باتىس قازاقستان وبلىسىنداعى كيروۆ سۋ قويماسى 58 جىلدان كەيىن العاش رەت كۇردەلى جوندەۋدەن ءوتىپ جاتىر، – دەپ حابارلايدى Dalanews.kz

بۇگىندە ۇزىندىعى 4 شاقىرىمنان اساتىن كوشىم سۋ كانالىنىڭ جوندەۋ جۇمىستارى تولىعىمەن اياقتالدى. سۋ قويماسىنىڭ بوگەتى 84%-عا جوندەلدى - شامامەن 1،5 شاقىرىم بولىگى قايتا جاڭارتىلدى. سۋ جىبەرۋ كانالىنىڭ جوندەۋ جۇمىستارى 69%-عا، ال پەرۆوماي ماگيسترالدى كانالىنىڭ جوندەۋ جۇمىستارى 66%-عا ورىندالدى. سۋ قويماسىنداعى باقىلاۋ-وتكىزۋ بەكەتتەرى مەن ەلەكترمەن جابدىقتاۋ جۇيەسىنىڭ قۇرىلىسى 80%-عا اياقتالدى.

سۋ رەسۋرستارى جانە يرريگاسيا مينيسترلىگى جىل سوڭىنا دەيىن كيروۆ سۋ قويماسىنداعى بارلىق جوندەۋ جۇمىسىن تولىق اياقتاۋدى جوسپارلاپ وتىر. جوبانىڭ جۇزەگە اسۋى كيروۆ سۋ قويماسىنىڭ سەنىمدىلىگىن ارتتىرىپ، تۇتىنۋشىلارعا سۋارمالى سۋدىڭ ۇزدىكسىز جەتكىزىلۋىن قامتاماسىز ەتەدى.

قايتا جاڭعىرتۋ جۇمىستارى ناتيجەسىندە سۋ قويماسىنىڭ سىيىمدىلىعى ۇلعايىپ، جۇمىسى تيىمدىرەك بولادى. بۇل باتىس قازاقستان وبلىسىنداعى 12 مىڭ گەكتاردان استام جەردى سۋارۋعا مۇمكىندىك بەرەدى. كيروۆ سۋ قويماسى 1967 جىلى پايدالانۋعا بەرىلگەن. قويمانىڭ سىيىمدىلىعى – 62،9 ملن تەكشە مەتر. بۇل نىسان ۋرال-كوشىم سۋارۋ-سۋلاندىرۋ جۇيەسىنىڭ قۇرامىنا كىرەدى.