Ishki ister ministrligi ushqyshtyń qazasynda eshqandai qylmys belgileri joq dep málimdedi.
Meiirjan Moldaqulov basynan, jambasy men omyrtqasynan aýyr jaraqat alsa da, aman qalǵan. Tipti, birneshe otadan soń ońalyp, dárigerler ushqyshty úiine jiberýge biraýyzdan sheshim qabyldaǵan.
Aýrýhanadan jazylyp shyqqan azamattyń arada apta ótpei jatyp qaitys bolǵanyna endi dárigerler de tańdanysyn jasyrmai otyr.
– Birneshe dárigerlerdiń keńesinen keiin ǵana ol ambýlatoriialyq emge shyǵarylǵan bolatyn. Ambýlatorlyq emge shyǵarýǵa ol kiside tolyq múmkindik boldy. Endi qandai jaǵdailardyń áser etkenin bilmeimiz. Júreginen naqty aqaý baiqaǵan joqpyz. Jalpy, ol kisiniń psihologiiasynda keibir neler bar ekenin baiqaǵan bolatynbyz. Ony biz aita almaimyz, kimmen sóileskeni týraly telefonmen, kimge renjigeni týraly, buny eger tekseretin bolsa, jaǵdai anyqtalatyn shyǵar, – dedi Almaty oblystyq Qoǵamdyq densaýlyq saqtaý departamentiniń bastyǵy Tileýhan Ábildaev.
Ushqyshtyń ózi jazylǵanymen, jan jarasy qalǵany anyq. Kýágerlerdiń aitynsha, jedel járdem úiine jetkende júregi toqtap qalǵan.
Boljam boiynsha, marqum ókpe tamyrlarynyń tormboembaliiasynan kóz jumǵan. Ushqyshtyń aiaqasty ólimine qatysty túrli boljam taraǵan edi. Degenmen Ishki ister ministriniń orynbasary marqumnyń óliminde «qylmystyń izi joq» dep toq eterin aitty.
– Ushqyshtyń ólimine áýe apatynan alǵan jaraqattarynyń nemese qandaida bir qylmystyq faktorlardyń qatysy joq. Másele – densaýlyǵynda. Qalai bolǵanda da, sot-meditsinalyq saraptama taǵaiyndaldy. Naqty sebebin mamandardan estitin bolamyz, – dedi QR Ishki ister ministriniń birinshi orynbasary Marat Qojaev.
Jalpy, «Bek Eirge» qatysty daý búgin taǵy ýshyǵa tústi. Apattan soń arada baqandai bir ai ótse de, zardap shegýshilerge eshbir kómek kórsetilmepti. Odan qaldy, aqshasy tólenip qoiǵan biletterdiń aqysyn áli kúnge deiin qaitarylmaǵan.
– Zardap shegýshilerge áli kúnge deiin ótemaqy tólenbegen. Azamattar Bek Air ókilderi aýrýhanaǵa, tipti jerleýge de kelmegenin aityp azamattar shaǵymdanyp jatyr. Biletterdiń aqysy tólenbegen. Bas prokýrorǵa osyǵan qatysty depýtattyq saýal joldaimyn. Azamattardyń máselesin kompaniia dereý sheship bersin, – dedi Májilis depýtaty Azat Perýashev.
Perýashev tergeý isiniń de sozylyp ketkenine narazy. Bul saýalǵa qatysty da Ishki ister ministrliginde jaýap aityldy. Óz kezeginde Marat Qojaev «Ondai is eshqashan tez bitpeidi. Kádimgi jol kólik oqiǵasy da bir, eki, úsh aiǵa sozylyp ketedi. Onyń sebebin, arnaiy saraptamalar anyqtaidy. Al ushaq qulaǵanda, saraptama qiyndaidy. Qazir saraptamalar júrgizilip jatyr» dedi.
