«نەگە بىزدە كارىسى دە، جاسى دا “ءبارى ءوزى” بولعاندى جاقسى كورەدى؟ سەناريي اۆتورى دا ءوزى، رەجيسسەرى دە ءوزى، وعان قوسا باستى ءرولدى سۇيىكتى ءوزى ويناۋى كەرەك. سوڭىندا كوتەرە المايتىن شوقپاردى قوسا كوتەرەم دەپ، كوتەرە الاتىن شوقپارىنا دا شاماسى كەلمەي قالادى.
نۇرتاس ادامبايدىڭ “تارازىندا” دا سونى كوردىك.
ءيا، شىندىق قاتال دا قاتىگەز. ءبىراق كينونىڭ بوياۋى بۇگىنگى كۇندىكى ەمەس. توقسانىنشى جىلدارى، ساناساڭ، وتىز جىل بۇرىن ءتۇسىرىلۋى كەرەك “تۋىندى” ەدى.
نۇرتاس “كەلينكا” ءۇشىن ۇرىس ەستىگەندە “شلاگباۋمدى” كورىپ، ويلاعان سياقتى. “اا، سەندەرگە قاراڭعى كينو كەرەك پا، ءما”. “ەركەبۇلان كەرەك پا، ءما”. قاراڭعىلىق بار، نەگاتيۆ بار، پەسسيميزم بار. ءبىراق رەجيسسەرلىك كوزقاراس، پوزيسيا تۋرالى ايتۋعا ءالى ەرتە. بۇل تۇرعىدا نۇرتاستىڭ فەيسبۋكتاعى پوستتارى قىزىعىراق. ال «تاراز»، ءالى دە ەرىككەننىڭ ەرمەگى. قورقاقتاردىڭ اتىسى، كەزدەيسوق بىرەۋلەردىڭ ءبارىن قىرىپ سالۋى… ونىمەن ەشكىمدى تاڭقالدىرا المايسىڭ.
ءبىراق مويىندايىق، كينو ادەمى باستالىپ كەلە جاتىپ ەدى. تاكسيستى قوسپاعاندا، كولىكتەگى تورتەۋ. ءبارى ءۇنسىز، سىرەسكەن بەتتەر. ءارقايسىسى ءوز ويىمەن.
ەكى قىزدىڭ كلۋبقا كەلە جاتقان تۇسىنان باستاپ اسەردىڭ ءبارى بۇزىلدى. بەيكۇنالىكتى وينايمىن دەپ كوزىن قايتا قايتا باقىرايتا بەرگەن گ. جولانوۆانىڭ قىلىعىنان جاساندىلىق باستالدى. ارى قاراي اتىس شابىس. ەكراندا كادىمگىدەي دراما بولىپ جاتسا، زال جىرق جىرق ەتىپ كۇلەدى.
ويتكەنى مۇندا بويەۆيكتىڭ سحەماسى بار دا، قيسىن جوق. مىسالى، اشۋلى قۇداي سياقتى اليدەي بايدىڭ بالاسى، اسىرەسە، ونى “نيەۆانيلنىي كراساۆچيك” (ە.تۇرسىنوۆتىڭ ءسوزى) جاندوس ايباسوۆ ويناسا، قالاعان قىزىنا قولى جەتپەيدى دەگەنگە سەنۋ قيىن.
نەمەسە ايدار (نۇرتاستىڭ ءوزى)، اتىس بولىپ جاتقان كەزدە ولگەن قىزدى اينالىپ تولعانىپ وتىرعانى نەسى؟ ءوزىن قۇتقارۋ ينستينكتى قايدا؟ ونىڭ قاسىندا تولەپبەرگەن بايساقالوۆتىڭ “اقىرى” سەنىمدى. جانى قىل ۇستىندە تۇرعاندا، اساندىكى نە ماحاببات؟ نەمەسە قالىڭدىقتىڭ شكاف اعالارى سونشا جەردەن ات ارىتىپ كەلىپ، ايداردىڭ ءولىپ جاتقانىن ءبىر كورىپ كەتۋگە دە جارامادى عوي…
شىنى كەرەك، مۇندا ەركەبۇلان دايىروۆتان باسقا كوز توقتاتاتىن ەشتەڭە كورمەدىك. ەركەبۇلان كەشە عانا جىپتىكتەي بالا ەدى، ءقازىر بەت جۇزىندە بيوگرافيا بار، اشىنعان ادامداردى اينىتپاي كەيىپتەيتىن بولىپتى.
جاي وتىرعاننىڭ وزىندە كوكجال سياقتى، ال ايقاسقاندا جارالى كوكجال سياقتى)). نۇرتاس “تارازعا” قازىرگى قازاق كينوسىنداعى بۇقامويىندار مەن بەتىنەن ءزارى توگىلگەندەردىڭ ءبارىن جيناعان، ءبىراق ءبارى جابىلىپ ءبىر ەركەبۇلانعا پارتنەر بولا المادى. ال تومپيعان باۋىرساق نۇرتاستىڭ ءوزى سول قاتۋلى جۇزدەردىڭ اراسىنا ۇيلەسە الماي ءجۇر.
سوسىن بۇل كينودا ساسپەنس جەتىسپەدى. “ويباي، جاقىنداپ قالدى، قاشىڭدار، كەتىڭدەر، انە، مىنە” دەپ ورىندىقتا وتىرا الماي كەتۋ دەگەن جوق. سودان دا ما ەكەن، “تارازدان” كەيىن تويماي قالىپ، تيم بەرتوننىڭ “ميسس پەريگرينىنە” كىردىك. كادىمگى ەرتەگى سيۋجەت، ءبىراق سونشالىقتى الاڭدايسىڭ، ەلەڭدەيسىڭ. ءاي، بۇل — قيال، فەنتەزيدىڭ جانىندا “تاراز” دەگەن ءتىرى ادامدار، ءوزىمىزدىڭ قازاقتار ەدى عوي. جوق. سەندىرمەيدى. زال، ايتەۋىر، قازاقشا بوقتىق ەستىگەنىنە ءماز بولىپ قايتقان سياقتى».
