بريفينگتە ايان ساكوشيەۆ مالىمدەگەندەي، بۇگىندە وبلىس جاستارىنىڭ بەلسەندىلىگىن، ولاردىڭ قوعاممەن بايلانىسىن ارتتىرۋ، بوس ۋاقىتىن ءتيىمدى وتكىزۋ ماقساتىندا ءتۇرلى جوبالار قولعا الىنىپ، اۋقىمدى جۇمىستار اتقارىلۋدا. سولاردىڭ ءبىرى – وبلىس جاستارىن رۋحاني قولداۋ، سونىڭ ىشىندە مۇمكىندىگى شەكتەۋلى جاندارعا كومەك كورسەتۋ ماقساتىندا ءداستۇرلى وتكىزىلىپ كەلە جاتقان قايىرىمدىلىق گراند بالى. بيىل قازان ايىنىڭ 2 جۇلدىزىندا وتەتىن شاراعا دايىندىق جۇمىستارى قىزۋ باستالىپ كەتتى.
ءىىى قايىرىمدىلىق گراند بالىن ۇيىمداستىرۋشىلاردىڭ قاتارىنداعى «اقيقات» جاستار قوعامدىق بىرلەستىگىنىڭ جەتەكشىسى م.سۇلەيمەنوۆتىڭ ايتۋىنشا، ءوڭىردىڭ بەلسەندى جاستارىنىڭ باسىن قوساتىن بۇل شارا بيىل اۋقىمدى بولامىق. قايىرىمدىلىق كورسەتۋمەن قاتار ءار ءتۇرلى سالاداعى ءوڭىر جاستارىنىڭ باسىن قوساتىن شاراعا تانىمال جۋرناليستەر مەن ەلىمىزگە بەلگىلى شوۋ-بيزنەس وكىلدەرى شاقىرىلماق.
بريفينگتە بالدىڭ ءوتۋ بارىسىمەن جوبا اۆتورى الپامىس شاريموۆ ارنايى تانىستىردى. قايىرىمدىلىق بالىنا قاتىسۋشى دەبيۋتانتتارعا كاستينگ 3 قىركۇيەك كۇنى قازاق دراما تەاترىندا وتكىزىلمەك. كاستينگكە 18-29 جاس ارالىعىنداعى كەز كەلگەن جاس ماماندىعىنا، كاسىبىنە قاراماي قاتىسا الادى. ىرىكتەۋدەن وتكەن 100 جاستىڭ (50 جۇپ) ءبىر اي بويى دايىندىقتارى پىسىقتالادى. ولارعا استانا وپەراسىنىڭ باس بالەتمەيستەرى دوسجان تابىلدى شەبەرلىك سىنىبىن وتكىزەدى.
– ءبىز قايىرىمدىلىق بالىن وتكىزۋمەن شەكتەلىپ قانا قويمايمىز. جوبا اياسىندا ءبىز ءتۇرلى قايىرىمدىلىق، كوپشىلىك شارالاردى ۇيىمداستىرۋدى جوسپارلاپ قويدىق. اتاپ ايتسام، 30 قىركۇيەك كۇنى دەبيۋتانتتاردىڭ قاتىسۋىمەن «جۇرەكتەن جۇرەككە» الەۋمەتتىك شاراسى وتكىلمەك. بۇل شارا اياسىندا تانىمال تۇلعالاردىڭ قاتىسۋىمەن شالعايداعى اۋىلدا تۇراتىن الەۋمەتتىك جاعدايى تومەن وتباسىلارعا تانىمال ەسترادا جۇلدىزدارىمەن بىرگە ارنايى سىي-سياپات دايىنداپ قويدىق. ياعني، 100 دەبيۋتانت كىمگە كومەكتەسكىسى كەلەتىنىن انىقتايدى. سول ارقىلى ءبىز ادامداردىڭ مەكەنجايلارىنا «قازپوشتا» اق ارقىلى توسىن سىي جىبەرەمىز. ەكىنشى شارامىز 30 قىركۇيەك – 1 قازان كۇندەرى «ءار كۇنگە ماحابباتپەن» دەگەن موتيۆاسيالىق ترەنينگ تۇرىندە وتكىزىلەدى. ماستەر-كلاستا تانىمال تۇلعالار ومىرلىك تاجىريبەلەرىمەن، جەتىستىككە جەتۋ جولدارىمەن بولىسەتىن بولادى. ءقازىر ترەنينگكە قاتىساتىن تۇلعالار ءتىزىمى بەكىتىلدى. قازنەتتە تانىمال جۇپ مارلەن مەن انەل، مانەرلەپ سىرعانۋشى دەنيس تەن، جۋرناليست ءلايلا سۇلتان قىزى شارانىڭ قۇرمەتتى قوناعى بولماق، – دەدى ا.شاريموۆ.
سونداي-اق، بيىلعى شاراعا قاتىسۋشىلارعا كيىم ۇلگىلەرىنە ەرەكشە ءمان بەرىلەتىنى جەتكىزىلدى. بالعا كىرۋ درەسس-كودى: قىز-كەلىنشەكتەردە كەشكى كويلەك، ەر ازاماتتاردا اق كويلەك پەن قىزىل كوبەلەك بولۋى ءتيىس.
سونىمەن قاتار، شاراعا تانىمال ەسترادا جۇلدىزدارى ديماش قۇدايبەرگەنوۆ، جانار دۇعالوۆا، كامشات جولدىبايەۆا، رەنات عايسين، ارنايى كەش قوناعى «ەۋروۆيدەنيە- 2011» جەڭىمپازى ەلدار گاسىموۆ جانە باسقا دا ونەر جۇلدىزدارى كەلەدى دەپ كۇتىلۋدە. كەشتى اكتەر اسىلحان تولەپوۆ پەن تانىمال تەلەجۇرگىزۋشى ءارى اكتريسا گۇلنار سىلبايەۆا جۇرگىزەتىن بولادى.
جوبانىڭ ديرەكتورى ق.قادىربەكوۆا اتالمىش شارا وبلىستىق دەڭگەيدە ەمەس، رەسپۋبليكالىق، ءتىپتى حالىقارالىق دەڭگەيدە وتەتىنىن حابارلادى. وسى شاراعا قاتىسۋعا ۇسىنىستار ەلىمىزدىڭ وزگە وڭىرلەرىنەن جانە رەسەي مەن جۇڭگو ەلدەرىنەن ءتۇسىپ جاتقاندىعىن جەتكىزدى.
