بۇگىن اباي وبلىسى اكىمى بەرىك ءۋاليدىڭ توراعالىعىمەن اكىمدىك وتىرىسى ءوتتى. جيىنعا وبلىستىق باسقارما باسشىلارى، اۋدان جانە قالا اكىمدەرى، وڭىرلىك دەپارتامەنت جەتەكشىلەرى قاتىستى،- دەپ حابارلايدى Dalanews.kz
وتىرىستا ءبىلىم بەرۋ نىساندارىنىڭ قۇرىلىسى جانە جوندەۋ جۇمىستارى، رەسپۋبليكالىق، وبلىستىق جانە اۋداندىق ماڭىزى بار جولدارداعى قۇرىلىس، جوندەۋ جانە كۇتىپ ۇستاۋ جۇمىستارى، مىندەتتى الەۋمەتتىك مەديسينالىق ساقتاندىرۋ جۇيەسىنىڭ وزەكتى ماسەلەلەرى قارالدى. ءبىلىم بەرۋ نىساندارىنىڭ قۇرىلىسى جانە جوندەۋ جۇمىستارى تۋرالى قۇرىلىس باسقارماسىنىڭ باسشىسى شىڭعىس رياحانوۆ پەن ءبىلىم باسقارماسى باسشىسىنىڭ مىندەتىن اتقارۋشى باۋىرجان تۋلەنوۆ باياندادى.
بيىل وبلىستا 2 جاڭا مەكتەپ پايدالانۋعا بەرىلدى. سەمەيدەگى قاراعايلى ىقشام اۋدانىندا 1200 ورىندىق، بەسقاراعاي اۋىلىندا 300 ورىندىق مەكتەپ اشىلدى. وبلىس ورتالىعىنىڭ ۆودنىي كەنتىندەگى 600 ورىندىق مەكتەپ جاڭا وقۋ جىلىندا جۇمىسىن باستايدى.
قازىرگى ۋاقىتتا وڭىردە ەكى مەكتەپتىڭ قۇرىلىسى جالعاسۋدا. اياگوز قالاسىنداعى 600 ورىندىق مەكتەپ جاڭا وقۋ جىلىندا پايدالانۋعا بەرىلەدى دەپ جوسپارلانعان. شىعىس كەنتىندەگى 300 ورىندىق مەكتەپتىڭ قۇرىلىسى ەندى باستالدى. سونىمەن قاتار، ايماقتاعى 6 مەكتەپكە قوسىمشا عيمارات سالۋ كوزدەلگەن. سەمەي قالاسىنداعى ەكى مەكتەپتەگى باستالعان جۇمىستى اياقتاۋ ءۇشىن قوسىمشا قارجى ءبولۋ قاجەتتىگى تۋىنداپ وتىر.
جيىندا وڭىردەگى ءبىلىم نىساندارىنىڭ ماتەريالدىق-تەحنيكالىق بازاسىن جاڭارتۋ جايى دا تالقىلاندى. بيىل 2،9 ملرد تەڭگەگە وبلىستاعى مەكتەپتەرگە كۇردەلى جوندەۋ جۇرگىزۋ جوسپارلانىپ وتىر. ونىڭ 1،1 ملرد تەڭگەسى «اۋىل – ەل بەسىگى» باعدارلاماسى اياسىندا قاراستىرىلعان. سەمەي قالاسى، اياگوز، بەسقاراعاي، جاڭاسەمەي، ءۇرجار اۋداندارىنداعى 12 مەكتەپتىڭ شاتىر، ەلەكتر جۇيەلەرى، ەسىك-تەرەزەلەرى اۋىستىرىلادى. بۇدان بولەك 85 مەكتەپتە اعىمداعى جوندەۋ جۇرگىزىلۋدە. وتىرىستا بۇل باعىتتاعى جۇمىستاردىڭ كەستەدەن كەشىگىپ جاتقانى ايتىلدى.
وبلىس اكىمى جيىندا قۇرىلىس جانە ءبىلىم باسقارمالارى باسشىلارىنىڭ ۇسىنعان مالىمەتتەرىنىڭ تولىق زەردەلەنبەگەنىن سىنعا الدى. ايماقتاعى مەكتەپتەردىڭ ماتەريالدىق-تەحنيكالىق جاعدايىن جاقسارتۋ بويىنشا ناقتى ەسەپ، جۇيەلى ساراپتاما جاسالماي وتىرعانىن ايتتى.
«ءبىلىم سالاسى بويىنشا الداعى ءۇش جىلدا قانشا مەكتەپ سالامىز؟ سوعان بايلانىستى نەگە ناقتى ۇسىنىس بەرمەيسىزدەر؟ وبلىستا قۇرىلىسى باستالىپ، ءتۇرلى سەبەپتەرمەن توقتاپ قالعان نىساندار بار. سول نىساندار بويىنشا دا ەشقانداي ۇسىنىس جوق. «20-دان استام مەكتەپتىڭ جوبالىق-سمەتالىق قۇجاتتاماسىن ازىرلەپ جاتىرمىز» دەيسىزدەر. ولاردىڭ قۇرىلىسىن قارجىلاندىرۋ نەگىزدەلمەگەن. ءبىز ءبىرىنشى كەزەكتە وبلىستاعى اپاتتى مەكتەپتەردىڭ ماسەلەسىن شەشۋىمىز كەرەك. سەمەيدەگى ۆودنىي كەنتى مەن اياگوزدەگى مەكتەپتەردى 1 قىركۇيەكتە ىسكە قوسۋىمىز قاجەت»، - دەدى ايماق باسشىسى.
اكىمدىك وتىرىسىندا وبلىس اكىمى سالاعا جاۋاپتى ورىنباسارى سەرىك تولەنبەرگەنوۆكە مەكتەپتەردىڭ قۇرىلىس بارىسىن قاتاڭ باقىلاۋعا الىپ، جۇمىستى ىلگەرلەتۋ ماقساتىندا «سامۇرۇق-قازىنانىڭ» وكىلدەرىمەن جۇمىس جۇرگىزۋدى، ءبىلىم باسقارماسىنا مەكتەپتەردەگى رەنوۆاسيا جانە اعىمداعى جوندەۋ جۇمىستارىن مەرزىمىندە اياقتاۋدى قامتاماسىز ەتۋدى تاپسىردى. اۋدان جانە قالا اكىمدەرىنە ءبىلىم بەرۋ نىساندارىنىڭ ماڭىندا بەي-بەرەكەت قوقىس ورىندارىنىڭ پايدا بولۋىنا جول بەرمەۋ مىندەتتەلدى. مەردىگەرلەرگە قۇرىلىس قالدىقتارىن ارنايى ورىندارعا شىعارۋ تالابى قويىلادى. بۇل تالاپ ورىندالماعان جاعدايدا ايىپپۇل سالۋ شارالارى قاراستىرىلادى.
