بىرىنشىدەن، جالپى وتە ءساتتى تاعايىنداۋ.
ونىڭ سەبەبى، بۇل كىسى قاراپايىم ءمۇعالىم، مەكتەپ ديرەكتورى، ءبىلىم باسقارماسى باسشىسىنان باستاپ، ءبىلىم سالاسىنداعى بارلىق لاۋازىمدا وتىرعان، ۆيسە مينيستر دە بولعان، بۇل سالادا تاجىريبەسى جەتكىلىكتى، ءبىلىمدى، تازا قازاق ءتىلدى ادام.
ەكىنشىدەن، قازىرگى رەفورما باستاۋى نازاربايەۆ زياتكەرلىك مەكتەپتەرى جۇيەسىنەن الىنعان. ال، جاڭا مينيستر - نازاربايەۆ زياتكەرلىك مەكتەپتەرىنىڭ قۇرۋشىسى، ديرەكتورلار كەڭەسىنىڭ ءتورايىمى.
سوندىقتان اسلان ءسارىنجيپوۆ باستاپ، ەرلان ساعادييەۆ بىلىقتىرىپ كەتكەن رەفورما سوڭىنا دەيىن شىعادى. رەفورما توقتايدى دەپ قۋانباڭىزدار، مۇلدە ويلاماي اق قويۋعا تولىق نەگىز بار.
ۇشىنشىدەن، اپامىز ءبىر اپتادان سوڭ 4ء-شى ناۋرىزدا 61 جاسقا تولادى. ياعني، ول كىسى زەينەتكەر. ونىڭ ۇستىنە زاڭ بويىنشا كەلەسى جىلى پرەزيدەنت سايلاۋى، پرەزيدەنت سايلاۋىنان سوڭ ۇكىمەت قايتا دوعارىسقا كەتىپ، جاڭادان جاساقتالادى. سوندىقتان، ون بەسىنشى مينيستر بۇل ورىندا ۇزاق وتىرادى دەپ ايتا المايمىن. ساعادييەۆكە دەيىنگى 13 مينيستر سەكىلدى ەڭ ۇزاعىندا ءبىر جارىم جىلدان سوڭ شىنىمەن زەينەتكە كەتەدى.
تورتىنشىدەن، ءبىلىم سالاسىنداعى سوڭعى رەفورمانىڭ، ناقتىراق ايتقاندا 2016-2021 جىلدارعا ارنالعان ءبىلىم رەفورماسىنىڭ سوڭعى ەكى جىلى عانا قالدى، ال، جاڭا مينيستر سول رەفورمانىڭ باسىندا تۇرعان ادام رەتىندە سوڭعى نۇكتەسىن قويۋعا كەلدى دەگەن ويدامىن.
جالپى ويىم وسى. تىلەيتىنىم، نازاربايەۆ زياتكەرلىك مەكتەپتەرىنىڭ باعدارلاماسى تولىق ەنەتىندىكتەن، نازاربايەۆ زياتكەرلىك مەكتەپتەرىنىڭ جابدىقتالۋى، مۇعالىمدەرىنىڭ جالاقىسى، ماتەريالدىق مۇمكىندىكتەرى تولىعىمەن بارلىق مەكتەپتەرگە جاسالسا، سوعان جاڭا مينيستر كۇش سالسا ەكەن.
سونىمەن بىرگە "پەداگوگ مارتەبەسى" تۋرالى زاڭدى تولىق، ساپالى ەتىپ بەكىتىپ كەتسە ەكەن، ەلباسى تاپسىرماسى ورتا جولدا قالمايدى دەپ سەنەمىن.
ا، ايتپاقشى، جاڭا مينيسترگە جالعىز جاقىندىعىم بار، ول كىسى دە مەن سەكىلدى حيميك نەمەسە مەن ول سەكىلدى حيميكپىن.
جاڭا مينيسترگە ساتتىلىك تىلەيمىن! ەلىمىزدىڭ ءبىلىم، عىلىم سالاسى دامي بەرسىن!
اياتجان احمەتجان ۇلىنىڭ
facebook پاراقشاسىنان
