Ulttyq statısıka búrosynyń aǵymdaǵy kezeńdegi málimetteri boıynsha Qazaqstanda jumyspen qamtylǵandar sany 8 mıllıonnan astam adamdy quraıdy, onyń ishinde 2 mıllıonnan astamy ózin-ózi jumyspen qamtyǵandar.
Beıresmı jumyspen qamtýdyń joǵary deńgeıi kóbinese jumys sapasynyń nasharlaýyna jáne soǵan baılanysty tómen jalaqy problemalaryna, oqytýǵa qoljetimdiliktiń shektelýine, áleýmettik qamsyzdandyrýdyń nemese kelisimsharttyq eńbekti qorǵaýdyń az nemese múldem bolmaýyna ákeledi.
Bul quramdastardyń árqaısysy eńbek naryǵynyń sapasyna ǵana emes, eń aldymen ózin-ózi jumyspen qamtyǵan azamattardyń ál-aýqatyna keri áserin tıgizedi.
Osyǵan baılanysty Qazaqstan Respýblıkasynyń kásipodaqtar federasıasy qoldanystaǵy eńbek zańnamasyna ózgerister men tolyqtyrýlar engizý boıynsha birneshe jumys toptaryna qatysyp keledi. Sondaı-aq, eńbek salasyndaǵy ózekti máselelerdi sheshý úshin Úkimetke birqatar sharalarǵa bastamashylyq etip te otyrǵanyn atap aıtýǵa bolady. Máselen, Bas kelisimde kásipodaqtardyń kóptegen bastamalary boldy.
Kásipodaq Bas kelisimge eń tómengi jalaqy mólsherin kezeń-kezeńimen ulǵaıtý, ony jyl saıynǵy ındeksteý, HEU-nyń №131 «Damýshy elderde eń tómengi jalaqyny belgileý týraly» konvensıasyn ratıfıkasıalaý máselesin engizý syndy mańyzdy dúnıelerge qol jetkizdi.
Laıyqty eńbek tujyrymdamasyn júzege asyrý úshin áleýmettik seriktestermen Jol kartasyn ázirledi. Biz áleýmettik seriktestikterdiń qaraýyna eń tómengi jalaqyny anyqtaý ádistemesin daıyndaý jáne ony dáıekti túrde arttyrý qajettigi týraly máseleni birneshe ret usyndyq.
Qazaqstan Prezıdenti Qasym-Jomart Toqaev el turǵyndaryna arnaǵan Joldaýynda kásipodaqtyń bul bastamasyna qoldaý kórsetti. Memleket eń tómengi jalaqyny anyqtaýdyń jańa ádistemesin engizedi, ol onyń mólsherin birtindep ulǵaıtady.
Al qazirdiń ózinde kelesi jyldyń basynda eń tómengi jalaqy 60 myńnan 70 myń teńgege deıin ósetini belgili boldy. Bul jumys isteıtin 1,8 mıllıon qazaqstandyqqa tikeleı áser etedi.
Ústimizdegi jyldyń sáýir aıynda Úkimet qabyldaǵan «Halyq tabysyn arttyrýdyń 2025 jylǵa deıingi baǵdarlamasyna» engizý úshin kásipodaqtar federasıasy da birqatar usynystarǵa bastamashy boldy.
Eń aldymen kásipodaqtar federasıasy eńbekaqy júıesin anyqtaý tetikterin qaıta qaraý týraly usynys jasady. Baǵdarlamany iske asyrý halyqtyń naqty tabystarynyń ortasha jyldyq ósý qarqynyn 4-5 paıyz deńgeıinde, 2 mıllıonnan astam jumys ornyn qurýǵa, JİÓ-degi jalaqy úlesin arttyrýǵa ákeledi dep kútilýde.
Baǵdarlamada oblys, aýdan, qala ákimderi úshin halyqtyń árbir 10 myń turǵynyna keminde 100 jańa jumys ornyn qurý kórsetkishi belgilengenin aıta ketken jón.
Gúlnar JUMAGELDIEVA, QR Kásipodaqtary federasıasy tóraǵasynyń orynbasary.
