ون كۇن بويى الماتىلىق جاسوسپىرىمدەر اسەم شاتقالدا دەمالىپ قانا قويماي، كوشباسشىلىق نەگىزدەرىن ۇيرەنىپ، وزدەرىنىڭ الەۋەتتەرىن ارتتىردى. ولارعا بەلگىلى پسيحولوگ، تەاتر اكتەرلەرى، رەجيسسەر، فوتوگراف جانە ديزاينەرلەر قاتارىنان قۇرالعان تاجىريبەلى ترەنەرلەر مەن تاربيەشىلەر كومەكتەستى. تالىمگەرلەردىڭ وسىنداي ءارالۋان قۇرامى اۋىسىم قاتىسۋشىلارىنا تۇلعالىق ۇيلەسىمدىلىگىنە ءتيىمدى اسەر ەتەتىن ءبىلىم مەن ماشىقتار الۋعا سەپتىگىن تيگىزدى.
«ءبىلىم – ورتا ازيا» ءبىلىم بەرۋ ورتالىعىنىڭ باسشىسى لاريسا گوربۋنوۆا:
«بيىل لاگەردە ءبىز ىشكى جاندۇنيەنى تانۋعا، شىعارماشىلىق الەۋەتتى دامىتۋعا، قۇربى-قۇرداستارمەن قارىم-قاتىناس قۇرۋ داعدىلارىن جاقسارتۋعا باسا نازار اۋداردىق. بۇل مەكتەپ وقۋشىلارىنا كاسىبي باعدار بەرۋدە وتە ماڭىزدى. ءتيىمدى وقىتۋ قاعيداسىن بىرنەشە جىل بويى ىسكە اسىرىپ كەلەمىز»، – دەيدى.
اۋىسىم باعدارلاماسىنىڭ «وقۋدان تىس» بولىگى وتە قىزىقتى جانە تانىمدى ساباقتاردان تۇردى. كەز كەلگەن لاگەر ءۇشىن ءداستۇرلى بولعان ويىندارمەن، ۇيىرمەلەرمەن، سپورتتىق جارىستارمەن قاتار جاسوسپىرىمدەر سەناريي جازۋدى، ءوز سپەكتاكلدەرىن قويۋدى ۇيرەندى، ارت-جوبالاردى قۇرۋ نەگىزدەرىمەن تانىستى، ويىن جانە تەاتر تەحنيكالارىن ۇيرەندى. قاتىسۋشىلار كوماندالارى تاڭداعان وزدەرى ءۇشىن ماڭىزدى تاقىرىپتا «ءبارى قولىڭنان كەلەدى، ەڭ باستىسى سونى قالاۋ!» دەگەن ۇرانمەن بەينەباياندار ويلاستىرىپ ءتۇسىرۋ مۇمكىندىگىنە يە بولدى.
جوبا اياسىندا تالانتتى وقۋشىلار كورەرمەندەرگە دوستىق، ماماندىق تاڭداۋ، ءوز ويىڭدى جەتكىزۋ سىندى تاقىرىپتارعا تۇسىرگەن بەينە روليكتەرىن ۇسىندى.
سونىمەن قاتار سەنارييىن وزدەرى جازعان تاقىرىپتىق سپەكتاكلدەرىن قويدى. وقۋشىلاردىڭ ويلاۋ قابىلەتى مەن جىلدام شەشىم قابىلداۋىنا باعىتتالعان جوبا ءالى دە جالعاسادى. جوباعا قاتىسقان ءاربىر وقۋشى ۇيىمداستىرۋشىلار تاراپىنان بەرىلگەن ديپلومدارمەن ماراپاتتالدى.
