ءبىرقاتار وڭىردە قىلمىس دەڭگەيى وسكەن. بۇل تۋرالى باس پروكۋرور بەرىك اسىلوۆ مالىمدەدى، – دەپ حابارلايدى Dalanews.kz.
2025 جىلعى العاشقى 3 ايدا ەلدەگى قىلمىس دەڭگەيى 5،8%-عا (قۇقىقبۇزۋشىلىق 35 320-دان 33 279 دەيىن) تومەندەگەن.
بەرىك اسىلوۆ مىناداي باعىتتار بويىنشا قىلمىس دەڭگەيى ايتارلىقتاي تومەندەگەنىن مالىمدەدى:
- ۇرلىق 29،3%-عا؛
- بۇزاقىلىق 32،6%-عا؛
- مال ۇرلىعى 27،6%-عا؛
- ونشا اۋىر ەمەس قىلمىستار 11،9%-عا تومەندەدى.
- اسا اۋىر قىلمىستار ەكى ەسەگە ازايعان.
دەگەنمەن كەيبىر وڭىرلەردە قىلمىس دەڭگەيى وسكەن.
"شىمكەنت قالاسىندا 25،8%-عا؛ جامبىل وبلىسىندا 21%-عا؛ ۇلىتاۋ وبلىسىندا 13،6%-عا؛ اقمولا، باتىس قازاقستان جانە قوستاناي وبلىستارىندا ورتاشا دەڭگەيدە وسكەنى بايقالادى. بۇل وڭىرلەردە ۆەدومستۆوارالىق ۇيلەستىرۋدى كۇشەيتىپ، ناقتى باعىتتالعان جۇمىستى جۇرگىزۋ قاجەت"، - دەدى باس پروكۋرور.
الاياقتىق 3،9%-عا تومەندەگەن، جالپى كەلتىرىلگەن زالال 41،4 ملرد تەڭگە بولعان، بۇل بىلتىرمەن سالىستىرعاندا ەكى ەسەگە ازايعان (2024 ج. – 93،7 ملرد تگ).
"ونىڭ ىشىندە 11،7 ملرد تەڭگە وتەلدى، بۇل ءىس جۇزىندە وتكەن جىلدىڭ دەڭگەيىنە سايكەس كەلەدى. زالالدى وتەۋ بويىنشا جۇمىس كۇشەيتىلەدى"، - دەدى بەرىك اسىلوۆ.
