– قازاقستاننىڭ رەسمي وكىلدەرىنىڭ نازارىن ينتەرنەتتە پايدا بولعان اقپاراتقا اۋداردىق. ءبىزدى كەيبىر باق-تا شىققان اقپارات شىندىققا سايكەس كەلمەيدى جانە رەسپۋبليكانىڭ وعان قاتىسى جوق دەپ سەندىرۋگە تىرىستى. رەسەي جاعىنىڭ جاقىن ارىپتەسىنە سەنبەۋىنە نەگىز جوق، – دەدى رەسەي ءسىم رەسمي وكىلى ماريا زاحاروۆا.
زاحاروۆانىڭ ايتۋىنشا، دەگەنمەن "رەسەي-قازاقستان ستراتەگيالىق ىنتىماقتاستىعى مەن وداقتاستىعىنا نۇقسان كەلمەس ءۇشىن جانە بۇل تاقىرىپتىڭ ءارى قاراي دا بۇرمالالانۋىنا" جول بەرمەس ءۇشىن رەسەي جاعى قازاقستاننىڭ "رەسمي تۇسىنىكتەمە بەرگەنى ءجون" دەپ سانايدى.
قاڭتار باسىندا ۋكراينانىڭ كييەۆ وبلىسىندا رەسەي باسقىنشىلىعىنان قاتتى زارداپ شەككەن اۋماقتاردىڭ ءبىرى بۋچادا "نەزلامنوستى" ياعني، "مىزعىماستىق" پۋنكتى اشىلعان ەدى. قازاق ءۇي ىشىنە ورنالاسقان پۋنكت تۇرعىندارعا قىس كەزىندە جارىق پەن جىلۋ بولماعان شاقتا تۇرعىندار كەلىپ، جىلىنىپ، تەلەفوندارىن قۋاتتاپ الۋ ءۇشىن اشىلعان.
بۇعان دەيىن ۋكراين پارلامەنتىنىڭ دەپۋتاتى سەرگەي ناگورنياك فەيسبۋك جەلىسىندە جوبا قازاقستاندىق كاسىپكەرلەر مەن ۋكرايناداعى قازاق دياسپوراسى وكىلدەرىنىڭ ارقاسىندا پايدا بولعانىن حابارلاعان ەدى.
قازاقستان وداقتاسى رەسەيدىڭ باسقىنشىلىعىن ايىپتاعان جوق، ءبىراق ۋكراينانىڭ تەرريتوريالىق تۇتاستىعىن قۇرمەتتەيتىنىن مالىمدەگەن.
استانا ماسكەۋ اننەكسيالاپ العان ۋكراين ايماقتارىنداعى پسيەۆدورەفەرەندۋمدى مويىنداعان جوق. قازاقستاندىق ەرىكتىلەر ۋكرايناعا گۋمانيتارلىق جۇك جىبەرگەن. قازاق ۇكىمەتى دە گۋمانيتارلىق كومەك بەرگەن.
