باتىس قازاقستان وبىلسى اكىمى ناريمان تورەعالييەۆ وبلىس بويىنشا كوممۋنالدىق مەكەمە قىزمەتكەرلەرىنە 58 ارنايى تەحنيكانىڭ كىلتتەرىن، – دەپ حابارلايدى Dalanews.kz بقو اكىمىنىڭ باسپا ءسوز قىزمەتىنە سىلتەمە جاساپ.
اتاپ ايتقاندا، كوممۋنالدىق قىزمەت سالاسىنا قاجەت تەحنيكالاردىڭ تۇرلەرى- اۆتوكران، كران-مانيپۋلياتور، كوشپەلى ەلەكتروتەحنيكالىق لابوراتوريا كولىگى، اۆتوگيدروكوتەرگىش، اۆتوبۋس جانە تاعى باسقالارى بار.
ارنايى تەحنيكانىڭ 20-سى وبلىس اۋداندارىنا جىبەرىلسە، قالعاندارى «باتىس قازاقستان ايماقتىق ەلەكتر جەلىلىك كومپانياسى» ءجشس-نىڭ ەنشىسىندە قالماق.
– مەملەكەت باسشىسىنىڭ ەلەكتر جەلىلەرىن جاڭعىرتۋ بويىنشا العا قويعان مىندەتتەرىن ورىنداۋ اياسىندا «باتىس قازاقستان ايماقتىق ەلەكتر جەلىلىك كومپانياسى» ءۇشىن 58 بىرلىك تەحنيكا ساتىپ الىندى.
بۇگىندە كوممۋنالدىق قىزمەت سالاسىن دامىتۋ ءۇشىن مەملەكەت كوممۋنالدىق شارۋاشىلىقتار مەن كاسىپورىنداردىڭ ماتەريالدىق-تەحنيكالىق بازاسىن نىعايتۋعا بارىنشا كوڭىل ءبولىنىپ، تەحنيكالار شەتىن جاڭارتىلۋدا. بۇعان جەرگىلىكتى بيۋدجەتتەن 1،9 ملرد تەڭگە قارجى بولىنگەن.
تۇرعىن ۇي-كوممۋنالدىق شارۋاشىلىق قىزمەتى – ءوڭىر تۇرعىندارى ءۇشىن ەڭ ماڭىزدى جانە قاجەتتى سالالاردىڭ ءبىرى. كۇندەلىكتى تۇتىنىپ جاتقان ەلەكتر ەنەرگياسى، اۋىز سۋ، كارىز جەلىلەرىن پايدالانۋ يگىلىكتەر وسى سالا قىزمەتكەرلەرىنىڭ ارقاسىندا مۇمكىن بولۋدا، – دەدى ءوڭىر باسشىسى ناريمان تورەعالييەۆ.
جالپى وبلىس بويىنشا جىلدان جىلعا مەديسينا، پوليسيا، كوممۋنالدىق مەكەمەلەر، تاعى دا باسقا سالالارعا بەرىلگەن ارنايى تەحنيكالاردىڭ سانى ارتىپ كەلەدى. ماسەلەن، وسىدان بىرەر اپتا بۇرىن ورمان شارۋاشىلىعى 32 جاڭا تراكتورمەن تولىقسا، وتكەن جىلى مەديسينا سالاسىنا 81 اۆتوكولىك، توتەنشە جاعداي دەپارتامەنتىنە 46، پوليسيا دەپارتامەنتىنە 149 (بيىلعى جىلى 17 بىرلىك) تەحنيكا ساتىپ الىندى.
