اباي وبلىسىنىڭ اكىمى بەرىك ءۋالي جۇمىس ساپارى اياسىندا التاي قالاسىندا 20-عا جۋىق قىتايلىق ينۆەستورلارمەن كەزدەستى، دەپ حابارلايدى Dalanews.kz
كەزدەسۋگە ءوندىرىس، اۋىل شارۋاشىلىعى، جاساندى ينتەللەكت، تەمىر جانە اۋە جولدارى، كوپىر قۇرىلىسى، لوگيستيكا، تۋريزم، ەنەرگەتيكا سالارىندا جۇمىس ىستەيتىن كومپانيا وكىلدەرى قاتىستى.
بەرىك ءۋالي قىتايلىق كاسىپكەرلەرگە ءوڭىردىڭ الەۋەتىن تانىستىرىپ، بىرلەسە جۇمىس ىستەۋگە شاقىردى.
"اباي وبلىسىنىڭ ونەركاسىپتىك، اگرارلىق، تۋريستىك الەۋەتى زور. ءوڭىر توعىز جولدىڭ تورابىندا ورنالاسقان. سىزدەرمەن بارلىق سالادا ىنتىماقتاستىق، بەرىك قارىم-قاتىناس ورناتۋعا دايىنبىز. وزدەرىڭىز بايقاپ وتىرعانداي، ءبىز شىڭجاڭ ۇيعىر اۆتونوميالىق ولكەسى پارتيا كوميتەتىنىڭ حاتشىسى ما سينجۋيدىڭ شاقىرۋىمەن التايعا ەڭ اۋقىمدى دەلەگاسيامەن كەلىپ وتىرمىز. بۇل ءبىزدىڭ سىزدەرمەن بۇرىنعىدان دا تىعىز قارىم-قاتىناس ورناتۋعا ىقىلاستى ەكەنىمىزدى كورسەتەدى.
سەمەيدە اۋماعى 1 مىڭ گەكتاردان اساتىن، 75 مىڭ تۇرعىنعا ارنالعان جاڭا ىقشام اۋدان بوي كوتەرەدى. وسىندا 40-تان استام اكىمشىلىك، كوممەرسيالىق، الەۋمەتتىك نىساندار، ساياباقتار، تۇرعىن ءۇي كەشەندەرىن سالۋ جوسپارلانعان. وزدەرىڭىزدى وسى ىقشام اۋداننىڭ قۇرىلىسىنا قاتىسۋعا شاقىرامىن"، - دەدى وبلىس اكىمى.
كەزدەسۋ بارىسىندا ينۆەستورلار وزدەرىنىڭ جوبالارىن تانىستىرىپ، تۋريزم، كولىك لوگيستيكا، اۋىل شارۋاشىلىعى، سالالارىنا، جەڭىل ونەركاسىپ كاسىپورىندارىن، جىلۋ جەلىلەرىن سالۋعا بايلانىستى ۇسىنىستارىن ايتتى.
ايماق باسشىسى كەزدەسۋدە ايتىلعان ۇسىنىستار جان جاقتى قاراستىرىلىپ، اكىمدىك تاراپىنان ءتيىستى قولداۋ كورسەتىلەتىن اتاپ ءوتتى.
ايتا كەتەيىك، اباي وبلىسىنىڭ دەلەگاسياسى ەرتەڭ التاي قالاسىندا وتەتىن حالىقارالىق "ۇلكەن التاي" سۋبوڭىرلىك كونفەرەنسياسىنا قاتىسادى. وبلىس اكىمى كونفەرەنسيادان كەيىن ءبىر توپ ينۆەستورمەن كەزدەسىپ، مەموراندۋمعا قول قويادى.
