باتىس قازاقستان وبلىسىندا بولعان سوڭعى وقيعا قوعامعا تاعى دا ءبىر ەسكەرتۋ جاسادى. قاراپايىم ادامنىڭ ءومىر بويى جيناعان قارجىسى كوز الدىندا قاس-قاعىم ساتتە جوق بولىپ كەتۋى مۇمكىن ەكەنى انىق سەزىلدى. ورال قالاسىنداعى ءىرى ساۋدا ورتالىقتارىنىڭ بىرىندە ورىن العان جاعداي – قازىرگى زاماننىڭ ەڭ ءقاۋىپتى قۇبىلىستارىنىڭ ءبىرى بولىپ تۇرعان ينتەرنەت پەن تەلەفون الاياقتارىنىڭ ادىستەرىن ايقىن كورسەتىپ بەردى.
پوليسەيلەردىڭ ايتۋىنشا، ءبىر ەر ادام تەرمينالدىڭ الدىندا تۇرىپ، تەلەفونمەن سويلەسىپ، اسىعىس كۇيدە مالىمەت ەنگىزىپ جاتتى. ونىڭ جۇزىنەن قوبالجۋ انىق بايقالعان. سول ءساتتى ءجىتى بايقاعان ءتارتىپ ساقشىلارى دەرەۋ ارالاسىپ، جاعدايدىڭ ءمان-جايىن سۇراي باستادى. اڭگىمە بارىسىندا بەلگىلى بولعانى – ازامات بىرنەشە كۇن بويى بەلگىسىز نومىردەن قوڭىراۋ قابىلداپ كەلگەن.
العاشىندا ءوزىن «پوليسيا قىزمەتكەرىمىن» دەپ تانىستىرعان ادام، كەيىننەن «تامارا» دەگەن ايەل، ودان ءارى «قىزى» مەن «ۇلى» بولىپ قوڭىراۋ شالعان «تۋىستار» ونىڭ ساناسىن ۋلاپ، سەنىمىنە كىرگەن. بارلىعىنىڭ ماقساتى ءبىر «اقشاڭ ءقاۋىپ استىندا تۇر، ساقتاپ قالۋ ءۇشىن ارنايى قورعاۋ شوتىنا اۋدارۋ قاجەت» دەپ سەندىرۋ.
وسى سەنىمگە اربالعان ازامات دەپوزيتتەگى قارجىسىن شەشىپ الىپ، 1،3 ميلليون تەڭگەنى اۋدارۋعا دايىن تۇرعان. ەگەر سول مەزەتتە پوليسيا ارالاسپاعاندا، اقشادان ءبىرجولا ايىرىلىپ قالارى ءسوزسىز ەدى. بۇل – الاياقتاردىڭ قاراپايىم حالىقتى الداۋ ءۇشىن قانشالىقتى جان-جاقتى دايىندالاتىنىن، ءتۇرلى ءرول ويناپ، پسيحولوگيالىق قىسىم جاسايتىنىن دالەلدەيدى. بۇگىنگى كۇنى ولار بانك قىزمەتكەرى بولىپ تا سويلەيدى، پوليسيانىڭ دا اتىن جامىلادى، ءتىپتى تۋىس-باۋىردىڭ ءۇنىن سالىپ، ادامدى ەكىۇداي كۇيگە تۇسىرەدى.
اسىرەسە ورىس تىلىندە شىققان اقپارات كوزدەرى مۇنداي تاسىلدەردىڭ رەسەي مەن تمد ەلدەرىندە كەڭ تاراعانىن ايتادى. ونداعى قىلمىستىق توپتار ادامداردىڭ پسيحولوگياسىن زەرتتەپ، ولاردىڭ قورقىنىشتارىن جاقسى پايدالانادى. «اقشاڭ جوعالادى»، «شوتىڭ بۇعاتتالادى» دەگەن ءسوز – ادامدى جىلدام شەشىم قابىلداۋعا ماجبۇرلەيتىن قۇرال. قازاقستانعا دا بۇل «تولقىن» جەتتى. دەمەك، تەك پوليسيانىڭ ارەكەتىمەن شەكتەلمەي، ءاربىر ازاماتتىڭ قارجىلىق ساۋاتتىلىعى كۇشەيمەيىنشە، ماسەلە تۇبەگەيلى شەشىلمەيدى.
پوليسيانىڭ دەر كەزىندە ارالاسۋى – ءبىر ادامنىڭ عانا ەمەس، بۇتىندەي وتباسىنىڭ تاعدىرىن ساقتاپ قالدى. 1،3 ميلليون تەڭگە – قاراپايىم وتباسىنا ءبىر جىلدىق تابىسقا تەڭ قارجى. ەگەر بۇل اقشا قىلمىسكەرلەردىڭ قولىنا تۇسسە، ونى قايتارۋ مۇمكىن ەمەس ەدى. وسى وقيعانىڭ الەۋمەتتىك ءمانى دە وسىندا: ادامدار ءوز ەڭبەگىنىڭ جەمىسىن قورعاۋدىڭ جولىن ءالى دە ۇيرەنىپ ۇلگەرمەگەن. مەملەكەت تاراپىنان جاسالىپ جاتقان الدىن الۋ شارالارىنىڭ ماڭىزى دا وسىدان تۋىندايدى.
بۇگىندە باتىس قازاقستان وبلىسىندا بانكوماتتار مەن تەرمينالداردىڭ جانىندا پوليسيا قىزمەتكەرلەرى ارنايى پروفيلاكتيكالىق جۇمىستار جۇرگىزۋدە. اسىرەسە حالىق كوپ شوعىرلانعان ساۋدا ورتالىقتارىندا ءتارتىپ ساقشىلارى ازاماتتاردىڭ ءاربىر ارەكەتىنە نازار اۋدارىپ، كۇدىكتى جاعدايعا دەر كەزىندە ارالاسادى. مۇنداي «زونالاردا» قىراعىلىق تانىتۋ – قىلمىستىڭ الدىن الۋدىڭ ەڭ ءتيىمدى جولى. سونىمەن بىرگە تۇرعىندارعا ءتۇسىندىرۋ جۇمىستارى جۇرگىزىلىپ، «ەشقاشان بەيتانىس نومىرلەردەن كەلگەن قوڭىراۋعا سەنبەڭىزدەر، بانك قىزمەتكەرى دە، پوليسيا دا سىزدەن اقشا اۋدارۋدى تالاپ ەتپەيدى» دەگەن قاراپايىم ەرەجە قايتالانىپ ايتىلادى.
