ۋكرايانا جەرىندە سوعىسقا تارتىلعان ءبىر توپ بۋريات ساربازدارى ماعىناسىز سوعىسقا قاتىسقىلارى كەلمەيتىنىن ايتىپ، ارىز تۇسىرگەننەن كەيىن باستارى داۋعا قالعان. ولار كومانديرلەرى ۋاقىتشا تەرگەۋ اباقتىسىنا قاماپ، ۇستەرىنەن قىلمىستىق ءىس قوزعاۋعا ارەكەتتەنىپ جاتقانىن ايتتى. 

بۇل تۋراسىنداعى اقپاراتتى بۋرياتتار مەديازون كانالىنا وزدەرى حابارلاعان. №32364 اسكەري بولىمدەگى 7 بۋريات سوعىسقا قاتىسقىسى كەلمەيتىندەرىن اشىپ ايتىپ، ارىز جازعان.

– ءبىز ءبارىمىز سوعىسقا قاتىسپايتىنىمىزدى ايتىپ ارىز جازعانىمىزبەن كومانديرلەرىمىز ءبىزدىڭ تالابىمىزعا قۇلاق اسپاي، قوقان-لوقى جاساۋدا. ۋاقىتشا تەرگەۋ يزولياتورىنا قامالعان بىزدەردى الداعى ۋاقىتتا لۋگانسك ايماعىنا تۇتقيىلدان شابۋىلدايتىن توپقا قوسىپ، ەركىمىزدەن تىس سوعىسقا اتتاندىرۋعا ارەكەتتەنۋدە، – دەپ بۋريات ساربازدار جۋرناليستەرگە مۇڭىن شاعىپتى.

وسىلايشا سوعىستىڭ الدىڭعى شەبىندە جۇرگەن بۋريات ساربازدار وزدەرىنىڭ نارازىلىقتارىن ءبىلدىرىپ جاتىر.

بۇعان دەيىن كەلسىم-شارت نەگىزىندە اسكەري بورىشىن وتەپ جاتقان بۋريات ساربازدىڭ اناسى بالاسى سوعىس كەزىندە اۋىر جارالانىپ، ميى شايقالسا دا ۇيىنە قايتارماعانىن ايتىپ شاعىمدانعان-دى.

بۇدان باسقا اڭىراعان انا بۋرتيادان اسكەري بورىشىن وتەپ جۇرگەن 77 سارباز سوعىسقا قاتىسپايتىندارىن ايتىپ، ارىز جازعانىن دا جەتكىزگەن. ولار ءوز بولىمشەلەرىندە مايدان دالاسىنا ءمىنىپ شىعاتىن بىردە ءبىر تانك قالماعاننان كەيىن وسىنداي قادامعا بارعانىن جاقىندارىنا ايتىپتى.

وسىلايشا بۋريات ساربازدار ماعاناسىز سوعىستىڭ قۇربانى بولۋدان جاپپاي باس تارتۋعا كوشكەن.