Josparǵa sáıkes ótken jeksenbide – 21 aqpan kúni Bolathan Taıjannyń 75 jyldyǵyna arnalǵan tenısten qalalyq jarys ótti. «Gorkıı tenıs park» klýbynda ótken jarysqa Almaty qalasynan jáne ózge de aımaqtardan kelgen eń úzdik 47 sportshy qatysyp, jarys sońynda jeńimpazdar týrnır Kýbogy jáne ár orynǵa saı 50-30-20 myń teńgeden qarjylaı syılyq aldy. Fınalǵa shyqqandar men júldegerlerge maqtaý qaǵazynan tys «Bolathan Taıjan atyndaǵy qor» basyp shyǵarǵan kitaptar úlestirildi. Sonymen birge bul jarystyń qorytyndysy boıynsha eń úzdik tenısshilerdiń resmı reıtıńi jasaldy. Jarysty Asqar Bekbaev pen Muhtar Taıjan uıymdastyryp, Marat Baımuhametov bas tóreshi boldy.
Jarys aldynda sóz alǵan Bolathan Taıjannyń jary Aısulý Taıjan boks pen tenıs – Bolathan Taıjannyń eń súıikti sport túrleriniń biri bolǵanyn aıta kelip, sportshylarǵa jaqsy óner kórsetýine tilektestigin bildirdi. Al «Bolathan Taıjan atyndaǵy qordyń» prezıdenti, qoǵam qaıratkeri Muhtar Taıjan bul jarys tek óz ákesine ǵana arnalmaǵanyn, búkil ákelerge arnalyp otyrǵanyn eskerte ketti. Sonymen birge qoǵam qaıratkerleri men ult janashyrlarynyń eske alý sharalaryn dóńgelek ústel deńgeıinde ǵana emes, halyqtyń kóńili men rýhyn kóteretin sporttyq sharalardy ótkizý, olardy dáripteý men nasıhattaýdyń anaǵurlym áserli ekenin aıtyp ótti. Sondyqtan da, ult janashyrynyń 75 jyldyǵyn ótkizerde halyqty belsendi ómirge jeteleıtin sharalar uıymdastyrdyq dedi.
Muhtar Taıjan buǵan deıin Bolathan Taıjannyń 75 jyldyǵyna arnap ótkiziletin is-sharalar týraly óziniń feısbýktaǵy paraqshasynda jazǵan bolatyn. Aldaǵy ýaqytta bolatyn sol is-sharalardy taǵy bir nazarlaryńyzǵa salyp ketkendi jón kórdik.
- 28.02.2016 jyl, jeksenbi, saǵat 9.00 – Bolathan Taıjanǵa arnalǵan Almaty qalalyq shahmattan áýesqoı jarys. Ótetin orny: «Debút» shahmat klýby.
- 04.03.2016 jyl, juma, saǵat 11.00 –Bolathan Taıjanǵa arnalǵan úlken dóńgelek ústel ótpek. Ótetin orny: Ulttyq kitaphana.
- 08.03.2016 jyl – Bolathan Taıjan jáne Muhtar Taıjan týraly «Áke joly» atalatyn jańa derekti fılmniń tusaýkeseri.
Bolathan Taıjannyń 75 jyldyq mereıtoıyn ótkizý – tek uly Muhtar Taıjannyń ǵana moınyndaǵy jumys emes. Tirshiliginde halqyna, memleketine adal qyzmet atqaryp, halyqtyń súıiktisi bolǵan ult janashyry mereıtoıynyń óz deńgeıinde ótýine atsalysý bárimizdiń de azamattyq boryshymyz bolyp sanalatynyn umytpaıyq.
Esterińizge sala ketsem, osy aptada shahmattan ótetin jarysqa qatysý úshin tirkeý jalǵasyp jatyr. Almaty qalasy, 291-64-11 telefon nómerine qońyraý shalyp, tirkele alasyzdar. Jarys Shveısarıa 15-mınýttyq ádispen ótedi. Jeńimpazdar: 1-shi oryn – 50 myń teńge, 2-shi oryn – 30 myń teńge, 3-shi oryn – 20 myń teńgemen jáne kitaptarmen marapattalady. Barlyqtaryńyzdy jeksenbi kúni Sh.Ýálıhanov kóshesiniń qıylysyndaǵy Qabanbaı batyr kóshesi, 71-úıde ornalasqan «Debút» shahmat klýbynda kútemiz.
Turdybek Qurmethan
