– Qazaqstannyń resmi ókilderiniń nazaryn internette paida bolǵan aqparatqa aýdardyq. Bizdi keibir BAQ-ta shyqqan aqparat shyndyqqa sáikes kelmeidi jáne Respýblikanyń oǵan qatysy joq dep sendirýge tyrysty. Resei jaǵynyń jaqyn áriptesine senbeýine negiz joq, – dedi Resei SIM resmi ókili Mariia Zaharova.
Zaharovanyń aitýynsha, degenmen "Resei-Qazaqstan strategiialyq yntymaqtastyǵy men odaqtastyǵyna nuqsan kelmes úshin jáne bul taqyryptyń ári qarai da burmalalanýyna" jol bermes úshin Resei jaǵy Qazaqstannyń "resmi túsinikteme bergeni jón" dep sanaidy.
Qańtar basynda Ýkrainanyń Kiev oblysynda Resei basqynshylyǵynan qatty zardap shekken aýmaqtardyń biri Býchada "Nezlamnosti" iaǵni, "myzǵymastyq" pýnkti ashylǵan edi. Qazaq úi ishine ornalasqan pýnkt turǵyndarǵa qys kezinde jaryq pen jylý bolmaǵan shaqta turǵyndar kelip, jylynyp, telefondaryn qýattap alý úshin ashylǵan.
Buǵan deiin ýkrain parlamentiniń depýtaty Sergei Nagorniak Feisbýk jelisinde joba qazaqstandyq kásipkerler men Ýkrainadaǵy qazaq diasporasy ókilderiniń arqasynda paida bolǵanyn habarlaǵan edi.
Qazaqstan odaqtasy Reseidiń basqynshylyǵyn aiyptaǵan joq, biraq Ýkrainanyń territoriialyq tutastyǵyn qurmetteitinin málimdegen.
Astana Máskeý anneksiialap alǵan ýkrain aimaqtaryndaǵy psevdoreferendýmdy moiyndaǵan joq. Qazaqstandyq eriktiler Ýkrainaǵa gýmanitarlyq júk jibergen. Qazaq úkimeti de gýmanitarlyq kómek bergen.
