سانكسياعا ۇشىراعان بەلارۋس اعاشى ەۋروپا وداعى اۋماعىنا پولشا ارقىلى، ونىمدەر قازاقستاننان جىبەرىلگەنى تۋرالى جالعان قۇجاتتارمەن تاسىمالدانىپ جاتقانى تۋرالى اقپارات تارادى. بۇل تۋرالى ۋكراينالىق باسىلىمدار جازدى، - دەپ حابارلايدى Dalanews.kz.
"ۋكراينسكايا پراۆدا" باسىلىمى مالىمەتىنشە، تەرگەۋشىلەر بەلارۋستە اعاشقا قاتىستى سانكسيا ەنگىزىلگەننەن كەيىن ەو-عا قازاقستاننان اعاش يمپورتى ايتارلىقتاي وسكەنىن انىقتاعان. ەۋروستاتتىڭ مالىمەتىنشە، 2022 جىلى قازاقستاننان 14 ميلليون ەۋروعا اعاشتان تاۋار اكەلىنسە، 2023 جىلى بۇل كورسەتكىش بەس ەسەگە، ياعني 68 ميلليون ەۋروعا دەيىن جەتكەن.
"جۋرناليستەر قازاقستاندىق Nurr-electro فيرماسى مەن پولشانىڭ PLRBL اراسىنداعى ميلليون ەۋروعا جۋىق قاراعاي پاليسادىن جەتكىزۋگە ارنالعان كەلىسىمشارتتاردىڭ ءبىرىن زەرتتەگەن. كەلىسىمشارت 2022 جىلعى قازاننان، ال جەتكىزۋ 2023 جىلدىڭ باسىنان باستالادى"، - دەپ جازىلعان باسىلىم مالىمەتىندە.
دەرەكتەرگە سۇيەنسەك، قازاقستاندىق Nurr-electro قۇجاتىنداعى مورلەردەگى قولدار مەن بەدەرلەر بۇرمالانعانى بەلگىلى بولعان جانە گرافيكالىق ديزاين بويىنشا ەكى تاۋەلسىز ساراپشى بۇل فوتورەداكتوردىڭ كومەگىمەن قۇجاتتارعا سالىنعانىن ايتقان.
"سونىمەن قاتار، قازاقستاندىق Nurr-electro كومپانياسىنىڭ زاڭگەرى ارمان تولەي ۇلى جۋرناليستەرگە بەرگەن پىكىرىندە "مۇنداي مامىلە بويىنشا قارجىلىق وپەراسيالار بولماعانىن" جانە "ولاردا مۇنداي ءمور جوق" ەكەنىن ايتقان. ال بەلارۋستىڭ "گاللاردو" تاسىمالداۋشى كومپانياسىنىڭ وكىلى بەلارۋستەن كەلگەن تاۋارلار ەكەنىن مويىنداپ، "قازاقستاننان اكەلگەن جوقپىز، بەلارۋستەن اكەلدىك، سول جەردەن تيەدى" دەگەن"، - دەپ جازىلعان ماتەريالدا.
سونىمەن قاتار، PLRBL اتتى ساتىپ الۋشى كومپانيانىڭ جالعىز يەسى ولەگ يانوۆيچ جۋرناليستەردىڭ سۇراقتارىنا جاۋاپ بەرۋدەن باس تارتقان.
"تەرگەۋشىلەر نارىقتاعى دەرەككوزدەر كومەگىمەن اعاشتار بەلارۋس كاسىپورنىنىڭ قويماسىنان كەلگەنىن، ونىڭ يەسى ولەگ يانوۆيچ ەكەنىن انىقتاپتى.
پولشانىڭ سىرتقى ىستەر مينيسترلىگى وكىلدەرى جۋرناليستەردىڭ ساۋالىنا جاۋاپ رەتىندە سانكسيا ماسەلەسى ولاردىڭ قۇزىرەتىنە جاتپايتىنىن ايتتى. پولشانىڭ كەدەن قىزمەتى بارلىق كەدەندىك دەكلاراسيانى تەكسەرۋگە فيزيكالىق مۇمكىندىگى جوق ەكەنىن مالىمدەدى. پولشانىڭ ىشكى ىستەر مينيسترلىگى كورسەتىلگەن دەرەكتەر بويىنشا تەكسەرىس باستالعانىن ايتىپ، ودان ءارى تۇسىنىكتەمە بەرۋدەن باس تارتتى"، - دەپ جازىلعان ماتەريالدا.
