ەڭبەك جانە حالىقتى الەۋمەتتىك قورعاۋ مينيسترلىگى بولاشاقتا تانىمال بولاتىن ماماندىقتار تۋرالى ايتتى، دەپ حابارلايدى Dalanews.kz.
مينيسترلىك قازاقستاندا شامامەن 2،2 ميلليون جۇمىس ورنىن تەحنولوگيالار مەن جاساندى ينتەللەكت الماستىرۋى مۇمكىن.
قازىردەن باستاپ قاي سالانى مەڭگەرۋ كەرەك؟
- جاساندى ينتەللەكت سالاسىنداعى ازىرلەۋ جانە ينجينيرينگ
- دەرەكتەردى تالداۋ
- كيبەرقاۋىپسىزدىك
- جاڭارتىلاتىن ەنەرگەتيكا
- "جاسىل" تەحنولوگيالار مەن ورنىقتى دامۋ
- HR جانە كادرلاردى باسقارۋ
- وقىتۋ، تالىمگەرلىك، ترەنينگ
- پسيحولوگيا جانە كەڭەس بەرۋ
Microsoft زەرتتەۋىنە سايكەس، جويىلۋ ءقاۋپى تونگەن ماماندىقتار قاتارىندا اۋدارماشىلار، جازۋشىلار، تەلەفون وپەراتورلارى، راديو جۇرگىزۋشىلەر، ساياساتتانۋشىلار، ماتەماتيكتەر جانە ءتىپتى حوستەس قىزمەتى دە بار.
قاي ماماندىقتار "جويىلادى"؟
ەڭبەك مينيسترلىگىنىڭ مالىمەتىنشە، ولار تالداۋ جۇرگىزىپ، وسال جانە بولاشاعى بار نەگىزگى ماماندىق توپتارىن انىقتاعان. ءقاۋىپ ايماعىنا "اقپاراتتى وڭدەۋ، قۇجات اينالىمى جانە قاراپايىم وپەراسيالىق مىندەتتەرگە" بايلانىستى كاسىپتەر كىرگەن.
"بۇل ساناتقا اكىمشىلىك جانە كەڭسە قىزمەتتەرى جاتادى: حاتشىلار، كومەكشىلەر، وپەراتورلار، ءىس جۇرگىزۋشىلەر، بۋحگالتەرلىك جانە ەسەپ قىزمەتكەرلەرى. ءدال وسى ماماندىقتاردىڭ مىندەتتەرى اۆتوماتتاندىرۋعا كوبىرەك ۇشىرايدى، ويتكەنى ولاردىڭ فۋنكسيالارىنىڭ باسىم بولىگى جاساندى ينتەللەكت پەن سيفرلىق شەشىمدەر ارقىلى ورىندالا الادى"، – دەدى مينيسترلىك Tengrinews.kz رەداكسياسىنىڭ رەسمي ساۋالىنا جاۋاپتا.
ءقاۋىپ تونگەن ماماندىقتار
بولاشاقتا قايتالاناتىن جۇمىستى اتقاراتىن ماماندىقتار دا جوعالۋى مۇمكىن:
- كونۆەيەر مەن قۇراستىرۋ جەلىسىندەگى جۇمىسشىلار – ءوندىرىستىڭ روبوتتاندىرىلۋىنا بايلانىستى؛
- جەڭىل جانە جۇك كولىكتەرىنىڭ جۇرگىزۋشىلەرى – جۇرگىزۋشىسىز كولىكتەردىڭ پايدا بولۋىنا بايلانىستى؛
- كاسسيرلەر – وزىنە-وزى قىزمەت كورسەتۋ كاسسالارى مەن اۆتوماتتاندىرىلعان جۇيەلەردىڭ ەنگىزىلۋىنە بايلانىستى؛
- كولل-ورتالىق وپەراتورلارى – ولاردى جاساندى ينتەللەكت پەن چات-بوتتار الماستىرۋى مۇمكىن؛
- تراكتورشىلار مەن كومباين جۇرگىزۋشىلەرى – اۋىل شارۋاشىلىعىندا اۆتوماتتاندىرىلعان تەحنيكانىڭ ەنگىزىلۋىنە بايلانىستى.
مينيسترلىك سيفرلاندىرۋ، كليماتتىڭ وزگەرۋى جانە دەموگرافيالىق جاعداي دا قاتارلاس سالالارعا اسەر ەتۋى مۇمكىن ەكەنىن اتاپ وتكەن.
