سالتاناتتىڭ اعاسى ايتبەك امانگەلدى نۇكەنوۆا مەن بيشىمبايەۆ قالاي تانىسقانىن ايتىپ بەردى، - دەپ حابارلايدى Dalanews.kz.

ايتبەك امانگەلدى ونىڭ جالعىز قارىنداسى ەكەنىن، ەكەۋى بىرگە وسكەنىن ايتتى. 

"سوندىقتان وتە جاقسى ارالاساتىنبىز، ارامىزدا ەشقانداي سىر بولمايتىن. 2022 جىلدىڭ تامىزىندا ول ماعان كوڭىل ءبولىپ جۇرگەن ءبىر جىگىت پايدا بولعانىن ايتتى. ول (بيشىمبايەۆ) سالتاناتتان كەڭەس الۋعا جازىلۋعا بىرنەشە رەت تىرىسقان. سالتانات استرولوگيا بويىنشا ەر ادامدارعا كەڭەس بەرمەيتىن. سوندىقتان قابىلداۋدان باس تارتقان. ءتىپتى ءبىر ايەل قابىلداۋعا جازىلىپ، ارتىنان قۋاندىق كەلگەن كەز دە بولعان. ياعني ۇزاق ۋاقىت بويى كەزدەسە الماي جۇرگەن. ارتىنان قۋاندىق سالتاناتتىڭ ءنومىرىن تاۋىپ الىپ، جازا باستاعان. سالتانات ونى دا ماعان كورسەتتى. حاتتا قۋاندىق "سالتانات، مەن تۋرالى اسىعىس شەشىم قابىلداماڭىز. تانىسايىق، سويلەسەيىك. مەن تۋرالى جازىلعان نارسەلەرگە سەنبەڭىز. ءوزىڭىز ويلانىپ، مەنى قابىلداۋىڭىزعا جازىڭىز" دەپ جازعان"، - دەيدى ايتبەك امانگەلدى.

سالتاناتتىڭ اعاسى بارىنەن حاباردار بولىپ وتىرعانىمەن بيشىمبايەۆتىڭ ارەكەتتەرىنە اسا ءمان بەرمەگەن.

"كەيىننەن سالتانات قۋاندىقتى اقىرى قابىلداۋىنا جازعانىن ءبىلدىم. سەبەبى قۋاندىق ۇزاق ۋاقىت بويى ءوتىنىش جاساعان. جالپى سالتانات ونى بولاشاق جارى رەتىندە قاراستىرماعان. كەيىننەن 2022 جىلى 29 قىركۇيەكتە بيشىمبايەۆ سالتاناتتى كونستانتين مەلادزەنىڭ كونسەرتىنە شاقىرعان. ءبىزدىڭ انامىزدى دا شاقىرعان. ءبىراق انامىز بارمادى. سالتانات قۇربىسى ايدامەن باردى"، - دەيدى سالتاناتتىڭ اعاسى. 

ارتىنشا قازان ايىندا سالتانات باكۋدەگى قۇربىسىنا بارعان. اعاسىنىڭ سوزىنشە، ول باكۋدە قۋاندىق بيشىمبايەۆپەن بىرگە بارعان.

"سالتانات بيشىمبايەۆ ونىڭ تالعامىنداعى جىگىت ەمەس ەكەنىن، ورتاق اڭگىمەلەرى جوعىن، ءتىپتى استرولوگيا بويىنشا دا سايكەس كەلمەيتىندەرىن ايتقان بولاتىن. ءبىراق باكۋدەگى ساپاردان كەيىن سالتاناتتىڭ قۋاندىق تۋرالى ويى وزگەردى. قازاننىڭ سوڭىندا قۋاندىق سالتاناتقا ۇيلەنۋگە ۇسىنىس جاساعانىن ەستىدىم. ونىڭ ينستاگرام ارقىلى ءبىلدىم. سالتانات اتا-انامىزبەن سويلەسىپ، قۋاندىقتى جاقتادى"، - دەيدى ايتبەك امانگەلدى.