ۆەدومستۆو ءبىلىم بەرۋ سالاسىنداعى جالاقىسى تومەن قىزمەتكەرلەردىڭ تابىسىن ۇلعايتۋ، ورتا بىلىمدە رەفورمانى ناقتى تۇردە ىسكە اسىرۋ، سونداي-اق ىلگەرى جوعارى وقۋ ورىندارى مەن زاماناۋي كوللەجدەردى انىقتاۋعا قاتىستى ءبىرقاتار مىندەتتى ورىنداۋى قاجەت.
ق ر بعم دەرەكتەرى بويىنشا، پەداگوگ قىزمەتكەرلەردىڭ جالاقىسىن ارتتىرۋ جۇيەلى تۇردە جۇرگىزىلىپ جاتىر جانە كەزەڭ-كەزەڭىمەن شەشىمىن تابۋدا. 2018 جىلى مەملەكەت باسشىسىنىڭ تاپسىرماسىمەن اتتەستاتتاۋدىڭ جاڭا جۇيەسى نەگىزىندە كاتەگورياسىن راستاعان جانە جاڭا مازمۇنداعى ءبىلىم بەرۋ باعدارلامالارىمەن جۇمىس ىستەيتىن ۇستازداردىڭ جالاقىسى 30-50%-عا ءوستى.
ك. ءشامشيدينوۆانىڭ ايتۋىنشا، ءبىلىم بەرۋ سالاسىنداعى جالاقىسى تومەن قىزمەتكەرلەردىڭ ەڭبەك اقىسىن ۇلعايتۋ 30%-عا دەيىن سارالانعان تۇردە جۇزەگە اساتىن بولادى.
«ءبىلىم بەرۋ سالاسىندا 500 مىڭ ادامنىڭ جالاقىسى وسەدى.
ولاردىڭ قاتارىندا مەكتەپكە دەيىنگى ۇيىمدار مەن ينتەرناتتاردىڭ تاربيەشىلەرى مەن ولاردىڭ كومەكشىلەرى، ادىسكەرلەر، الەۋمەتتىك پەداگوگتار، بالاباقشالار مەن كوللەدجدەردىڭ پسيحولوگتارى، قوسىمشا ءبىلىم بەرۋ ۇيىمدارىنىڭ قىزمەتكەرلەرى، كىتاپحاناشىلار، تالىمگەرلەر، بۋحگالتەرلەر، ءىس جۇرگىزۋشىلەر، جيناپ تازالاۋشىلار، اۋلا تازارتۋشىلار، كۇزەتشىلەر، پەش جاعۋشىلار، سانتەحنيكتەر مەن ەلەكتريكتەر جانە ت.ب. بار»، — دەدى ءبىلىم جانە عىلىم ءمينيسترى.
قازىرگى ۋاقىتتا ءبىلىم جانە عىلىم مينيسترلىگى ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ، قىزمەتكەرلەردىڭ ساناتتارىن جانە جالاقىسىن ارتتىرۋ كولەمىن ناقتى انىقتاۋ جۇمىستارىن جۇرگىزىپ جاتىر.
سونىمەن قاتار، ءبىلىم بەرۋ ساپاسىن ارتتىرۋ ماقساتىندا، 2019–2021 جىلدار ارالىعىندا جاڭارتىلعان مازمۇن بويىنشا 144 مىڭ ءمۇعالىم، 82 مىڭ سىنىپ جەتەكشىلەرى مەن پسيحولوگتار، 15،5 كوللەدج ماماندارى مەن 2،4 مىڭ جوو وقىتۋشىلارى قايتا دايارلاۋ كۋرستارىنان وتەدى.
قازىرگى تاڭدا تىلدىك كۋرستاردان وتكەن 11 423 جاراتىلىستانۋ پاندەرىنىڭ مۇعالىمدەرى 764 مەكتەپتە ساباق بەرىپ ءجۇر.
«2020 جىلدان باستاپ اتالعان كۋرستارعا قاراستىرىلعان قارجى جوعارى وقۋ ورىندارىندا اعىلشىن تىلىندە ساباق بەرەتىن مۇعالىمدەر دايىنداۋعا جۇمسالاتىن بولادى. بۇل ورايدا جوو-لاردىڭ تۇلەكتەرىنىڭ جۇمىسقا ورنالاسۋ دەڭگەيى ەسكەرىلەدى. وسى جىلدان باستاپ مەكتەپتەرگە ءتىل مەڭگەرگەن جوو تۇلەكتەرى كەلە باستايدى»، — دەدى ءبىلىم جانە عىلىم ءمينيسترى.
سونىمەن قاتار، مەكتەپ قۇرىلىسى مەن كۇردەلى جوندەۋدەن وتكىزۋدى قارجىلاندىرۋدىڭ جاڭا ادىستەمەسى ەنگىزىلەدى. قارجىلاندىرۋ كولەمى وقۋشىلار كونتينگەنتىنە بايلانىستى انىقتالادى. قاي جەردە مەكتەپ سالۋ جەرگىلىكتى اتقارۋشى ورگانداردىڭ قۇزىرەتىندە بولادى. بارلىق دەڭگەيلەردەگى ءبىلىم بەرۋ باعدارلامالارى زامان تالابىنا ساي وزەكتەندىرىلىپ وتىرادى.
بۇدان وزگە، 20 ىلگەرى جوعارى وقۋ ورىندارى مەن 180 زاماناۋي كوللەجدەردى انىقتالادى. بۇل ءۇشىن ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ 100 باسىم ماماندىق پەن ءبىلىم بەرۋ ۇيىمدارىن انىقتاۋدىڭ نەگىزگى كريتەرييلەرى بەلگىلەنەدى.
«جۇرتشىلىقپەن جانە جۇمىس بەرۋشىلەرمەن ىنتىماقتاسا وتىرىپ، ۋنيۆەرسيتەتتەر مەن كوللەدجدەر ءتىزىمى انىقتالىپ، ولاردىڭ ءبىلىم باعدارلامالارى ەكونوميكانىڭ تالاپتارىنا ساي وزەكتەندىرىلەدى. سونداي-اق، كوللەجدەردىڭ وقىتۋشىلارى مەن وندىرىستىك وقىتۋ شەبەرلەرىنىڭ بىلىكتىلىگىن ارتتىرۋ قاراستىرىلادى. وقۋ پروسەسىنە شەتەلدىك ماماندار تارتىلادى»، — دەپ مالىمدەدى ك. ءشامشيدينوۆا.
بۇدان وزگە، 100 باسىم مانماندىقتارعا سايكەس قاجەتتى جابدىقتار توپتاماسى بەلگىلەنەدى.
دەرەككوز: ۇلت پورتالى
