جىل باسىنان بەرى ۇيىمداسقان قىلمىسقا قارسى كۇرەس بولىنىستەرىنىڭ قىزمەتكەرلەرى 14 كۇدىكتىنى ۇستادى. ولار وزدەرىن پوليسيا قىزمەتكەرلەرى رەتىندە كورسەتىپ، ازاماتتاردان اقشا بوپسالاپ، الاياقتىقپەن جانە قىلمىستىق “قامقورلىق كورسەتۋمەن” اينالىسقان، دەپ حابارلايدى Dalanews.kz.
قاراشادا شىمكەنتتە ءبىر توپ ادام وزدەرىن پوليسيا قىزمەتكەرلەرى رەتىندە تانىستىرىپ، “قامقورلىعى” ءۇشىن اي سايىن 1،5 ملن تەڭگە الىپ وتىرعان.
ءدال سول سياقتى اقتوبەدە ەكى جاس جىگىت قالانىڭ ەكى تۇرعىنىنا زورلىق-زومبىلىق كورسەتىپ، 300 مىڭ تەڭگە العان.
قونايەۆتا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى الماتى وبلىسىنىڭ ەكى تۇرعىنىن ۇستادى. ولار وزدەرىن جەدەل ۋاكىل رەتىندە كورسەتىپ، جابىرلەنۋشىدەن 500 مىڭ تەڭگە بوپسالاعان. جالعان قىزمەتتىك كۋالىكتەر، قۇجاتتار جانە نىساندى كيىم تاركىلەندى. كۇدىكتىلەر قاماۋعا الىندى.
“ايتا كەتۋ كەرەك، زاماناۋي تەحنولوگيالار الاياقتارعا ىقتيمال قۇرباندار تۋرالى ءارتۇرلى اقپاراتتى وڭاي الۋعا مۇمكىندىك بەرەدى. بۇل ولاردىڭ قىلمىستىق سحەمالارىن كۇدىك تۋعىزبايتىنداي سەنىمدى ەتىپ كورسەتەدى. قىلمىسكەرلەر ادامداردى مانيپۋلياسيالاۋ ءۇشىن پسيحولوگيالىق ادىستەردى قولدانادى. جالعان پوليسيا قىزمەتكەرلەرىن ۇستاۋ – بۇل قاۋىپسىزدىك ماسەلەسى عانا ەمەس، ازاماتتاردىڭ قۇقىعىن قورعاۋدىڭ ماڭىزدى بولىگى.
ازاماتتاردىڭ قىراعىلىعى مۇنداي قىلمىستاردىڭ سانىن ەداۋىر تومەندەتۋى مۇمكىن. ءىىم كەز كەلگەن زاڭسىز ارەكەتتەر تۋرالى پوليسياعا دەرەۋ حابارلاۋدى سۇرايدى. بۇل باعىتتاعى پروفيلاكتيكالىق جۇمىستار جالعاسىپ جاتىر”، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
