"بىرىنشىدەن، فرانسيامەن ويىنداعى ساتسىزدىك ءۇشىن وتاندىق جانكۇيەرلەردەن كەشىرىم سۇرايمىن. ءبىز ءاربىر جەڭىلىستى اۋىر قابىلدايمىز. تاعى ءبىر ايتارىم، نەگىزگى قۇرامداعى ويىنشىلاردىڭ كوپشىلىگى جاراقاتىنا بايلانىستى پاريجدە ويناي المادى. بۇگىنگى تاڭدا بىزدە ۇلتتىق قۇرامانىڭ رەزەرۆى جوق ەكەنىن ايتا كەتكەن ءجون. كوماندا كوشباسشىلارىن اۋىستىرعان ويىنشىلار حالىقارالىق دەڭگەيدە ويناۋعا ءالى دايىن ەمەس.
قوعامدا ايتىلىپ جاتقان سىنعا كەلەتىن بولساق، مەن اشىق ايتايىن: وسى جانە وتكەن جىلدارى قازاقستان فۋتبول فەدەراسياسىنا مەملەكەت بيۋدجەتىنەن 200 ميلليون تەڭگە ءبولىنىپ، ول ءتۇرلى جاستاعى (U17، U19، U21)، Blind-Football (زاعيپ جاندارعا ارنالعان فۋتبول)، ايەلدەر، جاعاجاي جانە فۋتزال كوماندالارىنىڭ وقۋ-جاتتىعۋ جيىندارىن ۇيىمداستىرۋعا جانە جارىسقا قاتىسۋى ءۇشىن جۇمسالدى.
قانداي ميللياردتار تۋرالى ايتىپ وتىرعانىن تۇسىنبەدىم؟
كەلەسى جىلدان باستاپ قازاقستان فۋتبول فەدەراسياسى مەملەكەتتىك قۇرىلىمدار تاراپىنان جاسالاتىن قارجىلاندىرۋدان باس تارتۋ تۋرالى شەشىم قابىلدادى. ۇيىم ۋەفا-دان تۇسكەن قاراجات ەسەبىنەن، سونداي-اق دەمەۋشىلەردەن اقشا تارتۋ ارقىلى قارجىلاندىرىلادى.
سوندىقتان ۇلتتىق قۇرامانىڭ ساتسىزدىگىنەن كەيىن ءوزىن جارنامالاعىسى كەلەتىن سىنشىلارعا ايتارىم: تىم بولماسا ماسەلەنى تەرەڭىنەن ءتۇسىنىپ كورىڭىز، بوس ءسوز ايتپاس بۇرىن ماتەريالدى زەرتتەڭىز.
ءبىزدىڭ ەلدە فۋتبول ءارقاشان بولعان جانە ءارى قاراي دا بولا بەرەدى. بۇل ميلليونداعان ادامدار قىزىعاتىن ءنومىرى ءبىرىنشى سپورت ءتۇرى. ارينە، ونى جاڭا دەڭگەيگە كوتەرۋ ءۇشىن ۋاقىت پەن فۋتبولعا بەي-جاي قارامايتىنداردىڭ قولداۋى قاجەت. ۇلتتىق قۇراما جەڭىسكە جەتكەندە، كەشەگى تاققان ايىپتارىڭدى ۇمىتىپ، ۇنەمى قولدادىم دەيسىڭ. سوندىقتان، جەڭىلگەن كۇندە دە، جەڭىسكە جەتكەن كەزدە دە ءارقاشان كوماندامەن بىرگە بولۋ كەرەك.
سونداي-اق الداعى ۋاقىتتا ۇلتتىق قۇرامانىڭ باس باپكەرىمەن بىرگە قوعامدى تولعاندىرىپ جۇرگەن سۇراقتارعا جاۋاپ بەرۋ ماقساتىندا جەتەكشى سپورت جۋرناليستەرىمەن كەزدەسۋ وتكىزەتىنىمىزدى ايتا كەتەيىن"، - دەگەن ءايتحوجيننىڭ ءسوزىن aladop.kz كەلتىرەدى.
