پرەمەر-مينيستر ولجاس بەكتەنوۆتىڭ توراعالىعىمەن "بايتەرەك" ۇلتتىق باسقارۋشى حولدينگى" اق ديرەكتورلار كەڭەسىنىڭ وتىرىسى ءوتتى. مەملەكەت باسشىسىنىڭ ەكونوميكانىڭ ناقتى سەكتورىن قارجىلاندىرۋ جونىندەگى تاپسىرمالارىن جۇزەگە اسىرۋعا نازار اۋدارىلدى، دەپ حابارلايدى Dalanews.kz.
ديرەكتورلار كەڭەسىنىڭ مۇشەلەرى حولدينگتىڭ بيزنەستى مەملەكەتتىك قولداۋ قۇرالدارىمەن قامتۋدى ارتتىرۋ بويىنشا جۇرگىزىپ جاتقان جۇمىستار تۋرالى حاباردار ەتىلدى. بيىلعى ءۇش ايدا شوب-تى قولداۋعا باعىتتالعان جالپى سوما 439 ملرد تەڭگەنى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 28%-عا ارتىق. قازاقستاننىڭ دامۋ بانكى ارقىلى 292،1 ملرد تەڭگەگە 9 ينۆەستيسيالىق جوبا جانە 9 ەكسپورتتىق وپەراسيا قارجىلاندىرىلدى. ونەركاسىپتى دامىتۋ قورى 94،5 ملرد تەڭگەنى قۇرايتىن 75 ليزينگتىك وپەراسيا مەن قارىزدار بەرىلدى.
اگروونەركاسىپ سەكتورىن دامىتۋ بويىنشا پرەزيدەنت العا قويعان مىندەتتەردى جۇزەگە اسىرۋ ماقساتىندا 3،2 مىڭنان استام اوك سۋبەكتىسى مەملەكەتتىك قولداۋمەن قامتىلدى. اۋىل شارۋاشىلىعى تاۋارىن وندىرۋشىلەر 233،4 ملرد تەڭگە سوماسىنا قارجىلاندىرىلدى، ونىڭ ىشىندە كوكتەمگى دالا جۇمىستارىنا 134،9 ملرد تەڭگە باعىتتالدى. قابىلدانعان شارالاردىڭ ناتيجەسىندە قازاقستاندىق شارۋالار 1،2 مىڭنان استام اۋىل شارۋاشىلىعى تەحنيكاسى مەن جابدىقتارىن ساتىپ الدى.
بيىل ءىرى ونەركاسىپتىك جانە ينفراقۇرىلىمدىق جوبالاردى ينۆەستيسيالاۋعا العاش رەت "بايتەرەك" ۇبح قۇرالدارى ارقىلى شامامەن 8 ترلن تەڭگە بولىنۋدە. وسى شارالاردىڭ ناتيجەسىندە ەكونوميكانىڭ سەرپىندى ءوسۋى جانە جاڭا جۇمىس ورىندارىن اشۋ كۇتىلىپ وتىر.
"ءقازىر حولدينگ ىسكە اسىرىپ جاتقان باسىم مىندەتتەردىڭ ءبىرى – ەكونوميكانىڭ ناقتى سەكتورىن قارجىلاندىرۋ. ەكونوميكاعا، ەلىمىزدەگى ءبىرقاتار اسا ماڭىزدى يندۋستريالىق جانە ينفراقۇرىلىمدىق جوبالاردى جۇزەگە اسىرۋعا جوسپارلانعان 8 ترلن تەڭگەنىڭ يگەرىلۋى ءقازىردىڭ وزىندە 2 ترلن تەڭگەگە جاقىنداپ قالدى. قۇرىلىس ماۋسىمى ءوزىنىڭ بەلسەندى كەزەڭىنە ەندى عانا ەنگەنىن ەسكەرسەك، قارقىن جامان ەمەس. مەن "بايتەرەكتىڭ" بارلىق ەنشىلەس قۇرىلىمدارىنىڭ ناقتى، ۇيلەسىمدى جۇمىس ىستەۋ قاجەتتىلىگىنە نازار اۋدارعىم كەلەدى. بۇل مىندەت قازىرگى جاعدايدا وڭاي ەمەس، ءبىراق ءبىز ءوز مىندەتتەمەلەرىمىزدى ورىندايمىز. حولدينگ، مەملەكەت كاپيتالداندىرۋ بويىنشا ءوز مىندەتتەمەلەرىن ورىنداعان جاعدايدا، ەكونوميكانى 8 ترلن تەڭگەگە قارجىلاندىرۋ جونىندەگى مىندەتتى ورىندايتىنىنا سەنىمدىمىن"، — دەپ اتاپ ءوتتى ولجاس بەكتەنوۆ.
ۇلتتىق ەكونوميكا جانە قارجى مينيسترلىكتەرىنە حولدينگتىڭ ۋاقتىلى كاپيتالداندىرىلۋىن قامتاماسىز ەتۋ تاپسىرىلدى.
تۇرعىن ءۇي ساياساتىن ىسكە اسىرۋ بويىنشا جۇرگىزىلىپ جاتقان جۇمىستارعا ەرەكشە نازار اۋدارىلدى. ماسەلەن، وسى جىلدىڭ 1 توقسانىندا 11،8 مىڭنان استام قازاقستاندىق وتباسى تۇرعىن ۇيمەن قامتاماسىز ەتىلدى. "وتباسى بانك" اق 225،2 ملرد تەڭگە سوماسىنا قارىز بەردى، "قازاقستاندىق تۇرعىن ءۇي كومپانياسى" 27،6 ملرد تەڭگەگە كەپىلدىك بەردى.
ديرەكتورلار كەڭەسى وتىرىسىنىڭ قورىتىندىسى بويىنشا ناتيجەلىلىكتى ءارى قاراي ارتتىرۋ ماقساتىندا حولدينگتىڭ ينۆەستيسيالىق ساياساتىن، سونداي-اق ۇيىمداستىرۋشىلىق جانە قارجىلىق باعىتتاردى جەتىلدىرۋ بويىنشا ءبىرقاتار قۇجات قابىلداندى.
