سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءبىلىم بەرۋ سالاسىنداعى جۇيەلى سىبايلاس جەمقورلىق بۇزۋشىلىقتاردى انىقتالعانىن جەتكىزدى، دەپ حابارلايدى Dalanews.kz.
ونىڭ سوزىنشە، وتكەن جىلدان بەرى 229 قىلمىستىق ءىس تىركەلگەن.
"ولار بويىنشا شىعىن 15 ميلليارد تەڭگەدەن استى. ۇرلىقتىڭ ەڭ كوپ سوماسى جەتىسۋ، تۇركىستان، قىزىلوردا، الماتى، اقتوبە وبلىستارى مەن الماتى قالاسىندا انىقتالدى. قىلمىس جاساۋدا 317 ادام اشكەرەلەندى، ونىڭ ىشىندە 144 ادام سوتتالىپ، ءتۇرلى جازالاۋ شارالارى قولدانىلدى"، – دەدى دانيار بيگايداروۆ.
سونىمەن قاتار ول اقتوبە وبلىسى بويىنشا سىبايلاس جەمقورلىققا قارسى قىزمەت شالقار اۋدانىنىڭ ءبىلىم ءبولىمىنىڭ باسشىسىنا قاتىستى قىلمىستىق ءىستى تەرگەپ جاتقانىن حابارلادى.
"ول اۋداندىق جالپى ءبىلىم بەرەتىن مەكتەپتىڭ ديرەكتورى ارقىلى ۆەدومستۆولىق باعىنىستى ۇيىمداردىڭ باسشىلارىنان قىزمەتتەگى جالپى قامقورلىعى ءۇشىن جالپى سوماسى 18،5 ميلليون تەڭگە پارا الدى دەپ كۇدىكتەلۋدە. سوتتىڭ سانكسياسىمەن ءبىلىم ءبولىمىنىڭ باسشىسى مەن اۋداندىق مەكتەپ ديرەكتورى قاماۋعا الىندى"، - دەپ تولىقتىردى ۆەدومستۆو وكىلى.
