برازيليادا اقتاۋدا اپاتقا ۇشىراعان ۇشاقتىڭ قارا جاشىكتەرىن تالداۋ اياقتالدى، دەپ حابارلايدى Dalanews.kz.
برازيليالىق باق-تىڭ مالىمەتىنشە، ەلدىڭ اۋە كۇشتەرى Embraer ۇشاعىنىڭ قارا جاشىكتەرىن تالداۋدى اياقتاپ، ماتەريالداردى قازاقستانعا جىبەرەدى. ماتەريالدى برازيليانىڭ ءۇش تەرگەۋشىسى، سونداي-اق ازەربايجان مەن رەسەيدىڭ اگەنتتەرى تالداعان.
اپاتتى تالداۋعا جانە تەرگەۋگە جاۋاپتى مەكەمە قارا جاشىكتەگى ماتەريالداردى قازاقستاندىق اۆياسيالىق اپاتتاردى تەرگەۋ ورگانىنا جىبەرەدى جانە اپات تۋرالى قورىتىندى ەسەپ جاريالانادى.
ايتا كەتەيىك، 2024 جىلى 25 جەلتوقساندا جەرگىلىكتى ۋاقىت بويىنشا 11.30-دا اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل - Azerbaijan Airlines اۋەكومپانياسىنا تيەسىلى ەمبراەر 190 ۇشاعى.
اقپارات بويىنشا ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.
اپاتتان 6 قازاقستاندىق كوز جۇمدى. جالپى قازا تاپقاندار سانى — 38. قايعىلى وقيعادان 29 ادام امان قالدى.
قايعىلى وقيعادان كەيىن ازەربايجاندا جالپىۇلتتىق ازا تۇتۋ كۇنى جاريالاندى. تۇستە بۇكىل ەل بويىنشا مەملەكەتتىك تۋلار ءتۇسىرىلىپ، كولىكتەر توقتادى. ازەربايجاندىقتار قازا تاپقانداردى ءبىر مينۋت ۇنسىزدىكپەن ەسكە الدى.
كەيىنىرەك چيكاگو كونۆەنسياسىنىڭ 13-قوسىمشاسىنا سايكەس قازاقستان ازەربايجان مەن رەسەيدىڭ اۆياسيالىق ورگاندارىمەن اقىلداسقان سوڭ، ق ر كولىك ءمينيسترى مارات قارابايەۆ باسقاراتىن كوميسسيا Embraer ۇشاعىنىڭ قارا جاشىگىن برازيلياداعى CENIPA ورتالىعىنا جىبەرۋ تۋرالى شەشىم قابىلدادى.
