنگە دەيىن ونىڭ اشقان جاڭالىقتارىنىڭ يگىلىگىن كورىپ وتىر. ءقازىر – عىلىم مەن ءبىلىمنىڭ زامانى. وتانىمىزدى كوركەيتەمىز دەسەك، ەڭ الدىمەن، وسى ەكى سالانى دامىتۋىمىز كەرەك. بۇدان باسقا جول جوق"، - دەدى پرەزيدەنت.

قاسىم-جومارت توقايەۆ قاي-قاي سالادا دا مىقتى بولۋىمىز كەرەك ەكەنىن مالىمدەدى.

"شيكىزاتقا ارقا سۇيەپ وتىرعان ەل الىسقا بارمايدى. بىزگە عالىمدار، ينجەنەرلەر، ونەرتاپقىشتار قاجەت. ماماندارىمىز الەمدىك باسەكەگە توتەپ بەرە الاتىنداي ءبىلىمدى، بىلىكتى بولۋى كەرەك. بۇگىندە الپاۋىت ەلدەردىڭ اراسىندا بارلىق سالادا باقتالاستىق ءورشىپ تۇر. ءبىز وسى كۇردەلى كەزەڭدە ەكونوميكانىڭ جاڭا ۇلگىسىنە كوشە باستادىق. ءادىل، ينكليۋزيۆتى ءارى باسەكەگە قابىلەتتى ەكونوميكا قۇرۋعا كىرىستىك. عىلىم مەن يننوۆاسيا ونىڭ باستى تىرەگى بولۋعا ءتيىس.

ءبىز كوشكە ىلەسەتىن ەمەس، كوشتى باستايتىن ەلدەردىڭ قاتارىندا بولۋىمىز كەرەك. ءبىر سوزبەن، عىلىمي الەۋەتىمىزدى ارتتىرۋ قاجەت. جالپى، وسى باعىتتا ءبىراز شارۋا اتقارىلىپ جاتىر. مەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ءبىرقاتار ناقتى تاپسىرما بەردىم. بارلىق ماسەلە مەنىڭ تىكەلەي باقىلاۋىمدا.

ءقازىر "عىلىم جانە تەحنولوگيالىق ساياسات تۋرالى" زاڭ جوباسى پارلامەنتتە قارالىپ جاتىر. كەشە سەنات ونى ءبىرىنشى وقىلىمدا ماقۇلدادى. بۇل – وتە ماڭىزدى ءارى كوپتەن كۇتكەن قۇجات. عىلىمدى باسقارۋ جۇيەسىن جەتىلدىرۋ كەرەك. عالىمدارعا الەۋمەتتىك قولداۋ كورسەتۋ ماسەلەسى دە وتە ماڭىزدى. سوندىقتان زاڭدا عىلىمي قاۋىمداستىقتىڭ مۇددەسى بارىنشا ەسكەرىلەتىن بولادى"، - دەدى مەملەكەت باسشىسى.

ۇسىنىلعان
سوڭعى جاڭالىقتار