ولجاس بەكتەنوۆ ESTA Construction كومپانياسىمەن ەكى اپتا ىشىندە قۇنى $1،3 ملرد بولاتىن تىڭايتقىش زاۋىتىنىڭ قۇرىلىسى بويىنشا ينۆەستيسيالار تۋرالى كەلىسىم جاساۋدى تاپسىردى، دەپ حابارلايدى Dalanews.kz.
قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ ESTA Construction كومپانياسىنىڭ باس ديرەكتورى مۇستافا توپراكپەن كەزدەسۋ وتكىزدى. جيىندا كارباميد پەن اممياك وندىرەتىن زاۋىت قۇرىلىسىنا قاتىستى ماسەلەلەر تالقىلاندى.
قۇنى $1،35 ملرد-تى قۇرايتىن جوبا ماڭعىستاۋ وبلىسىندا، «قۇرىق» تەڭىز پورتى ماڭىندا ءىرى گاز-حيميا ءوندىرىسىن قۇرۋدى كوزدەيدى. زاۋىتتىڭ ورنى كاسپيي تەڭىزى ارقىلى ءونىمدى ەكسپورتتاۋعا وڭتايلى جاعدايلاردى قامتاماسىز ەتۋ ءۇشىن لوگيستيكالىق ارتىقشىلىقتاردى ەسكەرە وتىرىپ تاڭدالدى. زاۋىت جىلىنا 700 مىڭ تونناعا دەيىن كارباميد جانە 42 مىڭ توننا اممياك وندىرەدى، بۇل تىڭايتقىشتار يمپورتىنا تاۋەلدىلىكتى ازايتىپ، ەلىمىزدىڭ اۋىل شارۋاشىلىعى سالاسىن قوسىلعان قۇنى جوعارى ونىممەن قامتاماسىز ەتۋگە مۇمكىندىك بەرەدى. جوبانى ىسكە اسىرۋ بارىسىندا 3 مىڭعا دەيىن مامان تارتىلىپ، قۇرىلىس ناتيجەسىندە 400 تۇراقتى جۇمىس ورنى اشىلادى.
بۇگىنگى تاڭدا قازاقستاندا تىڭايتقىشتاردىڭ ءۇش ءتۇرىن ءوندىرۋ جولعا قويىلعان: اممياك سەليتراسى، امموفوس جانە اممونيي سۋلفاتى. سونىمەن قاتار سۇرانىس 3،2 ملن توننا عىلىمي قاجەتتىلىك كەزىندە وتاندىق قۋاتتار سۇرانىستىڭ 56%-ىن قامتاماسىز ەتىپ، جىلىنا 1،8 ملن تونناعا جۋىق تىڭايتقىش وندىرەدى.
ولجاس بەكتەنوۆ وزىمىزدە كارباميد ءوندىرىسىن قۇرۋ يمپورتقا تاۋەلدىلىكتى ازايتۋعا جانە ازىق-تۇلىك قاۋىپسىزدىگىن نىعايتۋعا مۇمكىندىك بەرەتىنىن باسا ايتتى.
«مەملەكەت باسشىسى ەلىمىزدىڭ اگروونەركاسىپ كەشەنىن دامىتۋعا ۇلكەن كوڭىل بولۋدە. وتكەن جىلى ءونىم جيناۋ بويىنشا رەكوردتىق كورسەتكىشكە قول جەتكىزىلدى. ۇكىمەت ەگىنشىلەردى قولداۋعا 700 ملرد تەڭگە ءبولدى. ماڭىزدى ماسەلە – ساپالى ءارى قولجەتىمدى مينەرالدى تىڭايتقىشتارمەن قامتاماسىز ەتۋ. سوندىقتان ءسىزدىڭ جوباڭىز كارباميدكە ىشكى سۇرانىستى قامتاماسىز ەتۋ، سونداي-اق ونى يمپورتتاۋ تۇرعىسىنان ءبىزدىڭ قىزىعۋشىلىعىمىزدى تۋدىرىپ وتىر»، دەپ اتاپ ءوتتى ق ر پرەمەر-مينيسترى.
سونىمەن قاتار كەزدەسۋ بارىسىندا اۋىل شارۋاشىلىعى تاۋارىن وندىرۋشىلەردى مەملەكەتتىك قولداۋ شارالارى تالقىلاندى. قازىرگى ۋاقىتتا قازاقستاندا تىڭايتقىشتار قۇنىنىڭ 60%-نا دەيىن جاباتىن سۋبسيديالاۋ باعدارلاماسى جۇمىس ىستەيدى، 2024 جىلدىڭ ناۋرىزىنان باستاپ اۆانستىق سۋبسيديالاۋ تەتىگى ەنگىزىلدى، سونىڭ ارقاسىندا قاراجات ءونىمنىڭ وزىندىك قۇنىن تومەندەتۋ ءۇشىن وندىرۋشىلەرگە الدىن الا قاراجات اۋدارىلادى. وتكەن جىلى بۇل ماقساتتارعا 46،4 ملرد تەڭگە ءبولىندى، 2025 جىلعا 35 ملرد تەڭگە قاراستىرىلدى.
كەزدەسۋ قورىتىندىسى بويىنشا ۋاكىلەتتى مەملەكەتتىك ورگاندارعا بارلىق ءراسىمدى جەدەلدەتىلگەن تارتىپپەن جۇرگىزۋ جانە ەكى اپتا ىشىندە ESTA Construction كومپانياسىمەن ءىرى ينۆەستيسيالىق جوبانى ىسكە اسىرۋدى باستايتىن ينۆەستيسيالىق كەلىسىم جوباسىن قول قويۋعا ەنگىزۋ تاپسىرىلدى.
