باتىس قازاقستان وبلىسىندا «تازا قازاقستان» رەسپۋبليكالىق ەكولوگيالىق باستاماسى اياسىندا كەزەكتى تازالىق اكسياسى ۇيىمداستىرىلدى. ءىس-شارا زاچاگانسك كەنتى اۋماعىندا ءوتتى، دەپ حابارلايدى Dalanews.kz
تازالىق اكسياسىنا 100-گە جۋىق ادام قاتىستى. ولار اراسىندا ەرىكتىلەر، ستۋدەنتتەر، ۇكىمەتتىك ەمەس ۇيىمداردىڭ وكىلدەرى جانە قالا تۇرعىندارى بولدى.
اكسيانىڭ باستى ماقساتى — قورشاعان ورتانىڭ جاي-كۇيىن جاقسارتۋ، ەلدى مەكەندەردى اباتتاندىرۋ جانە ەكولوگيالىق مادەنيەتتى قالىپتاستىرۋ.
«ەكولوگيالىق “تازا قازاقستان” اكسياسى — بۇل قورشاعان ورتانى قورعاۋ، ەكولوگيالىق سانانى قالىپتاستىرۋ جانە ەلدى مەكەندەردى اباتتاندىرۋعا باعىتتالعان رەسپۋبليكالىق دەڭگەيدەگى باستاما. بۇل اكسيا ەل تۇرعىندارىن تابيعاتتى ساقتاۋعا، ەكولوگيالىق ماسەلەلەرگە بەي-جاي قاراماۋعا شاقىرادى»، - دەپ اتاپ ءوتتى «جاستار رۋحى» جاستار قاناتىنىڭ باتىس قازاقستان وبلىستىق فيليالىنىڭ ءتوراعاسى ارحات جۇباي ۇلى.
اكسيا بارىسىندا قاتىسۋشىلار تەك تازالىق جۇمىستارىمەن عانا شەكتەلمەي، اعاش وتىرعىزۋ، گۇلدەر ەگۋ سياقتى ەكولوگيالىق جۇمىستاردى دا اتقاردى. سونىمەن قاتار، جاسالعان جۇمىستاردىڭ قورىتىندىسى بويىنشا قالالىق اۋماقتى كوگالداندىرۋعا قاتىستى جوسپارلار مەن بولاشاقتا جۇزەگە اسىرىلاتىن شارالار تالقىلاندى.
اكسيانى ۇيىمداستىرۋشىلار قالالىق ەكولوگيالىق مادەنيەتتى قالىپتاستىرۋ مەن تابيعاتتى قورعاۋعا قاتىستى اۋقىمدى جۇمىستاردىڭ جالعاساتىنىن مالىمدەدى. ولارعا قالا تۇرعىندارىن ەكولوگيالىق شارالارعا قاتىسۋعا شاقىرۋدى ۇمىتپاعانى دا ايتا كەتكەن ءجون. بۇل باستاما — «تازا قازاقستان» ەكولوگيالىق اكسياسىنىڭ اياسىندا ءوتىپ جاتقان ءىس-شارالاردىڭ ءبىرى عانا.
