سويتكەن دەپۋتات: «باياعىدا مىنبەگە شىعىپ، ءسوز الۋ ءۇشىن، اقپارات تاراتۋ ءۇشىن دالەلدەنگەن ەڭبەگىڭ، قوعامدا پىكىر ايتاتىن بەدەلىڭ بولۋى كەرەك ەدى، ال مۇندا ەرىنبەگەن ادامنىڭ بارلىعى ويىنا كەلگەنىن جازا بەرەتىن بولعان» — دەدى.
ءوز سوزىندە بەكبولات تىلەۋحان فەيسبۋك اقش-تا وتباسىمەن بالىق اۋلاۋعا بارعاندارى سەكىلدى دەمالىستارىنىڭ سۋرەتىن سالاتىن الەۋمەتتىك جەلى بولىپ سانالاتىنىن مىسال ەتە كەلە: «ال بىزدە، قازاقستان قوعامىندا بۇل ساياسي ارەناعا اينالىپ وتىر. وسىنى اۋىزدىقتاۋ ءۇشىن نە ىستەۋ كەرەك دەگەن ماسەلە اقپارات مينيسترلىگىنىڭ الدىندا تۇر»، – دەدى.
دەپۋتاتتىڭ بۇل ايتقانى قوعامدا بەلگىلى ءبىر دەڭگەيدە رەزونانس تۋعىزدى. ءتۇرلى پىكىرلەر ايتىلدى. سونىڭ ءبىرى — بەلگىلى بلوگەر ايگۇل ورىنبەكتىكى.
ايگۇل ورىنبەك Facebook-تەگى جەكە پاراقشاسىندا بىلاي دەپ جازادى:
بەكبولات اعاما!
وقۋشىلاردىڭ تاماعىن جويعانداردى؛ مەكتەپ، جول، كوپىر سالامىز دەپ مەملەكەتتىڭ اقشاسىن جەگەندەردى؛ بەيبىتشىلىك كۇندە قولىنا قارۋ الىپ بەيكۇنا ازاماتتاردى اتقانداردى؛ «بالاق كەسىپ»، قازاقتىڭ قىزدارىن تالاق ايتىپ ءبىر بىرلەرىنە سىيلاعان باۋىرلارىڭدى؛ جەردى ساتامىن دەپ زاڭ شىعارعانداردى اۋىزدىقتاساڭىز قايدا قالدىڭىز؟
اۋزىنا اۋىزدىق سالاتىنداي، حالىق مال ما ەدى؟ اۋىزدىقتى سىزگە سالۋ كەرەك. جاعىمپازدانىپ «ءتورت اياقتاپ»، قولدايتىندارعا!
حالىق بۇرىنعىداي قاراڭعى ەمەس! نە سايراساڭىزدار دا سەنە بەرەتىن، حالىق بۇرىنعىداي جۋاس قوي ەمەس، ءجۇنىمىزدى قىرقادى عوي دەپ جاتا بەرەتىن! حالىق ءقازىر كۇش! حالىقتىڭ اۋىزىن جابۋدى ويلاماي، حالىقتىڭ كوڭىلىنەن شىعۋدى ويلاڭىز اعا!
مىنبەگە حالىقتىڭ اۋزىن جابۋ ءۇشىن وتىردىڭىز با؟ قىرشىن كەتكەن توعىز پوليسيا قىزمەتكەرلەرىنىڭ جاعدايىن ءسىز تولعاماعاندا كىم تولعايدى؟ زورلانىپ جاتقان سابيلەردىڭ جان ايقايىن ءسىز جىرلاماعان دا كىم جىرلايدى اعا؟ قازاقتى وزگە ۇلتتارعا جىعىپ بەرەتىن زاڭى بار ەلدى ءسىز جويماعان دا كىم جويادى اعا؟ اعا، نەگە ءبىز وسىنىڭ ءبارىن كورە تۇرا اۋىزدىقتالۋىمىز كەرەك؟
ءسىز ايتا الماعان دۇنيەنى ءبىز ايتقانىمىز ءۇشىن كىنالىمىز بە؟ سول ءۇشىن اۋىزدىقتالۋىمىز كەرەك پە؟ وسىعان جاۋاپ بەرىڭىزشى، اعا!
دايىنداعان، كامشات ساتييەۆا
دەرەككوز: kaz.365info.kz
