بجزق-داعى زەينەتاقى اكتيۆتەرىنىڭ ينۆەستيسيالىق كىرىستىلىك كورسەتكىشى وسىمەن ءۇشىنشى اي تەرىس ءماندى كورسەتىپ وتىر. 2025 جىلدىڭ ءۇش ايىندا بجزق-داعى زەينەتاقى اكتيۆتەرىنىڭ كىرىستىلىك دەڭگەيى مينۋس 1،97%-دى (ءبىر اي بۇرىن: -1،64%) قۇرادى، دەپ حابارلايدى Dalanews.kz قور دەرەگىنە سىلتەمە جاساي وتىرىپ.
وسى كەزەڭگە بەلگىلەنگەن جۇمىس بەرۋشىنىڭ مىندەتتى زەينەتاقى جارنالارى بويىنشا كىرىستىلىك تە تەرىس مانگە يە (-7،73%). بۇل رەتتە قاڭتار-ناۋرىز ايلارىندا ينفلياسيا كورسەتكىشى 3،9% -دى قۇرادى.
2025 جىلدىڭ ەكى ايىندا بجزق سالىمشىلارى 370،56 ملرد تەڭگە جوعالتتى. نەگىزىنەن، قور الداعى ەكى ايداعى تەرىس ءماندى دوللار سىندى شەتەل ۆاليۋتاسىنداعى اكتيۆتەر قۇنىنىڭ ءسال تومەندەۋىنە بايلانىستى تۋىنداعانىن، ونىڭ ۋاقىتشا قۇبىلىس ەكەنىن ايتقان ەدى. قور بۇل رەتتە كەم دەگەندە ءبىر جىل كەزەڭىندەگى ينۆەستيسيالىق كىرىستىڭ مولشەرىنە باسا ءمان بەرۋگە شاقىرىپ، اپتا سايىنعى جانە ايلار بويىنشا دەرەكتەر نارىقتاعى جاعدايلارعا بايلانىستى وزگەرىپ وتىراتىنىن ەسكەرتكەن.
سوڭعى 12 ايدا، ياعني 2024 جىلعى ناۋرىزدان 2025 جىلعى اقپان ارالىعىنداعى ينۆەستيسيالىق كىرىس مولشەرى شامامەن 2،7 ترلن تەڭگەنى قۇرادى.
بۇعان دەيىن سايتىمىزدا "زەينەتاقى سالىمشىلارى جىل باسىنان بەرى 370،6 ملرد تەڭگەسىن جوعالتتى. بجزق مەن ۇلتتىق بانك نە دەيدى؟" دەگەن ماقالا جاريالانعان بولاتىن. سوناي-اق قاڭتاردا بجزق شىعىنعا ۇشىراپ، قازاقستاندىقتاردىڭ شوتىنداعى اقشا كۇرت ازايعانى حابارلانعان.
