ۇلتتىق ستاتيستيكا بيۋروسىنىڭ اعىمداعى كەزەڭدەگى مالىمەتتەرى بويىنشا قازاقستاندا جۇمىسپەن قامتىلعاندار سانى 8 ميلليوننان استام ادامدى قۇرايدى، ونىڭ ىشىندە 2 ميلليوننان استامى ءوزىن-وزى جۇمىسپەن قامتىعاندار.
بەيرەسمي جۇمىسپەن قامتۋدىڭ جوعارى دەڭگەيى كوبىنەسە جۇمىس ساپاسىنىڭ ناشارلاۋىنا جانە سوعان بايلانىستى تومەن جالاقى پروبلەمالارىنا، وقىتۋعا قولجەتىمدىلىكتىڭ شەكتەلۋىنە، الەۋمەتتىك قامسىزداندىرۋدىڭ نەمەسە كەلىسىمشارتتىق ەڭبەكتى قورعاۋدىڭ از نەمەسە مۇلدەم بولماۋىنا اكەلەدى.
بۇل قۇرامداستاردىڭ ءارقايسىسى ەڭبەك نارىعىنىڭ ساپاسىنا عانا ەمەس، ەڭ الدىمەن ءوزىن-وزى جۇمىسپەن قامتىعان ازاماتتاردىڭ ءال-اۋقاتىنا كەرى اسەرىن تيگىزەدى.
وسىعان بايلانىستى قازاقستان رەسپۋبليكاسىنىڭ كاسىپوداقتار فەدەراسياسى قولدانىستاعى ەڭبەك زاڭناماسىنا وزگەرىستەر مەن تولىقتىرۋلار ەنگىزۋ بويىنشا بىرنەشە جۇمىس توپتارىنا قاتىسىپ كەلەدى. سونداي-اق، ەڭبەك سالاسىنداعى وزەكتى ماسەلەلەردى شەشۋ ءۇشىن ۇكىمەتكە ءبىرقاتار شارالارعا باستاماشىلىق ەتىپ تە وتىرعانىن اتاپ ايتۋعا بولادى. ماسەلەن، باس كەلىسىمدە كاسىپوداقتاردىڭ كوپتەگەن باستامالارى بولدى.
كاسىپوداق باس كەلىسىمگە ەڭ تومەنگى جالاقى مولشەرىن كەزەڭ-كەزەڭىمەن ۇلعايتۋ، ونى جىل سايىنعى يندەكستەۋ، حەۇ-نىڭ №131 «دامۋشى ەلدەردە ەڭ تومەنگى جالاقىنى بەلگىلەۋ تۋرالى» كونۆەنسياسىن راتيفيكاسيالاۋ ماسەلەسىن ەنگىزۋ سىندى ماڭىزدى دۇنيەلەرگە قول جەتكىزدى.
لايىقتى ەڭبەك تۇجىرىمداماسىن جۇزەگە اسىرۋ ءۇشىن الەۋمەتتىك سەرىكتەستەرمەن جول كارتاسىن ازىرلەدى. ءبىز الەۋمەتتىك سەرىكتەستىكتەردىڭ قاراۋىنا ەڭ تومەنگى جالاقىنى انىقتاۋ ادىستەمەسىن دايىنداۋ جانە ونى دايەكتى تۇردە ارتتىرۋ قاجەتتىگى تۋرالى ماسەلەنى بىرنەشە رەت ۇسىندىق.
قازاقستان پرەزيدەنتى قاسىم-جومارت توقايەۆ ەل تۇرعىندارىنا ارناعان جولداۋىندا كاسىپوداقتىڭ بۇل باستاماسىنا قولداۋ كورسەتتى. مەملەكەت ەڭ تومەنگى جالاقىنى انىقتاۋدىڭ جاڭا ادىستەمەسىن ەنگىزەدى، ول ونىڭ مولشەرىن بىرتىندەپ ۇلعايتادى.
ال ءقازىردىڭ وزىندە كەلەسى جىلدىڭ باسىندا ەڭ تومەنگى جالاقى 60 مىڭنان 70 مىڭ تەڭگەگە دەيىن وسەتىنى بەلگىلى بولدى. بۇل جۇمىس ىستەيتىن 1،8 ميلليون قازاقستاندىققا تىكەلەي اسەر ەتەدى.
ۇستىمىزدەگى جىلدىڭ ءساۋىر ايىندا ۇكىمەت قابىلداعان «حالىق تابىسىن ارتتىرۋدىڭ 2025 جىلعا دەيىنگى باعدارلاماسىنا» ەنگىزۋ ءۇشىن كاسىپوداقتار فەدەراسياسى دا ءبىرقاتار ۇسىنىستارعا باستاماشى بولدى.
ەڭ الدىمەن كاسىپوداقتار فەدەراسياسى ەڭبەكاقى جۇيەسىن انىقتاۋ تەتىكتەرىن قايتا قاراۋ تۋرالى ۇسىنىس جاسادى. باعدارلامانى ىسكە اسىرۋ حالىقتىڭ ناقتى تابىستارىنىڭ ورتاشا جىلدىق ءوسۋ قارقىنىن 4-5 پايىز دەڭگەيىندە، 2 ميلليوننان استام جۇمىس ورنىن قۇرۋعا، جىو-دەگى جالاقى ۇلەسىن ارتتىرۋعا اكەلەدى دەپ كۇتىلۋدە.
باعدارلامادا وبلىس، اۋدان، قالا اكىمدەرى ءۇشىن حالىقتىڭ ءاربىر 10 مىڭ تۇرعىنىنا كەمىندە 100 جاڭا جۇمىس ورنىن قۇرۋ كورسەتكىشى بەلگىلەنگەنىن ايتا كەتكەن ءجون.
گۇلنار جۇماگەلدييەۆا، ق ر كاسىپوداقتارى فەدەراسياسى ءتوراعاسىنىڭ ورىنباسارى.
