قازاقستاندىق كاسىپكەر الماز زاريپوۆ بىشكەكتە قاماۋعا الىندى، دەپ حابارلايدى Dalanews.kz.
وعان 2،5 ملن دوللارلىق الاياقتىق جاسادى دەگەن كۇدىك تاعىلىپ وتىر. Kaktus Media مالىمەتىنشە، بيىل ناۋرىزدا بىشكەكتىڭ ەكى تۇرعىنى ۇقك-گە شاعىمدانعان. ولار 51 جاستاعى ازامات سەنىمدەرىنە كىرىپ، قازاقستاننان استىق ونىمدەرىن جەتكىزۋگە قاتىستى ءتيىمدى بيزنەس ۇسىنعانىن ايتقان.
شارتقا كەلىسكەن ولار وعان 2،5 ملن دوللار (شامامەن 1،3 ملرد تەڭگە) بەرگەن. الايدا اقشانى العان سوڭ «جەتكىزۋشى» بايلانىسقا شىقپاي، بوي تاسالاعان. ىسكەرلىك ورتاداعى دەرەككوزدەر ونىڭ الماز زاريپوۆ ەكەنىن راستادى. ول KAZBRAND ازىق-تۇلىك حولدينگىنىڭ «اگرارلىق سەرۆيس» كومپانياسىنىڭ ديرەكتورى ءارى قازاقستان اگروونەركاسىپتىك وداعىنىڭ پرەزيدەنتى.
كومپانيا 2020 جىلدان بەرى جۇمىس ىستەپ، اۋىل شارۋاشىلىعى ونىمدەرىنىڭ ساۋداسىمەن اينالىسادى.
قىرعىزستاننىڭ ارنايى قىزمەتى زاريپوۆقا ىزدەۋ جاريالادى. 23 تامىزدا قولعا تۇسكەن سوڭ، بىشكەك سوتى ونى 20 قىركۇيەككە دەيىن قاماۋدا ۇستاۋ تۋرالى شەشىم شىعاردى. كاسىپكەرگە «اسا ءىرى كولەمدەگى الاياقتىق» بابى بويىنشا ايىپ تاعىلعان. ەگەر كىناسى دالەلدەنسە، ونى اۋىر جازا كۇتىپ تۇر.
