ىشكى ىستەر مينيسترلىگى ۇشقىشتىڭ قازاسىندا ەشقانداي قىلمىس بەلگىلەرى جوق دەپ مالىمدەدى.
مەيىرجان مولداقۇلوۆ باسىنان، جامباسى مەن ومىرتقاسىنان اۋىر جاراقات السا دا، امان قالعان. ءتىپتى، بىرنەشە وتادان سوڭ وڭالىپ، دارىگەرلەر ۇشقىشتى ۇيىنە جىبەرۋگە ءبىراۋىزدان شەشىم قابىلداعان.
اۋرۋحانادان جازىلىپ شىققان ازاماتتىڭ ارادا اپتا وتپەي جاتىپ قايتىس بولعانىنا ەندى دارىگەرلەر دە تاڭدانىسىن جاسىرماي وتىر.
– بىرنەشە دارىگەرلەردىڭ كەڭەسىنەن كەيىن عانا ول امبۋلاتوريالىق ەمگە شىعارىلعان بولاتىن. امبۋلاتورلىق ەمگە شىعارۋعا ول كىسىدە تولىق مۇمكىندىك بولدى. ەندى قانداي جاعدايلاردىڭ اسەر ەتكەنىن بىلمەيمىز. جۇرەگىنەن ناقتى اقاۋ بايقاعان جوقپىز. جالپى، ول كىسىنىڭ پسيحولوگياسىندا كەيبىر نەلەر بار ەكەنىن بايقاعان بولاتىنبىز. ونى ءبىز ايتا المايمىز، كىممەن سويلەسكەنى تۋرالى تەلەفونمەن، كىمگە رەنجىگەنى تۋرالى، بۇنى ەگەر تەكسەرەتىن بولسا، جاعداي انىقتالاتىن شىعار، – دەدى الماتى وبلىستىق قوعامدىق دەنساۋلىق ساقتاۋ دەپارتامەنتىنىڭ باستىعى تىلەۋحان ابىلدايەۆ.
ۇشقىشتىڭ ءوزى جازىلعانىمەن، جان جاراسى قالعانى انىق. كۋاگەرلەردىڭ ايتىنشا، جەدەل جاردەم ۇيىنە جەتكەندە جۇرەگى توقتاپ قالعان.
بولجام بويىنشا، مارقۇم وكپە تامىرلارىنىڭ تورمبوەمبالياسىنان كوز جۇمعان. ۇشقىشتىڭ اياقاستى ولىمىنە قاتىستى ءتۇرلى بولجام تاراعان ەدى. دەگەنمەن ىشكى ىستەر ءمينيسترىنىڭ ورىنباسارى مارقۇمنىڭ ولىمىندە «قىلمىستىڭ ءىزى جوق» دەپ توق ەتەرىن ايتتى.
– ۇشقىشتىڭ ولىمىنە اۋە اپاتىنان العان جاراقاتتارىنىڭ نەمەسە قاندايدا ءبىر قىلمىستىق فاكتورلاردىڭ قاتىسى جوق. ماسەلە – دەنساۋلىعىندا. قالاي بولعاندا دا، سوت-مەديسينالىق ساراپتاما تاعايىندالدى. ناقتى سەبەبىن مامانداردان ەستيتىن بولامىز، – دەدى ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ.
جالپى، «بەك ەيرگە» قاتىستى داۋ بۇگىن تاعى ۋشىعا ءتۇستى. اپاتتان سوڭ ارادا باقانداي ءبىر اي وتسە دە، زارداپ شەگۋشىلەرگە ەشبىر كومەك كورسەتىلمەپتى. ودان قالدى، اقشاسى تولەنىپ قويعان بيلەتتەردىڭ اقىسىن ءالى كۇنگە دەيىن قايتارىلماعان.
– زارداپ شەگۋشىلەرگە ءالى كۇنگە دەيىن وتەماقى تولەنبەگەن. ازاماتتار Bek Air وكىلدەرى اۋرۋحاناعا، ءتىپتى جەرلەۋگە دە كەلمەگەنىن ايتىپ ازاماتتار شاعىمدانىپ جاتىر. بيلەتتەردىڭ اقىسى تولەنبەگەن. باس پروكۋرورعا وسىعان قاتىستى دەپۋتاتتىق ساۋال جولدايمىن. ازاماتتاردىڭ ماسەلەسىن كومپانيا دەرەۋ شەشىپ بەرسىن، – دەدى ءماجىلىس دەپۋتاتى ازات پەرۋاشيەۆ.
پەرۋاشيەۆ تەرگەۋ ءىسىنىڭ دە سوزىلىپ كەتكەنىنە نارازى. بۇل ساۋالعا قاتىستى دا ىشكى ىستەر مينيسترلىگىندە جاۋاپ ايتىلدى. ءوز كەزەگىندە مارات قوجايەۆ «ونداي ءىس ەشقاشان تەز بىتپەيدى. كادىمگى جول كولىك وقيعاسى دا ءبىر، ەكى، ءۇش ايعا سوزىلىپ كەتەدى. ونىڭ سەبەبىن، ارنايى ساراپتامالار انىقتايدى. ال ۇشاق قۇلاعاندا، ساراپتاما قيىندايدى. ءقازىر ساراپتامالار جۇرگىزىلىپ جاتىر» دەدى.
