BQO jastary Grand balyn ótkizýge daiyn
Brifingte Aian Sakoshev málimdegendei, búginde oblys jastarynyń belsendiligin, olardyń qoǵammen bailanysyn arttyrý, bos ýaqytyn tiimdi ótkizý maqsatynda túrli jobalar qolǵa alynyp, aýqymdy jumystar atqarylýda. Solardyń biri – oblys jastaryn rýhani qoldaý, sonyń ishinde múmkindigi shekteýli jandarǵa kómek kórsetý maqsatynda dástúrli ótkizilip kele jatqan qaiyrymdylyq Grand baly. Biyl qazan aiynyń 2 juldyzynda ótetin sharaǵa daiyndyq jumystary qyzý bastalyp ketti.
III qaiyrymdylyq Grand balyn uiymdastyrýshylardyń qataryndaǵy «Aqiqat» jastar qoǵamdyq birlestiginiń jetekshisi M.Súleimenovtiń aitýynsha, óńirdiń belsendi jastarynyń basyn qosatyn bul shara biyl aýqymdy bolamyq. Qaiyrymdylyq kórsetýmen qatar ár túrli saladaǵy óńir jastarynyń basyn qosatyn sharaǵa tanymal jýrnalister men elimizge belgili shoý-biznes ókilderi shaqyrylmaq.
Brifingte baldyń ótý barysymen joba avtory Alpamys Sharimov arnaiy tanystyrdy. Qaiyrymdylyq balyna qatysýshy debiýtanttarǵa kasting 3 qyrkúiek kúni qazaq drama teatrynda ótkizilmek. Kastingke 18-29 jas aralyǵyndaǵy kez kelgen jas mamandyǵyna, kásibine qaramai qatysa alady. Irikteýden ótken 100 jastyń (50 jup) bir ai boiy daiyndyqtary pysyqtalady. Olarǵa Astana operasynyń bas baletmeisteri Dosjan Tabyldy sheberlik synybyn ótkizedi.
– Biz qaiyrymdylyq balyn ótkizýmen shektelip qana qoimaimyz. Joba aiasynda biz túrli qaiyrymdylyq, kópshilik sharalardy uiymdastyrýdy josparlap qoidyq. Atap aitsam, 30 qyrkúiek kúni debiýtanttardyń qatysýymen «Júrekten júrekke» áleýmettik sharasy ótkilmek. Bul shara aiasynda tanymal tulǵalardyń qatysýymen shalǵaidaǵy aýylda turatyn áleýmettik jaǵdaiy tómen otbasylarǵa tanymal estrada juldyzdarymen birge arnaiy syi-siiapat daiyndap qoidyq. Iaǵni, 100 debiýtant kimge kómekteskisi keletinin anyqtaidy. Sol arqyly biz adamdardyń mekenjailaryna «Qazposhta» AQ arqyly tosyn syi jiberemiz. Ekinshi sharamyz 30 qyrkúiek – 1 qazan kúnderi «Ár kúnge mahabbatpen» degen motivatsiialyq trening túrinde ótkiziledi. Master-klasta tanymal tulǵalar ómirlik tájiribelerimen, jetistikke jetý joldarymen bólisetin bolady. Qazir treningke qatysatyn tulǵalar tizimi bekitildi. Qaznette tanymal jup Marlen men Anel, mánerlep syrǵanýshy Denis Ten, jýrnalist Láila Sultanqyzy sharanyń qurmetti qonaǵy bolmaq, – dedi A.Sharimov.
Sondai-aq, biylǵy sharaǵa qatysýshylarǵa kiim úlgilerine erekshe mán beriletini jetkizildi. Balǵa kirý dress-kody: qyz-kelinshekterde keshki kóilek, er azamattarda aq kóilek pen qyzyl kóbelek bolýy tiis.
Sonymen qatar, sharaǵa tanymal estrada juldyzdary Dimash Qudaibergenov, Janar Duǵalova, Kámshat Joldybaeva, Renat Ǵaisin, arnaiy kesh qonaǵy «Eýrovidenie- 2011» jeńimpazy Eldar Gasymov jáne basqa da óner juldyzdary keledi dep kútilýde. Keshti akter Asylhan Tólepov pen tanymal telejúrgizýshi ári aktrisa Gúlnar Silbaeva júrgizetin bolady.
Jobanyń direktory Q.Qadyrbekova atalmysh shara oblystyq deńgeide emes, respýblikalyq, tipti halyqaralyq deńgeide ótetinin habarlady. Osy sharaǵa qatysýǵa usynystar elimizdiń ózge óńirlerinen jáne Resei men Qytai elderinen túsip jatqandyǵyn jetkizdi.
