قازاقستاندىق بلوگەرلەرگە قاتىستى سالىقتىق تەكسەرۋلەردىڭ نە سەبەپتى باستالعانىن مەملەكەتتىك كىرىستەر كوميتەتى (مكك) ءتۇسىندىردى.مكك جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باسشىسى دينا قۇسايىنوۆانىڭ TengriTV YouTube ارناسىنا بەرگەن سۇحباتىندا ايتۋىنشا، سالىق ورگاندارىنا قازاقستاندىقتاردان بىرنەشە شاعىم تۇسكەن، - دەپ حابارلايدى Dalanews.kz.
«بۇل جۇمىستى كوپتەگەن ازاماتتاردىڭ شاعىمدارى نەگىزىندە باستادىق. بىزگە ازاماتتاردان بلوگەرلەردىڭ ءسان-سالتاناتقا تولى ءومىر سۇرەتىنى، الايدا سالىق تولەمەيتىنى تۋرالى وتىنىشتەر كەلىپ ءتۇستى. «ولاردى تەكسەرىڭىزدەر، ولار قىمبات كولىكتەردە جۇرەدى، ەليتالىق پاتەرلەردە تۇرادى، ءزاۋلىم ۇيلەر ساتىپ الادى» دەگەن سۇراقتار تۋىندادى. ارينە، حالىق ولاردىڭ قانشا سالىق تولەيتىنىن بىلگىسى كەلەدى»، – دەدى دينا قۇسايىنوۆا.
ونىڭ ايتۋىنشا، بلوگەرلەرگە سالىقتىق حابارلامالار 2025 جىلدىڭ اقپانىندا جىبەرىلگەن جانە ول 2022-2023 جىلدارعا جۇرگىزىلگەن تالداۋعا نەگىزدەلگەن.
«ول ۋاقىتتا بلوگەرلەر تابىس تاۋىپ وتىردى. كەيبىرەۋلەرى سالىق دەكلاراسياسىن تاپسىرسا، كەيبىرەۋلەرى مۇلدە تاپسىرماعان. ال كەيبىر بلوگەرلەر كىرىستەرىن «ءنول» دەپ كورسەتكەن. سوندىقتان ءبىز تالداۋ جۇرگىزىپ، سايكەسسىزدىكتەردى انىقتادىق»، – دەپ ءتۇسىندىردى مكك وكىلى.
كوپتەگەن بلوگەرلەر جيناعان قاراجاتتارىنىڭ قايىرىمدىلىققا، تۋعان كۇندەرگە نەمەسە جاقىندارىنا اۋدارىلعانىن العا تارتقان. بۇل ماسەلە بويىنشا دينا قۇسايىنوۆا ناقتى تۇسىنىكتەمە بەردى.
«قايىرىمدىلىق تۋرالى زاڭ بار. قايىرىمدىلىق كومەك رەتىندە الىنعان قاراجات تۋرالى ۋاكىلەتتى ورگاندارعا ەسەپ بەرۋ كەرەك. قاشان، كىمنەن، قانداي سوما الىنعانى كورسەتىلۋى ءتيىس. ەگەر وسىنداي ەسەپتەر ۇسىنىلسا، ولار مىندەتتى تۇردە ەسكەرىلەدى.
سونىمەن قاتار، باسقا دا كىرىس تۇرلەرى بار. «قايىرىمدىلىق كومەك»، «دەمەۋشىلىك كومەك» دەگەن ۇعىمدار بار. مۇنىڭ ءبارى دە كىرىس رەتىندە قارالىپ، سالىق كودەكسىنە سايكەس رەتتەلۋى ءتيىس. ەگەر بۇل بۇرىن جاسالماسا، بلوگەرلەر قوسىمشا سالىق دەكلاراسياسىن تاپسىرىپ، بارلىق كىرىستەرىن كورسەتۋىنە بولادى. ولاردىڭ حابارلاماعا جاۋاپ بەرۋىنە 30 جۇمىس كۇنى، ياعني شامامەن 1،5 اي ۋاقىتى بار»*، – دەپ ءتۇسىندىردى باسقارما باسشىسى.
قازاقستاندىق بلوگەرلەردىڭ كەيبىرى بۇل سالىقتىق تەكسەرۋلەردى «كورسەتىلگەن قىسىم» دەپ اتاعان ەدى. بۇعان جاۋاپ رەتىندە دينا قۇسايىنوۆا تەكسەرۋلەردىڭ ماقساتى جازالاۋ ەمەس، مەملەكەتتىك بيۋدجەتتى تولىقتىرۋ ەكەنىن اتاپ ءوتتى.
«بۇل ءسوز تىم ورەسكەل ەستىلەدى. جالپى، ءبىزدىڭ باستى مىندەتىمىز – مەملەكەتتىك بيۋدجەتكە تۇسەتىن كىرىستى ارتتىرۋ جانە بارلىق جەكە تۇلعالاردىڭ سالىق تولەۋىن قامتاماسىز ەتۋ. ءبىز ءۇشىن ادام بلوگەر مە، جۋرناليست پە، كاسىپكەر مە – ماڭىزدى ەمەس. بارلىعى زاڭعا سايكەس سالىق تولەۋگە مىندەتتى»، – دەپ اتاپ ءوتتى ول.
سونىمەن قاتار، ول بۇل تەكسەرۋلەر «جوعارىدان تۇسكەن تاپسىرما» دەگەن پىكىرلەرگە جاۋاپ بەردى.
«حابارلامالار تەك اقپاندا عانا جىبەرىلگەن جوق. بۇعان دەيىن دە وسىنداي ەسكەرتۋلەر بولعان. كەيبىر بلوگەرلەر ءۇنسىز قوسىمشا دەكلاراسيا تاپسىردى جانە سالىقتارىن تولەدى. ال كەيبىرەۋلەرى الەۋمەتتىك جەلىدە بۇل پروسەستى دۇرىس ەمەس دەپ ەسەپتەيتىنىن ايتىپ جاتىر. ەگەر ءبىر نارسەگە كەلىسپەسە، بىزگە دالەلدەرىمەن بىرگە تۇسىنىكتەمە ۇسىنسىن. بارلىق كىرىستەرىن ناقتىلاپ، سالىق ورگانىنا قاجەتتى اقپارات بەرسىن.
ءتىپتى، بىزدە كەيبىر بلوگەرلەر كىرىستەرىن ارتىق كورسەتىپ، ارتىق سالىق تولەگەن جاعدايلار دا كەزدەستى. ياعني، زاڭدى قاتاڭ ساقتاپ، سالىقتارىن ۋاقتىلى تولەپ وتىرعان جاۋاپتى بلوگەرلەر دە بار»، – دەدى دينا قۇسايىنوۆا.
