ءبىلىم جانە عىلىم مينيسترلىگىنىڭ وكىلدەرى ورتالىق كوممۋنيكاسيالار قىزمەتىنە كەلىپ، رەسمي مالىمدەمە جاسادى. ولار سوڭعى كۇندەرى اقپارات قۇرالدارى مەن الەۋمەتتىك جەلىلەردە جوعارى وقۋ ورىندارىندا ءبىرقاتار ماماندىقتار وقىتىلمايتىن بولدى دەگەن اقپاراتتاردىڭ جالعان ەكەنىن العا تارتىپ وتىر.
بۇل تۋرالى Sputnik قازاقستان حابارلايدى.
ايتا كەتسەك، وتكەن اپتادا ءبىلىم مينيسترلىگىنىڭ اينالاسىندا شۋ شىقتى. ناقتىراق ايتقاندا، مينيسترلىك جوعارعى جانە جوعارعىدان كەيىنگى ءبىلىم بەرۋ ماماندىقتارىنىڭ جاڭا كلاسسيفيكاتورىن ەنگىزدى دەگەن اڭگىمە تارادى. جاڭا تىزبەدە “قازاق ءتىلى”، “قازاق ادەبيەتى”، “قازاقستان تاريحى”، “لينگۆيستيكا”، “شىعىستانۋ” سياقتى ماماندىقتار جوق بولىپ شىقتى. مۇنى ۇلت مۇددەسىنە قارسى جاسالعان ءىس دەپ، نارازىلىق بىلدىرگەن ەلىمىزدىڭ ءبىر توپ عالىمى ۇكىمەت باسشىسى باقىتجان ساعىنتايەۆ، پرەزيدەنت اكىمشىلىگى جەتەكشىسىنىڭ ورىنباسارى مارات ءتاجين مەن مەملەكەتتىك حاتشى گۇلشارا ءابدىقالىقوۆانىڭ اتىنا حات جولداعان. بۇل اشىق حات كەيىن ءبىرقاتار اقپارات قۇرالدارىندا جاريالاندى.
“مەنىڭ ويىمشا قول قويعان كەزدە ول اكادەميكتەرگە دە بەلگىلى اقپاراتتى دۇرىس جەتكىزبەگەن شىعار. سوندىقتان، وكىنىشكە قاراي، ول كىسىلەر بىلمەي قول قويعان. ال، اشىق حاتتىڭ ىشىندەگى ساباقتار جويىلدى، قازاقستانداعى ماماندىقتاردىڭ اراسىنان قازاق ءتىلى الىنىپ تاستالدى دەگەن اقپارات شىندىققا جاناسپايدى”، — دەپ جاۋاپ بەردى بۇگىن تىلشىلەردىڭ سۇراعىنا جوعارى جانە جوعارى وقۋدان كەيىنگى ءبىلىم دەپارتامەنتىنىڭ ديرەكتورى دارحان احمەد-زاكي.
ونىڭ اتاپ وتۋىنشە، 2009 جىلى قابىلدانعان ماماندىقتار تىزبەسى وزگەرگەن جوق.
“ءقازىر قازاقستاندا جالعىز زاڭدى تۇردە بەكىتىلگەن قۇجات بار. ول — جوعارعى وقۋ جانە جوعارعى وقۋدان كەيىنگى جىكتەۋىش. وسى قۇجات 2009 جىلى بەكىتىلگەن، سودان بەرى وزگەرگەن جوق. وسى ماماندىقتارعا بايلانىستى كەيىن مەملەكەتتىك گرانتتار بولىنەدى، ال ءقازىر قازاق ءتىلى جانە ادەبيەتى ءپانى بويىنشا جەتى مىڭنان اسا مامان وقىپ جاتىر. ونىڭ ىشىندە ەكى مىڭنان استامى گرانتتا. جالپى، بيىل دا، كەلەشەكتە دە ول باعىتتا وزگەرىستەر بولادى دەپ كوزدەپ وتىرعان جوقپىز”، — دەدى ول.
