ميراس مۇلقاي بقو اكىمىنىڭ ورىنباسارى بولىپ تاعايىندالدى، دەپ حابارلايدى Dalanews.kz.
بۇگىن، 16 شىلدەدە، پرەزيدەنت اكىمشىلىگىمەن كەلىسىم بويىنشا وبلىس اكتيۆىنە باتىس قازاقستان وبلىسى اكىمىنىڭ جاڭا ورىنباسارى تانىستىرىلدى. بۇل قىزمەتكە سوڭعى ەكى جىل بويى وبلىستىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىن باسقارعان 36 جاستاعى ميراس مۇلقاي تاعايىندالدى.
ميراس مۇلقاي بۇل لاۋازىمدا باقىتجان نارىمبەتوۆتىڭ ورنىن باستى. باقىتجان نارىمبەتوۆ 2025 جىلدىڭ ءساۋىر ايىنىڭ سوڭىندا قوستاناي وبلىسى اكىمىنىڭ ورىنباسارى بولىپ تاعايىندالعان ەدى. ول باتىس قازاقستان وبلىسىندا دەنساۋلىق ساقتاۋ، ەنەرگەتيكا، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار، موبيليزاسيالىق دايىندىق پەن ازاماتتىق قورعانىس ماسەلەلەرىنە جەتەكشىلىك ەتكەن.
ميراس مۇلقاي باتىس قازاقستان وبلىسىنىڭ تۋماسى. م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىن «قارجى» ماماندىعى بويىنشا جانە جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىن «قۇرىلىس» ماماندىعى بويىنشا ءتامامداعان.
ەڭبەك جولىن 2011 جىلى ورال قالاسىنىڭ تۇرعىن ۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى بولىمىنە قاراستى ستاتيست لاۋازىمىنان باستاعان. ءار جىلدارى باس مامان، كورىكتەندىرۋ سەكتورىنىڭ مەڭگەرۋشىسى، تكش ءبولىمى باسشىسىنىڭ ورىنباسارى، سونداي-اق قالالىق قۇرىلىس ءبولىمىنىڭ باسشىسى قىزمەتتەرىن اتقارعان.
2019 جىلى ورال قالاسى اكىمىنىڭ ورىنباسارى بولىپ تاعايىندالدى.
2023 جىلعى 17 قاڭتاردان باستاپ باتىس قازاقستان وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىن باسقاردى.
