Prezident Qasym-Jomart Toqaev qazir bilim men ǵylym zamany ekenin aityp, bul salaǵa kóńil bólý qanshalyq mańyzdy ekenine toqtaldy, - dep habarlaidy Dalanews.kz.
Memleket basshysy keiingi jyldary Ǵylym ordasynyń ǵimaraty tozyp ketkenin, keiin naqty tapsyrma berilgenin aitty.
"Búgin Sizdermen Ǵylym ordasynda jinalyp otyrmyz. Qýanyshtymyn. Bul – qazaq ǵylymynyń qara shańyraǵy. Ózderińiz jaqsy bilesizder, sońǵy kezderi bul ǵimarat ábden tozyp ketti. Sondyqtan men osydan eki jyl buryn bul jerde kúrdeli jóndeý júrgizý jóninde naqty tapsyrma berdim. Sodan beri biraz sharýa atqaryldy. Ishi de, syrty da zaman talabyna sai jańǵyrtyldy. Eń bastysy, ǵimarattyń tarihi kelbeti saqtaldy. Jyl sońyna deiin bul jumys tolyq aiaqtalady, abattandyrý jumysy júrgiziledi. Jańarǵan Ǵylym ordasy búgingi jáne bolashaq ǵalymdar úshin qyzmet ete beredi.
Jalpy, osy jerde halqymyzdyń kóptegen kórnekti ǵalymdary eńbek etken. Ǵylym ordasynda esimi el tarihyna jazylǵan birtýar tulǵalarymyzdyń izi qalǵan. Sondai ult perzentteriniń biri ári biregeii – akademik Qanysh Sátbaev. Biyl ǵalymnyń týǵanyna 125 jyl toldy. Akademik Qanysh Sátbaev elimizdi órkendetýge orasan zor úles qosty. "Ǵalymnyń haty ólmeidi" degen. Halqymyz áli kúnge deiin onyń ashqan jańalyqtarynyń igiligin kórip otyr. Qazir – ǵylym men bilimniń zamany. Otanymyzdy kórkeitemiz desek, eń aldymen, osy eki salany damytýymyz kerek. Budan basqa jol joq", - dedi Prezident.
"Shikizatqa arqa súiep otyrǵan el alysqa barmaidy. Bizge ǵalymdar, injenerler, ónertapqyshtar qajet. Mamandarymyz álemdik básekege tótep bere alatyndai bilimdi, bilikti bolýy kerek. Búginde alpaýyt elderdiń arasynda barlyq salada baqtalastyq órship tur. Biz osy kúrdeli kezeńde ekonomikanyń jańa úlgisine kóshe bastadyq. Ádil, inkliýzivti ári básekege qabiletti ekonomika qurýǵa kiristik. Ǵylym men innovatsiia onyń basty tiregi bolýǵa tiis.
Biz kóshke ilesetin emes, kóshti bastaityn elderdiń qatarynda bolýymyz kerek. Bir sózben, ǵylymi áleýetimizdi arttyrý qajet. Jalpy, osy baǵytta biraz sharýa atqarylyp jatyr. Men Ǵylym jáne tehnologiialar jónindegi ulttyq keńestiń otyrysynda birqatar naqty tapsyrma berdim. Barlyq másele meniń tikelei baqylaýymda.
Qazir "Ǵylym jáne tehnologiialyq saiasat týraly" zań jobasy Parlamentte qaralyp jatyr. Keshe Senat ony birinshi oqylymda maquldady. Bul – óte mańyzdy ári kópten kútken qujat. Ǵylymdy basqarý júiesin jetildirý kerek. Ǵalymdarǵa áleýmettik qoldaý kórsetý máselesi de óte mańyzdy. Sondyqtan Zańda ǵylymi qaýymdastyqtyń múddesi barynsha eskeriletin bolady", - dedi Memleket basshysy.
