پرەزيدەنتتىڭ تاپسىرماسىن ىسكە اسىرۋ ماقساتىندا شىعىس قازاقستان وبلىسى، بورودۋليحا اۋدانىنا قاراستى زەنكوۆكا اۋىلىندا جەلتوقسان ايىنىڭ سوڭىندا ماڭىزدى وقيعا ورىن الدى. اۋىلدا «زەنكوۆكا» جاستار حوككەي كلۋبىنىڭ تاربيەلەنۋشىلەرىنە شقو دەنە شىنىقتىرۋ جانە سپورت باسقارماسى ساتىپ العان 27 جۇپ كونكي، قاقپاشى نىسانى جانە باسقا دا ويىن جابدىقتارى سىيعا تارتىلدى. كوماندانى اۋدان اكىمىنىڭ ورىنباسارى ە.سەليحانوۆ، وكرۋگ اكىمى د. اساۋبايەۆ، بجسم، دەنە شىنىقتىرۋ جانە سپورت ءبولىمىنىڭ ماماندارى قۇتتىقتادى.
سونىمەن قاتار، وسى كۇندەرى سپورتتىق جەتىستىكتەرىمەن ايگىلى پەتروپاۆلوۆكا اۋىلىندا اكىمدىكتىڭ باستاماسىمەن اۋدانى 800 شارشى مەتر مۇز ايدىنى اشىلدى، ال وسكەمەن قالاسىنىڭ «تورپەدو» حوككەي كلۋبى اۋىل جاستارىنا 10 حوككەي تاياقشاسى مەن 10 كونكي سىيلادى.
الداعى ۋاقىتتا حوككەي كومانداسىن ۇيىمداستىرۋ جانە اۋداندىق جارىستارعا قاتىسۋ جوسپارلانۋدا. بالالارمەن قاتار، ەرەسەكتەر بوس ۋاقىتتارىن كونكيمەن سىرعاناۋ، حوككەي ويناۋ ارقىلى ءتيىمدى وتكىزەدى. جاس سپورتشىلارعا جارىستاردا جەڭىس تىلەيمىز!
