باتىس قازاقستان وبلىسىندا مەكتەپ، اۋرۋحانا سياقتى الەۋمەتتىك ماڭىزى بار نىسانداردى سالۋعا ارنالعان مەملەكەتتىك ساتىپ الۋلاردىڭ ءبىر توپ مەردىگەردىڭ اينالاسىندا شوعىرلانۋى قوعامدا سۇراق تۋدىرىپ وتىر، دەپ حابارلايدى Dalanews.kz.
اشىق دەرەككوزدەگى حاتتامالاردى تالداۋ كورسەتكەندەي، بقو قۇرىلىس باسقارماسىن باسقاراتىن نۇركەن مولداشيەۆ باسشىلىق ەتەتىن جۇيە ونداعان ميلليارد تەڭگەنى ءبىرقاتار كومپانيا اراسىندا ءبولىپ كەلگەن. اسىرەسە ءىرى نىسانداردىڭ ءجيى جاعدايدا بەنەفيسيارى شەتەل ازاماتى بولىپ تابىلاتىن كومپانيالارعا بەرىلۋى كوزگە تۇسەدى، دەپ جازادى Arasha.kz.
ءىرى تەندەرلەردىڭ باسىم بولىگى ءبىر كومپانيادا
دەرەكتەرگە قاراعاندا، بقو اكىمى ناريمان تورەعالييەۆ جەتەكشىلىك ەتىپ وتىرعان كەزەڭدە وتكەن ءىرى تەندەرلەردىڭ ورتاق سيپاتى ايقىندالا باستاعان.
ماسەلەن، تەك بيىلدىڭ وزىندە اقساي قالاسىندا ءبورلى اۋداندىق اۋرۋحاناسىنا جاپسارلاس ستاسيونار سالۋ جوباسى بيۋدجەتكە 3،9 ملرد تەڭگە تۇسكەن. №80435243-كربس1 لوتى بويىنشا جەڭىمپاز - «التاير» ج ش س، جوسپارلى سوما - 3 906 305 435 تەڭگە. حاتتاماعا سايكەس، كومپانيانىڭ بەنەفيسيارى - رەسەي ازاماتى الەكساندر اندرەيەۆيچ پوتيچەنكو.
ءبىلىم بەرۋ نىساندارى دا «تانىس» كومپانيالارعا بەرىلىپ جاتىر
تالداۋ ءبىلىم بەرۋ وبەكتىلەرىنە ارنالعان تەندەرلەردىڭ دە تار شەڭبەردەگى فيرمالار اراسىندا ۇلەستىرىلەتىنىن كورسەتەدى.
ۇلكەن شاعان اۋىلىنداعى 420 ورىندىق مەكتەپ - 2،26 ملرد تەڭگە. №80056331-كربس1 لوتى بويىنشا جەڭىمپاز - «بولاشاق – ت» ج ش س. ەكىنشى ورىندا - قايتادان «التاير».
ءبورلى اۋىلىندا 900 ورىندىق مەكتەپ قۇرىلىسى - جوسپارلى سوما 4،09 ملرد تەڭگەدەن اسادى. جەڭىمپاز - «التاير» ج ش س. ەكىنشى ورىن - «التاير-سك 7» ج ش س.
ۆولودارسكوە اۋىلىنداعى 308 ورىندىق مەكتەپ - شامامەن 2،23 ملرد تەڭگە. تاعى دا «التاير» جەڭىپ شىققان، ەكىنشى ورىندا - «سكف وتدەلستروي» ج ش س.
5،9 ملرد تەڭگەلىك اۋرۋحانا رەكونسترۋكسياسىندا دا تانىس فيرمالار
بقو كازتالوۆ اۋداندىق اۋرۋحاناسىن رەكونسترۋكسيالاۋ جوباسى - قۇنى 5،9 ملرد تەڭگەگە باعالانعان ەڭ قىمبات تەندەردىڭ ءبىرى. جەڭىمپاز «MIR-A Construction» ج ش س بولعانىمەن، فينالعا شىققاندار اراسىندا تاعى دا «التاير» بار - ياعني نەگىزگى باسەكەلەستەر قاتارىنان تۇسپەي كەلەدى.
جالپى العاندا، مەملەكەتتىك تاپسىرىس بىرنەشە كومپانيانىڭ اينالاسىندا اينالىپ، ميللياردتاعان تەڭگەنىڭ ءبىر باعىتقا شوعىرلانۋىنا سەبەپ بولىپ وتىر.
باسەكەلەستىك بار، ءبىراق سۇراق كوپ
قۇجاتتاردا تاجىريبە، سالىق تولەمدەرى، ليسەنزيالار جانە ورنالاسقان جەر سەكىلدى تالاپتار تولىق كورسەتىلگەنىمەن، ءوڭىر تۇرعىندارى ءۇشىن باستى سۇراق اشىق كۇيىندە قالىپ وتىر:
نەلىكتەن بقو-داعى مەكتەپ، اۋرۋحانا سياقتى ماڭىزدى نىسانداردىڭ قۇرىلىسى ۇنەمى ءبىر توپ كومپانيانىڭ قولىنا بەرىلەدى؟ ونىڭ ىشىندە بەنەفيسيارى شەتەل ازاماتى بولاتىن فيرمالار نەگە ءجيى العا شىعادى؟
بۇل جاعداي اۆتوماتتى تۇردە زاڭ بۇزۋشىلىقتى بىلدىرمەيدى. الايدا بىردەي كومپانيالاردىڭ قايتا-قايتا جەڭىسكە جەتۋى، تەندەرلەر كولەمىنىڭ ءىرى بولۋى جانە قارجىنىڭ شوعىرلانۋى - قوعام تاراپىنان اشىق باقىلاۋدىڭ ماڭىزىن كۇشەيتەدى.
اسىرەسە اڭگىمە بيۋدجەت ەسەبىنەن سالىناتىن الەۋمەتتىك ينفراقۇرىلىم تۋرالى بولعاندا، بۇل تاقىرىپتىڭ وزەكتىلىگى ودان سايىن ارتا تۇسەدى. قۇرىلىس ساپاسى دا، ءوڭىر حالقىنىڭ ءومىر ساپاسى دا تىكەلەي وسى جوبالارعا بايلانىستى.
