فەدوروۆكا اۋىلىنىڭ مادەنيەت ۇيىندە وتكەن كەزدەسۋدە قاشىر اۋدانىنىڭ اكىمى شۇعايەۆ جانات العاشقى بولىپ ءسوز كەزەگىن الدى. ول كەلەسى جىلى بايقونىس اۋىلىندا اس تۇزى وندىرىلەتىنى تۋرالى حابارلادى. قازىرگى كەزدە 2016-2017 جىلدارى بۇل جوباعا 375 ميلليون تەڭگە قۇيۋعا ءازىر ينۆەستور بار. ول اس تۇزىن وندىرۋگە قاجەتتى قۇنى 75 ميلليون تەڭگە تۇراتىن قۇرال-جابدىقتار ساتىپ الۋدى باستاپ كەتتى.
– جەر قويناۋىن پايدالانۋ بويىنشا كەلىسىمشارت جاساۋ جۇمىستارى 24 ايدىڭ ىشىندە جۇرگىزىلۋى ءتيىس. الايدا، ينۆەستور بۇل جۇمىستى 12 ايدىڭ ىشىندە اياقتاۋدى جوسپارلاپ وتىر، – دەدى اۋدان باسشىسى. – جوبانىڭ بولاشاعى بار. 2017 جىلى ينۆەستور تۇز ءوندىرۋدى باستايدى دەپ ويلايمىن». بولات باقاۋوۆ ءار تىرەك اۋىلدا اۋىل قۇرۋشى كاسىپورىن بولۋى كەرەك ەكەندىگىن اتاپ ءوتتى. «ارينە، ءبىز تىرەك ەلدى مەكەندەردى دامىتۋعا بيۋدجەتتەن قارجى ءبولىپ، ولاردىڭ ينفراقۇرىلىمىن جاقسارتۋمەن اينالىسامىز. ءبىراق، بۇل شارالار نەگىزگى جۇمىستىڭ تەك 10 پايىزىن عانا قۇرايدى. ەڭ باستىسى – ءار تىرەك اۋىلدا تۇرعىنداردى جۇمىسپەن قامتىپ، بيۋدجەتكە سالىق تولەۋگە قاۋقارلى كاسىپورىن بولۋى كەرەك، – دەدى.
جيىن بارىسىندا وبلىس اكىمى جەرگىلىكتى اتقارۋشى ورگاندار تىرەك اۋىلداردى دامىتۋ جۇمىسىنا سەلقوس قارايتىنىن اتاپ ءوتتى. ماسەلەن، جەلەزين اۋدانىنداعى باشماچنوە اۋىلىندا جەر استى سۋلارىن ىزدەۋ جۇمىستارى تىم كەش باستالعان. «700 ادام ءومىر سۇرەتىن باشماچنوە اۋىلىن سۋمەن قامتۋدى كەيىنگە قالدىرىپ، كرۋپسكوە اۋىلى سياقتى 200 ادام تۇراتىن كىشكەنتاي اۋىلداردا سۋ ىزدەۋ جۇمىستارىن جۇرگىزگەندەرىڭىزگە جول بولسىن، – دەدى بولات باقاۋوۆ. – اۋدان اكىمى دە، اۋىل اكىمى دە ءبىرىنشى كۇن جۇمىس ىستەپ وتىرعان جوق، ماسەلەنىڭ ءمان-جايىن بىلۋلەرى كەرەك». سونىمەن قاتار، ايماق باسشىسى اۋدان اكىمدەرىنە جولداردى قاردان دەر كەزىندە تازالاپ، بوس تۇرعان جەرلەردى اۋىل شارۋاشىلىق اينالىمىنا ەنگىزۋ جونىندە تاپسىرما بەردى.
