جوسپارعا سايكەس وتكەن جەكسەنبىدە – 21 اقپان كۇنى بولاتحان تايجاننىڭ 75 جىلدىعىنا ارنالعان تەننيستەن قالالىق جارىس ءوتتى. «گوركيي تەننيس پارك» كلۋبىندا وتكەن جارىسقا الماتى قالاسىنان جانە وزگە دە ايماقتاردان كەلگەن ەڭ ۇزدىك 47 سپورتشى قاتىسىپ، جارىس سوڭىندا جەڭىمپازدار تۋرنير كۋبوگى جانە ءار ورىنعا ساي 50-30-20 مىڭ تەڭگەدەن قارجىلاي سىيلىق الدى. فينالعا شىققاندار مەن جۇلدەگەرلەرگە ماقتاۋ قاعازىنان تىس «بولاتحان تايجان اتىنداعى قور» باسىپ شىعارعان كىتاپتار ۇلەستىرىلدى. سونىمەن بىرگە بۇل جارىستىڭ قورىتىندىسى بويىنشا ەڭ ۇزدىك تەننيسشىلەردىڭ رەسمي رەيتينگى جاسالدى. جارىستى اسقار بەكبايەۆ پەن مۇحتار تايجان ۇيىمداستىرىپ، مارات بايمۇحامەتوۆ باس تورەشى بولدى.
جارىس الدىندا ءسوز العان بولاتحان تايجاننىڭ جارى ايسۇلۋ تايجان بوكس پەن تەننيس – بولاتحان تايجاننىڭ ەڭ سۇيىكتى سپورت تۇرلەرىنىڭ ءبىرى بولعانىن ايتا كەلىپ، سپورتشىلارعا جاقسى ونەر كورسەتۋىنە تىلەكتەستىگىن ءبىلدىردى. ال «بولاتحان تايجان اتىنداعى قوردىڭ» پرەزيدەنتى، قوعام قايراتكەرى مۇحتار تايجان بۇل جارىس تەك ءوز اكەسىنە عانا ارنالماعانىن، بۇكىل اكەلەرگە ارنالىپ وتىرعانىن ەسكەرتە كەتتى. سونىمەن بىرگە قوعام قايراتكەرلەرى مەن ۇلت جاناشىرلارىنىڭ ەسكە الۋ شارالارىن دوڭگەلەك ۇستەل دەڭگەيىندە عانا ەمەس، حالىقتىڭ كوڭىلى مەن رۋحىن كوتەرەتىن سپورتتىق شارالاردى وتكىزۋ، ولاردى دارىپتەۋ مەن ناسيحاتتاۋدىڭ اناعۇرلىم اسەرلى ەكەنىن ايتىپ ءوتتى. سوندىقتان دا، ۇلت جاناشىرىنىڭ 75 جىلدىعىن وتكىزەردە حالىقتى بەلسەندى ومىرگە جەتەلەيتىن شارالار ۇيىمداستىردىق دەدى.
مۇحتار تايجان بۇعان دەيىن بولاتحان تايجاننىڭ 75 جىلدىعىنا ارناپ وتكىزىلەتىن ءىس-شارالار تۋرالى ءوزىنىڭ فەيسبۋكتاعى پاراقشاسىندا جازعان بولاتىن. الداعى ۋاقىتتا بولاتىن سول ءىس-شارالاردى تاعى ءبىر نازارلارىڭىزعا سالىپ كەتكەندى ءجون كوردىك.
- 28.02.2016 جىل، جەكسەنبى، ساعات 9.00 – بولاتحان تايجانعا ارنالعان الماتى قالالىق شاحماتتان اۋەسقوي جارىس. وتەتىن ورنى: «دەبيۋت» شاحمات كلۋبى.
- 04.03.2016 جىل، جۇما، ساعات 11.00 –بولاتحان تايجانعا ارنالعان ۇلكەن دوڭگەلەك ۇستەل وتپەك. وتەتىن ورنى: ۇلتتىق كىتاپحانا.
- 08.03.2016 جىل – بولاتحان تايجان جانە مۇحتار تايجان تۋرالى «اكە جولى» اتالاتىن جاڭا دەرەكتى ءفيلمنىڭ تۇساۋكەسەرى.
بولاتحان تايجاننىڭ 75 جىلدىق مەرەيتويىن وتكىزۋ – تەك ۇلى مۇحتار تايجاننىڭ عانا موينىنداعى جۇمىس ەمەس. تىرشىلىگىندە حالقىنا، مەملەكەتىنە ادال قىزمەت اتقارىپ، حالىقتىڭ سۇيىكتىسى بولعان ۇلت جاناشىرى مەرەيتويىنىڭ ءوز دەڭگەيىندە وتۋىنە اتسالىسۋ ءبارىمىزدىڭ دە ازاماتتىق بورىشىمىز بولىپ سانالاتىنىن ۇمىتپايىق.
ەستەرىڭىزگە سالا كەتسەم، وسى اپتادا شاحماتتان وتەتىن جارىسقا قاتىسۋ ءۇشىن تىركەۋ جالعاسىپ جاتىر. الماتى قالاسى، 291-64-11 تەلەفون نومەرىنە قوڭىراۋ شالىپ، تىركەلە الاسىزدار. جارىس شۆەيساريا 15-مينۋتتىق ادىسپەن وتەدى. جەڭىمپازدار: 1ء-شى ورىن – 50 مىڭ تەڭگە، 2ء-شى ورىن – 30 مىڭ تەڭگە، 3ء-شى ورىن – 20 مىڭ تەڭگەمەن جانە كىتاپتارمەن ماراپاتتالادى. بارلىقتارىڭىزدى جەكسەنبى كۇنى ش.ءۋاليحانوۆ كوشەسىنىڭ قيىلىسىنداعى قابانباي باتىر كوشەسى، 71-ۇيدە ورنالاسقان «دەبيۋت» شاحمات كلۋبىندا كۇتەمىز.
تۇردىبەك قۇرمەتحان
