ءماجىلىس دەپۋتاتى، "AMANAT" پارتياسى فراكسياسىنىڭ مۇشەسى ناتاليا دەمەنتيەۆا قازاقستان اسكەرىندەگى وز-وزىنە قول جۇمساۋ وقيعالارىنا قاتىستى ماسەلەنى كوتەردى، دەپ حابارلايدى Dalanews.kz.
"وتان الدىنداعى بورىشىن وتەپ جۇرگەن ساربازدىڭ اناسىمىن. سوندىقتان اسكەردەگى قاتىگەزدىك، ساربازداردىڭ قازا تابۋى مەن وز-وزىنە قول جۇمساۋ جاعدايلارىنا بەيجاي قاراي المايمىن. مۇنداي وقيعالاردى جەكە دەرەك رەتىندە قاراستىرۋعا بولمايدى. ولار جىلدار بويى شەشىلمەي كەلە جاتقان جۇيەلى ماسەلەلەردىڭ بار ەكەنىن كورسەتەدى"، — دەدى دەمەنتيەۆا دۇيسەنبى كۇنى وتكەن ءماجىلىستىڭ ىشكى ىستەر مينيسترلىگىندەگى كوشپەلى وتىرىسىندا.
ونىڭ پىكىرىنشە، مۇنداي جاعدايلار قوعامنىڭ قارۋلى كۇشتەرگە عانا ەمەس، جالپى مەملەكەتتىك ينستيتۋتتارعا دەگەن سەنىمىن تومەندەتىپ وتىر.
"ساربازداردىڭ بەيبىت ۋاقىتتا قازا تابۋىن تۇبەگەيلى جويۋ ءۇشىن ناقتى قانداي شارالار قابىلدانادى؟ اسكەر باسشىلارىن دايىنداۋ جۇيەسىندە مۇنداي قايعىلى جاعدايلاردىڭ الدىن الۋ ءۇشىن قانداي تاسىلدەر قولدانىلادى؟ قازاقستان انالارى ءوز ۇلدارىن بەيبىت ۋاقىتتا اسكەرگە جىبەرۋگە قاشان سەنىمدى بولا الادى؟" — دەپ سۇرادى دەپۋتات.
قورعانىس ءمينيسترىنىڭ ورىنباسارى شايح-حاسان جازىقبايەۆ اسكەردەگى قيىندىقتار قوعامداعى ماسەلەلەرمەن بايلانىستى ەكەنىن ايتتى.
"قورعانىس مينيسترلىگى دە قوعام مەن وتباسىلارداعى پروبلەمالارمەن بەتپە-بەت كەلىپ وتىر: قيىن ومىرلىك جاعدايلار، قاراۋسىز قالعان بالالار، ەسىرتكىنىڭ تارالۋى. اسكەرگە كەلەتىن مىڭداعان جاس جىگىتتەردىڭ اراسىندا دا پسيحولوگيالىق تۇرعىدا بەيىمدەلۋدە قيىندىق كورەتىندەر بار"، — دەدى ول.
ونىڭ ايتۋىنشا، قازىرگى ۋاقىتتا قورعانىس مينيسترلىگى قوسىمشا شارالار قابىلداپ جاتىر. ارنايى ادىستەمەلىك قۇجاتتار ازىرلەنىپ، پروفيلاكتيكا سۋبەكتىلەرىمەن كەلىسىمدەر جاسالعان، ال اسكەري پسيحولوگتار بىلىكتىلىگىن ارتتىرۋ كۋرستارىنان وتۋدە.
"بۇگىندە اسكەري پسيحيكالىق دەنساۋلىق ورتالىقتارىمەن قاتار، ەل بويىنشا جەرگىلىكتى ورتالىقتاردىڭ دا كومەگى قولدانىلادى"، — دەدى جازىقبايەۆ.
سونىمەن قاتار ول اسكەريلەرگە كومەك كورسەتۋ ءۇشىن زاماناۋي تەحنولوگيالار ەنگىزىلىپ جاتقانىن ايتتى.
"جاساندى ينتەللەكت نەگىزىندە جۇمىس ىستەيتىن ءانونيمدى Telegram-بوتتار ىسكە قوسىلدى. ولار ساربازدار مەن ولاردىڭ وتباسىلارىنا كۇيزەلىس پەن قيىن ومىرلىك جاعدايلارمەن كۇرەسۋگە كومەكتەسەدى. سونداي-اق اسكەرگە شاقىرۋ كەزىندە پسيحولوگيالىق دياگنوستيكا جۇرگىزىلەدى. بولاشاقتا جوعارى وقۋ ورىندارىندا قولدانىلاتىن پسيحودياگنوستيكالىق ادىستەردى ەنگىزۋ قاراستىرىلىپ جاتىر. ال پسيحولوگيا ماماندىعىندا وقيتىن ستۋدەنتتەر اسكەري بولىمدەردە تاجىريبەدەن وتەدى"، — دەدى ول.
ءماجىلىس ءتوراعاسىنىڭ ورىنباسارى دانيا ەسپايەۆا بۇل ماسەلەنى تەك پسيحولوگتاردىڭ كومەگىمەن شەشۋ مۇمكىن ەمەستىگىن ايتتى.
"ەگەر بۇل ماسەلە تەك پسيحولوگتار ارقىلى شەشىلەتىن بولسا، ونى الدەقاشان شەشىپ بولار ەدىك. مۇندا، ارينە، ناقتى جۇمىس اسكەري بولىمدەردىڭ ءوز ىشىندە ءجۇرۋى كەرەك"، — دەدى ەسپايەۆا.
