ساراپشى ايبار ولجايەۆ بەلگىلى تەلەجۇرگىزۋشى اسحات نيازوۆتىڭ ادامنىڭ جىنىس مۇشەسىنە تاقيا كيگىزۋ تۋرالى ءسوزى قوعامنىڭ اشۋىن تۋعىزعانىن ايتىپ، بۇل جاعدايعا قۇقىقتىق باعا بەرۋ ءۇشىن باس پروكۋراتۋراعا ءوتىنىش جولدادى، دەپ حابارلايدى Dalanews.kz.
«وندا ۇلت ارازدىعىن قوزدىرۋ ەلەمەنتتەرى بار ما، جوق پا، سونى انىقتاۋ ءۇشىن قىلمىستىق كودەكستىڭ 174-بابى بويىنشا ەكسپەرتيزا جاساۋعا ءوتىنىش ءتۇسىردىم. بۇل 100 پايىز ءىس قوزعالادى دەگەندى بىلدىرمەيدى. قۇزىرلى ورگان قىلمىستىق قۇرام بار ما، جوق پا — سونى انىقتايتىن بولادى»، — دەدى ولجايەۆ.
ونىڭ ايتۋىنشا، بۇل جاعداي ءازىل رەتىندە ايتىلعان بولۋى مۇمكىن، دەگەنمەن مۇنداي “ازىلدەر” قوعامدى بىرىكتىرمەي، كەرىسىنشە ارازدىق تۋدىرۋى ىقتيمال.
«مۇمكىن بۇل جاي ءازىل شىعار. ءبىراق ءازىل ادامداردى جاۋلاستىرماۋى كەرەك. كەرىسىنشە جاقىنداستىرۋى ءتيىس ەدى»، — دەپ تۇيىندەدى جۋرناليست.
ايتا كەتەيىك، الەۋمەتتىك جەلىدە اسحات نيازوۆتىڭ ۆيدەوسى تاراپ، وندا ول تاقيا مەن ۇلتتىق رامىزدەرگە قاتىستى داۋلى پىكىر بىلدىرگەن ەدى. بۇل ءسوز قوعامدا كەڭ تالقى تۋدىردى.
