Vedomstvo bilim berý salasyndaǵy jalaqysy tómen qyzmetkerlerdiń tabysyn ulǵaitý, orta bilimde reformany naqty túrde iske asyrý, sondai-aq ilgeri joǵary oqý oryndary men zamanaýi kollejderdi anyqtaýǵa qatysty birqatar mindetti oryndaýy qajet.
QR BǴM derekteri boiynsha, pedagog qyzmetkerlerdiń jalaqysyn arttyrý júieli túrde júrgizilip jatyr jáne kezeń-kezeńimen sheshimin tabýda. 2018 jyly Memleket basshysynyń tapsyrmasymen attestattaýdyń jańa júiesi negizinde kategoriiasyn rastaǵan jáne jańa mazmundaǵy bilim berý baǵdarlamalarymen jumys isteitin ustazdardyń jalaqysy 30-50%-ǵa ósti.
K. Shámshidinovanyń aitýynsha, bilim berý salasyndaǵy jalaqysy tómen qyzmetkerlerdiń eńbek aqysyn ulǵaitý 30%-ǵa deiin saralanǵan túrde júzege asatyn bolady.
«Bilim berý salasynda 500 myń adamnyń jalaqysy ósedi.
Olardyń qatarynda mektepke deiingi uiymdar men internattardyń tárbieshileri men olardyń kómekshileri, ádiskerler, áleýmettik pedagogtar, balabaqshalar men kolledjderdiń psihologtary, qosymsha bilim berý uiymdarynyń qyzmetkerleri, kitaphanashylar, tálimgerler, býhgalterler, is júrgizýshiler, jinap tazalaýshylar, aýla tazartýshylar, kúzetshiler, pesh jaǵýshylar, santehnikter men elektrikter jáne t.b. bar», — dedi bilim jáne ǵylym ministri.
Qazirgi ýaqytta Bilim jáne ǵylym ministrligi Eńbek jáne halyqty áleýmettik qorǵaý ministrligimen birlesip, qyzmetkerlerdiń sanattaryn jáne jalaqysyn arttyrý kólemin naqty anyqtaý jumystaryn júrgizip jatyr.
Sonymen qatar, bilim berý sapasyn arttyrý maqsatynda, 2019–2021 jyldar aralyǵynda jańartylǵan mazmun boiynsha 144 myń muǵalim, 82 myń synyp jetekshileri men psihologtar, 15,5 kolledj mamandary men 2,4 myń JOO oqytýshylary qaita daiarlaý kýrstarynan ótedi.
Qazirgi tańda tildik kýrstardan ótken 11 423 jaratylystaný pánderiniń muǵalimderi 764 mektepte sabaq berip júr.
«2020 jyldan bastap atalǵan kýrstarǵa qarastyrylǵan qarjy joǵary oqý oryndarynda aǵylshyn tilinde sabaq beretin muǵalimder daiyndaýǵa jumsalatyn bolady. Bul oraida JOO-lardyń túlekteriniń jumysqa ornalasý deńgeii eskeriledi. Osy jyldan bastap mektepterge til meńgergen JOO túlekteri kele bastaidy», — dedi bilim jáne ǵylym ministri.
Sonymen qatar, mektep qurylysy men kúrdeli jóndeýden ótkizýdi qarjylandyrýdyń jańa ádistemesi engiziledi. Qarjylandyrý kólemi oqýshylar kontingentine bailanysty anyqtalady. Qai jerde mektep salý jergilikti atqarýshy organdardyń quzyretinde bolady. Barlyq deńgeilerdegi bilim berý baǵdarlamalary zaman talabyna sai ózektendirilip otyrady.
Budan ózge, 20 ilgeri joǵary oqý oryndary men 180 zamanaýi kollejderdi anyqtalady. Bul úshin Eńbek jáne halyqty áleýmettik qorǵaý ministrligimen birlesip 100 basym mamandyq pen bilim berý uiymdaryn anyqtaýdyń negizgi kriteriileri belgilenedi.
«Jurtshylyqpen jáne jumys berýshilermen yntymaqtasa otyryp, ýniversitetter men kolledjder tizimi anyqtalyp, olardyń bilim baǵdarlamalary ekonomikanyń talaptaryna sai ózektendiriledi. Sondai-aq, kollejderdiń oqytýshylary men óndiristik oqytý sheberleriniń biliktiligin arttyrý qarastyrylady. Oqý protsesine sheteldik mamandar tartylady», — dep málimdedi K. Shámshidinova.
Budan ózge, 100 basym manmandyqtarǵa sáikes qajetti jabdyqtar toptamasy belgilenedi.
Derekkóz: Ult portaly
